ҚОРАҚАЛПОҒИСТОНДА ХИЗМАТ КЎРСАТГАН МАДАНИЯТ ХОДИМИ ГУЛМИРЗА НУРМАТОВНИНГ 80ЙИЛЛИК ЮБИЛЕЙИ КЕНГ НИШОНЛАНДИ

Ҳаётда шундай инсонлар бўладики, уларнинг фаолияти нафақат ўз жамоаси ютуқларига, балки ўша соҳа ривожига ҳам муносиб ҳисса бўлиб қўшилади. Узоқ йиллар туманимиздаги 9-сонли Болалар мусиқа ва санъат мактабини, туман Маданият бўлимини маҳорат билан бошқарган, ёшлигидан то нуроний ёшигача туманимизда санъатни ривожлантиришга, ёш истеъдодларни излаб топиш, уларнинг иқтидорини юксалтиришга бахшида қилган таниқли ҳофиз, бастакор, кўплаб ёшларнинг устози Гулмирза Нурматовни ана шундай инсонлардан бири десак, муболаға бўлмайди.

Гулмирза Нурматов шу йилнинг 2 апрелида табаррук 80 ёшини қарши олди. Шу муносабат билан 1 апрель куни туман Маданият бўлимида отахон санъаткор билан ижодий учрашув бўлиб ўтди. Тадбирга соҳа ходимлари, Гулмирза Нурматов билан ҳаммаслак бўлиб ишлаб, айни кунда кексалик нафақасига чиққан қадрдонлари, шогирдлари, дўстлари иштирок этдилар.

Тадбирни туман Маданият бўлими ходими Ойбек Бегимов бошқариб борди. Дастлаб сўзга чиққан Гулмирза Нурматовнинг собиқ ҳамкасби Омонбой Ҳасанов юбилярнинг ҳаёти, меҳнат фаолияти ва туманимизда санъатни ривожлантиришдаги хизматлари ҳақида батафсил маълумот берди.

Таъкидланганидек, Гулмирза Нурматовни ёшлигидаёқ устоз санъаткорлар Назир Наҳимов, Усмон Аҳмедов, Ражаббой Бобожоновлар ўз сафларига чорлаган, турли тадбирларда, концерт дастурларда бирга қўшиқлар ижро этиб, ҳамкорликда меҳнат қилишган.

Гулмирза Нурматов соҳир овоз билан куйлаган қўшиқлари туманимизгина эмас, республикамиз миқёсида кўплаб томошабинларга манзур бўлган. У узоқ йиллар 9-сонли Болалар мусиқа ва санъат мактабига, туман Маданият бўлимига раҳбарлик қилган, соҳадаги фидойи хизматлари туфайли “Қорақалпоғистонда хизмат кўрсатган маданият ходими” унвони билан тақдирланган.

Гулмирза Нурматов туманимиз миқёсида ўтказиладиган оммавий байрам, сайлларда хор ижрочилиги, гуруҳ рақсларини жорий этган, томошагоҳда фон яратишни олиб кирган.

Тадбирда Қорқалпоғистон Республикаси Маданият Вазирлигининг халқ ижодиёти ва бадиий ҳаваскорликни ривожлантириш сектори раҳбари Нурмуҳаммад Жиянбоев табригидан сўнг туман ҳокимлиги ташкилий-кадрлаш гуруҳи етакчи мутахассиси Озод Алмуродов, туман Маҳалла ва оилани қўллаб-қувватлаш бўлими бошлиғи ўринбосари Баҳодир Болтабоев, меҳнат фахрийси Рустам Рўзметовлар юбилярга туман ҳокимлигининг совғаларини топширдилар ва қутлуғ 80 ёши билан қутладилар.

Айтиш жоизки, бир вақтлар туманимизда Ҳайитбой боломончи исмли кишининг чалган сурнай, боломон оҳанглари одамларга жуда манзур бўлган. У кишининг вафотидан сўнг бу асбобларни чаладиган одам қолмагани, бироқ мусиқа ва санъат мактабида қизиқувчилар кўплигини инобатга олиб ва санъатнинг ушбу тури йўқолиб кетмаслиги учун шунчаки бир ҳаваскор сурнай чалувчи кишини ўқитувчи мактабга ишга олиб, сурнай синфини очган ва кейинчалик ушбу асбобни чалувчи профиссионал кадрлар етишиб чиқишига сабабчи бўлган. Ҳозирги 9-сонли ва 21-сонли Болалар мусиқа ва санъат мактаблари ҳам айнан Гулмирза Нурматовнинг саъй-ҳаракатлари билан қурилган. “Жайхун мўъжизалари” саҳна цирк жамоаси ҳам унинг ташаббуси билан ташкил этилган.

Гулмирза Нурматовнинг бунингдек фидойи хизматларини бутун халқимиз ҳақли равишда эътироф этади. Бу тадбирда ҳам яққол намоён бўлди.

Таълим фахрийси Аҳмад Машарипов, туман Маданият бўлимида узоқ йиллар кутубхонлар тармоғига раҳбарлик қилган Гулчеҳра ҳожи опа Дўсимбетова, таниқли ҳофиз Анвар Худойбергановларнинг табрикларидан сўнг туманимиз санъаткорлари ижросида Гулмирза Нурматов куй басталаган қўшиқлар ижро қилинди.

Тадбир сўнгида Гулмирза Нурматов ўзига кўрсатилаётган ҳурмат-эҳтиром учун ташкилотчиларга, барча иштирокчиларга миннатдорчилик билдирди.

Ойгул РАЖАБОВА.