Ўзбекистоннинг хорижий давлатлардаги элчиларига Амударё туманининг инвестицион ва экспорт салоҳияти намойиш этилди

23 декабрь куни Ўзбекистоннинг Хитой Халқ Республикасидаги Фавқулодда ва Мухтор элчиси Бахтиёр Саидов, Италиядаги Фавқулодда ва Мухтор элчиси Отабек Акбаров ҳамда Сингапурдаги Фавқулодда ва Мухтор элчиси Қаҳрамон Шокировлар Амударё туманига ташриф буюрди.

Элчилар Амударё тумани ҳокими Султонбой Йўлдашев томонидан кутиб олиниб, туман ҳокимлиги мажлислар залида томонлар иштирокида йиғилиш ўтказилди. Йиғилиш давомида туманнинг асосий иқтисодий кўрсаткичлари, инвестицион салоҳияти, амалга оширилаётган ҳамда истиқболли лойиҳалар тўғрисида тақдимот ўтказилиб, батафсил маълумот берилди.

Жумладан, туманда интенсив боғлар ташкил қилиш, замонавий иссиқхоналар қуриш, балиқчилик, терини ва мева-сабзавотни қайта ишлаш каби лойиҳаларни амалга ошириш учун мавжуд шароитлар ўрганилиб, инвесторларни жалб қилиш истиқболлари муҳокама қилинди. Шунингдек, элчилар туманни ривожлантириш бўйича етакчи давлатлар технологияларини ҳамда мутахассисларини жалб қилиш бўйича амалий ёрдам беришини таъкидлаб, бу борада ўз тавсияларини бериб ўтди.

Элчилар “Амударё томорқа хизмати” масъулияти чекланган жамияти томонидан амалга оширилаётган мева-сабзавотни сақлаш ва қайта ишлаш лойиҳаси доирасида қилинаётган ишлар билан танишиш мақсадида ушбу жамиятга ташриф буюришди. Юқори мартабали меҳмонлар лойиҳа ташаббускори Озод Қурбонбоев билан учрашиб, лойиҳа бўйича ўз тавсияларини бердилар.

Элчилар масъулияти чекланган жамияти шаклидаги “Amudaryotex” хорижий корхонасига ташриф буюришиб, корхонанинг фаолияти билан яқиндан танишдилар. Корхона раҳбари Бозорбой Сапарбаев томонидан истиқолда белгиланган лойиҳалар ҳамда амалга оширилаётган ишлар тўғрисида батафсил маълумотлар берилди.

Ташриф давомида Ўзбекистоннинг хорижий давлатлардаги элчилари билан Амударё туманига инвестиция жалб қилиш ва ҳудуднинг экспорт салоҳиятини ошириш бўйича мунтазам алоқа ўрнатилиши қайд этиб ўтилди.

Туман ҳокимлигининг ахборот хизмати.