СТОЛ ТЕННИСИ БЎЙИЧА ҚОРАҚАЛПОҒИСТОН ЧЕМПИОНАТИ ЎТКАЗИЛДИ

Икки киши ёки икки кишилик гуруҳ орасида ўйналадиган ўйини – стол тенниси жуда қадимий ҳисобланса-да, Ўзбекистонга  20 аср бошларида кириб келган.

Ушбу чаққонлик, эпчиллик ва ўта ҳушёрликни талаб этувчи ўйин мамлакатимизда мустақиллик йилларида оммалашди ва ривожланди, мамлакатимизнинг барча ҳудудларида теннис кортлари қурилди. Теннис ўйнаш учун спортчиларга, томошабинларга қулай шароитлар яратилди. 1992 йилда Ўзбекистон теннис Федерацияси тузилди ва Халқаро теннис Федерациясининг аъзоси бўлди.

Ўтган давр мобайнида спортнинг бу тури бўйича кўплаб номдор, дунё тан олган вакиллар етишиб чиқди ва уларга муносиб ўринбосар спортчилар тайёрлашга ҳам алоҳида эътибор берилмоқда. Хусусан, ушбу спорт тури билан ёшлар-ўсмирлар умумий ўрта таълим мактаблари тўгарак машғулотларида, спорт мактабларида шуғулланишиб, ўз иқтидорларини ривожлантиришмоқда. Уларнинг бу саъй-ҳаракатларини рағбатлантириш, оммавийлигига  эришиш мақсадида турли мусобақалар ташкил этилмоқда.

2021 йил – Ёшларни қўллаб-қувватлаш ва аҳоли саломатлигини  мустаҳкамлаш йили Давлат дастурида белгилаб берилган вазифалар ижросини таъминлаш мақсадида шу йилнинг 1-4 декабрь кунлари Амударё туманида стол тенниси бўйича Қорақалпоғистон Республикаси чемпионати бўлиб ўтди.

Мусобақаларга пойтахт Нукус шаҳри ва туманлардан ҳаваскор теннисчи спортчилар иштирок этдилар. 2010 йилда туғилган ва ундан  ёш ўсмир ўғил болалар ва қизлар ўртасида ўтказилган чемпионатга 60 нафар ўғил болалар, 40 нафар қизлар иштирок этиб, ғолиблик учун ўзаро беллашдилар.

Спортнинг стол тенниси турининг оммавийлигига эришиш, маҳоратли теннисчиларни аниқлаш ва уларнинг ўз қобилиятларини намойиш этишларига шароит яратиш, нуфузли мусобақаларда Қорақалпоғистон спорт шарафини муносиб ҳимоя қила оладиган спортчиларни тарбиялаш мақсадида ташкил этилган мусобақаларда барча иштирокчилар ўз имкониятлари даражасида ғолиблик учун кураш олиб бордилар.

Беш кун давом этган беллашувлар натижаларига кўра, ўғил болалар ўртасида биринчи ўринни туманимиз вакили Сарвар Раҳимов, иккинчи ўринни Қонликўл тумани вакили Рамазон Абдижамилов, учинчи ўринларни эса амударёлик Зафарбек Юнусов, Чимбой тумани вакили Асад Ситчановлар эгалладилар.

Чемпионатнинг қизлар орасидаги баҳслари ҳам қизиқарли ва муросасиз кечди. Натижаларга кўра, Нукус шаҳри вакиллари Ҳурлиман Маденова биринчи, Айдана Сарсенбоева иккинчи, Чимбой тумани вакили Қурбонгул Турғонбоева, Шўманай тумани вакили Айсўна Тиркешовалар эса учинчи ўринларни эгалладилар.

Мусобақа якунида ғолиб бўлган ва фахрли ўринларни эгаллаган ёш теннисчиларга ташкилотчилар томонидан Диплом ва қимматбаҳо совғалар топширилди.

Сўнгги йилларда юртимизда аҳолини, айниқса, ёшларни спортга кенг жалб этиш, уларнинг соғлом ҳаёт кечиришларини таъминлаш масаласи давлат сиёсатининг устувор йўналишларидан бирига айланди. Ўтказилган ушбу чемпионат ҳам ана шу каби мақсадларга қаратилгани билан аҳамиятлидир.

О.РАЖАБОВА.