28 NAFAR BOLAJONLARGA “PREZIDENT SOVGʻASI” TOPShIRILDI
Yangi yil bayrami arafasida Amudaryo tumani hokimi Sultonboy Yoʻldoshev va barcha sektorlar rahbarlari oʻz hududlaridagi bolajonlarning uylariga borib, Yangi yil bilan qutlab, Prezident sovgʻalarini topshirdi. Navbatdagi lavhamiz shu haqida.
Butun dunyo aholisini jiddiy sinovlardan oʻtkazayotgan koronavirus pandemiyasi garchi, mamlakatimizda sanitariya-epidemiologik vaziyat barqarorligiga erishilayotgan boʻlsa-da, karantin cheklovlariga qatʼiy amal qilishni taqozo etmoqda. Hukumat qaroriga koʻra, shu boisdan ham Yangi yil bayramini korxona-tashkilotlarda, oliy, umumiy oʻrta taʼlim, maktabgacha taʼlim tashkilotlarida korpoorativ nishonlamaslik tavsiya qilindi. Bayramni hamma oʻz oilasi davrasida nishonlash, odamlar koʻp yigʻiladigan joylarga bormaslik, Maktabgacha taʼlim, umumiy oʻrta taʼlim tashkilotlarida “Prezident archasi” bayram tomoshalarini ham oʻtkazmaslik topshirildi.
Oʻzbekiston Respublikasi Vazirlar Mahkamasining 2020-yil 21-noyabrdagi “Prezident archasi” tadbiriga tayyorgarlik koʻrish va uni oʻtkazish toʻgʻrisida”gi tegishli bayoniga koʻra, Mehribonlik uylari tarbiyalanuvchilari, ota-ona qarovisiz qolgan bolalar, shuningdek, ijtimoiy himoyaga muhtoj oilalar farzandlari uchun 2020-yilgi “Prezident archasi” tadbiri Covid-19 virusi bilan bogʻliq pandemiya sharoitida respublikada joriy etilgan karantin talablariga qatʼiy rioya etilgan holda oʻtkazildi.
Shuningdek, shahar va tumanlar hokimliklariga joriy yil 29-30-dekabr kunlari Mehribonlik uyi, Bolalar uyi tarbiyalanuvchilari, mahallalardagi ota-ona qarovisiz qolgan bolalar, ijtimoiy himoyaga muhtoj oilalar farzandlari, shuningdek, ota-onalari Vatan sarhadlarini himoya qilish yoʻlida qurbon boʻlgan bolalarga “Prezident sovgʻasi”ni yashash manzillariga olib borib tarqatishi belgilandi.
Bolajonlar uchun Yangi yil bayrami, bayram munosabati bilan oʻtkaziladigan tomoshalar, yam-yashil archa atrofida Qorbobo va Qorqiz hamrohligidagi oʻyin-kulgular olam-olam zavq bagʻishlaydi, teatrlashtirilgan tomoshalar oʻchmas taassurotlar qoldiradi. Ammo bugungi kundagi epidemiologik vaziyat inobatga olinib, joriy yilda buningdek tomoshalar tashkil qilinmasa-da, xalqparvar va bolajon hukumatimiz topshirigʻiga koʻra, koʻngli yarim, ota-ona qarovisiz qolgan, kam taʼminlangan oilalar farzandlariga Prezident sovgʻalari topshirilgani bolalarga olam-olam shodlik baxsh etdi.
29-30-dekabr kunlari tuman hokimi Sultonboy Yoʻldoshev va barcha sektorlar rahbarlari oʻz hududlaridagi ana shunday bolajonlar uylariga borib, Yangi yil bilan qutlab, Prezident sovgʻasini topshirdilar.
Xususan, tuman hokimi Sultonboy Yoʻldoshev Mangʻit shahrining Gulzor mahallasida istiqomat qiluvchi Asadbek Madrahimov, Madinabonu Mahrahimova, Olmazor mahallasida yashovchi Umidbek Jumaniyozov, Maftuna Ollamberganova, Gulzor mahallasida yashovchi Charos Rahimovalar yashovchi xonadonlarga tashrif buyurib, Prezidentimizning Yangi yil sovgʻasini topshirdi. Tuman hokimi bolajonlar bilan dildan suhbatlashib, yashash sharoitlari bilan tanishdi.
Shuningdek, tumandagi boshqa sektorlar rahbarlari ham oʻz hududlarida bolajonlarga Prezident sovgʻalarini topshirdilar. 3-sektor rahbari, tuman Ichki ishlar boʻlimi boshligʻi Ulugʻbek Xudoyberganov sektor hududida istiqomat qiluvchi Behruz Asqarov, Shohruz Asqarov, Hikmatilla Rahimov, Omonboy Gʻoyibov, Sevinchoy Erkinova, Behruz Xudoyberganovlarga Prezident sovgʻasini topshirib, Yangi yil bayrami bilan qutladi, oʻqishlarida muvaffaqiyatlar tiladi.
Bayram arafasida tuman boʻyicha 28 nafar bolajonlarga xonadonlariga tashrif buyurilib, sektorlar rahbarlari tomonidan Prezident sovgʻalari topshirildi va bayram quvonchlari hadya etildi.
Oygul Rajabova
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
