“Агробанк” бошқаруви раисининг биринчи ўринбосари Амударё туманида эҳтиёжманд оилаларга совғалар топширди

Янги йил байрами арафасида Ўзбекистон Республикаси Агробанк бошқаруви раисининг биринчи ўринбосари Шуҳрат Расулов туманимизда бўлиб, “Темир дафтар”га киритилган оилаларнинг иқтсодий аҳволи ва туманда камбағалликни  қисқартириш юзасидан амалга оширилаётган ишлар билан танишди. Шу билан бирга кам таъминланган, эҳтиёжманд оилаларга кириб бориб, уларнинг муаммоларини  ўрганди ҳамда Янги йил совғаларини топширди.

Туманимиз нафақат Қорақалпоғистон Республикаси балки мамлакатимиздаги аҳолиси ва ер майдони жиҳатидан катта туманлардан бири ҳисобланади. Айни пайтда туманимизда 200 минг нафардан зиёд аҳоли истиқомат қилади. Туманда “Темир дафтар”га киритилган оилалар сони даставвал 2467 тани ташкил этган. Ушбу оилаларнинг иқтисодини кўтариш, камбағалликдан чиқариш мақсадида масъуллар томонидан амалга оширилган самарали ишлар туфайли, бугунги кунда “Темир дафтар”даги 2361 та оилада истиқомат қилувчи 4204 нафар киши иш билан таъминланган ва бу оилаларга кўрсатилган ижтимоий ёрдамлар натижасида ушбу 2361 та оиланинг яшаш шароитлари яхшиланиб, “Темир дафтар” рўйхатидан чиқарилган.

“Темир дафтар” – бу оилаларни камбағалликдан чиқаришга қаратилган дастур ҳисобланади. Ушбу дастурга кўра, туманимизда ҳам ижтимоий аҳволи ҳамда турмуш шароити оғир бўлган, сектор раҳбарлари томонидан алоҳида назоратга олинган оилалар киритилган эди. Коронавирус пандемияси шароитида ижтимоий аҳволи ва турмуш шароити оғирлашган оилаларнинг бандлигини таъминлаш орқали уларга даромад манбаи яратишнинг вақтинчалик тартибига асосан, туманимиздаги “Темир дафтар”га киритилган эҳтиёжманд оилалар аъзоларига иш топиб бериш ҳамда уларнинг доимий даромадга эга бўлишларига кўмаклашилди.

Ҳозирги пайтда туманимизда “Темир дафтар” рўйхатида 106 та оила мавжуд бўлиб, ушбу оилалар аъзоларининг бандлигини таъминлаш мақсадида Агробанк томонидан тизимли ишлар йўлга қўйилган. Хусусан, якунланаётган 2020 йил давомида Агробанк томонидан тумандаги эҳтиёжманд оилаларга 200 млн. сўмлик ҳомийлик ёрдамлари кўрсатилди. Айрим хонадонларга 71,2 млн. сўм маблағ эвазига эчкилар олиб берилиб, чорва боқишга йўналтирилди. Шунингдек, кам таъминланган оилаларга 9,7 млн. сўмлик кўмир маҳсулотлари ҳам етказиб берилди.

Туманимизда “Аёллар дафтари” рўйхатига киритилган 98,6 минг нафар аёл-қизларнинг 663 нафари ишсиз бўлиб, улардан 9 нафари олий маълумотли мутахассислар, 195 нафари ўрта махсус ва 459 нафари ўрта маълумотга эга аёллардир. “Ёшлар дафтари”га рўйхатга олинган 18-30 ёш оралиғидаги 44 минг 340 нафар ёшлардан 5 минг 196  нафари иш билан таъминланмаган. Ушбу муаммоларни бартараф этиш, туманда камбағалликни қисқартириш, айниқса, ёшларнинг доимий иш билан бандлигини таъминлаш мақсадида  туманда “Ёшлар ва боғдорчилик” ўқув маркази биносини янгидан барпо этиш учун “Агробанк” томонидан 1,2 млрд. сўмлик ҳомийлик маблағлари ажратилди.

Айни кунларда бутун мамлакатимизда, шу жумладан, туманимизда ҳам янги йил байрам шукуҳи кезмоқда. Халқимизни ушбу қутлуғ кунларда тўкис ва бахтиёр кўриш барчамизга қувонч бағишлайди. “Темир дафтар”, “Аёллар дафтари” “Ёшлар дафтари” рўйхатига киритилган оилалар аъзоларига қувончли кайфият улашиш мақсадида Агробанк томонидан яна бир эзгу иш амалга оширилди. Юқоридаги дафтарлар рўйхатидаги оилаларни ижтимоий қўллаб-қувватлаш мақсадида 111,5 млн. сўмлик моддий ёрдам ажратилди. “Темир дафтар” рўйхатидаги 106 та  оилаларга эса Янги йил совғаси сифатида кундалик зарур озиқ-овқат маҳсулотлари тарқатилмоқда.

Робия ЙЎЛДОШЕВА.