28 НАФАР БОЛАЖОНЛАРГА “ПРЕЗИДЕНТ СОВҒАСИ” ТОПШИРИЛДИ
Янги йил байрами арафасида Амударё тумани ҳокими Султонбой Йўлдошев ва барча секторлар раҳбарлари ўз ҳудудларидаги болажонларнинг уйларига бориб, Янги йил билан қутлаб, Президент совғаларини топширди. Навбатдаги лавҳамиз шу ҳақида.
Бутун дунё аҳолисини жиддий синовлардан ўтказаётган коронавирус пандемияси гарчи, мамлакатимизда санитария-эпидемиологик вазият барқарорлигига эришилаётган бўлса-да, карантин чекловларига қатъий амал қилишни тақозо этмоқда. Ҳукумат қарорига кўра, шу боисдан ҳам Янги йил байрамини корхона-ташкилотларда, олий, умумий ўрта таълим, мактабгача таълим ташкилотларида корпооратив нишонламаслик тавсия қилинди. Байрамни ҳамма ўз оиласи даврасида нишонлаш, одамлар кўп йиғиладиган жойларга бормаслик, Мактабгача таълим, умумий ўрта таълим ташкилотларида “Президент арчаси” байрам томошаларини ҳам ўтказмаслик топширилди.
Ўзбекистон Республикаси Вазирлар Маҳкамасининг 2020 йил 21 ноябрдаги “Президент арчаси” тадбирига тайёргарлик кўриш ва уни ўтказиш тўғрисида”ги тегишли баёнига кўра, Меҳрибонлик уйлари тарбияланувчилари, ота-она қаровисиз қолган болалар, шунингдек, ижтимоий ҳимояга муҳтож оилалар фарзандлари учун 2020 йилги “Президент арчаси” тадбири Covid-19 вируси билан боғлиқ пандемия шароитида республикада жорий этилган карантин талабларига қатъий риоя этилган ҳолда ўтказилди.
Шунингдек, шаҳар ва туманлар ҳокимликларига жорий йил 29-30 декабрь кунлари Меҳрибонлик уйи, Болалар уйи тарбияланувчилари, маҳаллалардаги ота-она қаровисиз қолган болалар, ижтимоий ҳимояга муҳтож оилалар фарзандлари, шунингдек, ота-оналари Ватан сарҳадларини ҳимоя қилиш йўлида қурбон бўлган болаларга “Президент совғаси”ни яшаш манзилларига олиб бориб тарқатиши белгиланди.
Болажонлар учун Янги йил байрами, байрам муносабати билан ўтказиладиган томошалар, ям-яшил арча атрофида Қорбобо ва Қорқиз ҳамроҳлигидаги ўйин-кулгулар олам-олам завқ бағишлайди, театрлаштирилган томошалар ўчмас таассуротлар қолдиради. Аммо бугунги кундаги эпидемиологик вазият инобатга олиниб, жорий йилда бунингдек томошалар ташкил қилинмаса-да, халқпарвар ва болажон ҳукуматимиз топшириғига кўра, кўнгли ярим, ота-она қаровисиз қолган, кам таъминланган оилалар фарзандларига Президент совғалари топширилгани болаларга олам-олам шодлик бахш этди.
29-30 декабрь кунлари туман ҳокими Султонбой Йўлдошев ва барча секторлар раҳбарлари ўз ҳудудларидаги ана шундай болажонлар уйларига бориб, Янги йил билан қутлаб, Президент совғасини топширдилар.
Хусусан, туман ҳокими Султонбой Йўлдошев Манғит шаҳрининг Гулзор маҳалласида истиқомат қилувчи Асадбек Мадраҳимов, Мадинабону Маҳраҳимова, Олмазор маҳалласида яшовчи Умидбек Жуманиёзов, Мафтуна Олламберганова, Гулзор маҳалласида яшовчи Чарос Раҳимовалар яшовчи хонадонларга ташриф буюриб, Президентимизнинг Янги йил совғасини топширди. Туман ҳокими болажонлар билан дилдан суҳбатлашиб, яшаш шароитлари билан танишди.
Шунингдек, тумандаги бошқа секторлар раҳбарлари ҳам ўз ҳудудларида болажонларга Президент совғаларини топширдилар. 3-сектор раҳбари, туман Ички ишлар бўлими бошлиғи Улуғбек Худойберганов сектор ҳудудида истиқомат қилувчи Беҳруз Асқаров, Шоҳруз Асқаров, Ҳикматилла Раҳимов, Омонбой Ғойибов, Севинчой Эркинова, Беҳруз Худойбергановларга Президент совғасини топшириб, Янги йил байрами билан қутлади, ўқишларида муваффақиятлар тилади.
Байрам арафасида туман бўйича 28 нафар болажонларга хонадонларига ташриф буюрилиб, секторлар раҳбарлари томонидан Президент совғалари топширилди ва байрам қувончлари ҳадя этилди.
Ойгул Ражабова
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
