ОЛИЙ МАЖЛИС ҚОНУНЧИЛИК ПАЛАТАСИ ДЕПУТАТЛАРИ САЙЛОВЧИЛАРИ БИЛАН УЧРАШДИ

Ўзбекистон “Миллий тикланиш” демократик партиясидан Ўзбекистон Республикаси Олий Мажлиси Қонунчилик палатасига 4-Амударё сайлов округидан сайланган депутат Зумрад Бектова, 1-Нукус сайлов округидан сайланган депутат Руслан Жумамуродовлар сайловчилар билан учрашиб, юзма-юз мулоқот қилиш, ҳаётидаги муаммоларини ўрганиб, турмуши сифатини оширишга ҳисса қўшиш мақсадида туманимизга ташриф буюрдилар.

Дастлабки учрашув 17 декабрь куни 82-сонли мактабнинг фаоллар залида бўлиб ўтди. Учрашув йиғилишини туман ҳокими Султонбой Йўлдошев очди ва олиб борди. У ўз сўзида Олий Мажлис Қонунчилик палатаси Регламентига мувофиқ 15-20 декабрь кунлари депутатларнинг сайловчилар билан учрашув даври қилиб белгиланганлигини, шунга мувофиқ депутатлар Зумрад Бекатова, Руслан Жумамуродовлар ҳам ўз сайловчилари билан учрашиш, Қонунчилик палатасининг қонун ижодкорлиги ва назорат фаолияти, сиёсий партиялар фракцияларининг  фаолияти, сайловолди дастурларида кўтарилган масалаларнинг бажарилиш ҳолати юзасидан аҳолини хабардор қилиш учун туманимизга ташриф буюрганини маълум қилди.

Учрашув йиғилишида Олий Мажлис Қонунчилик палатаси депутатлари сўзга чиқиб, қуйи палатанинг жорий йилдаги фаолияти, мамлакатни ижтимоий-иқтисодий жиҳатдан янада ривожлантириш, фуқаролар ҳуқуқ ва эркинликлари ҳамда қонуний манфаатларининг мустаҳкам кафолатини таъминлаш борасида амалга оширилаётган ишлари хусусида батафсил маъруза қилдилар.

Оммавий учрашувдан сўнг, депутатлар Зумрад Бекатова, Руслан Жумамуродовлар сайловчилар билан якка қабул ҳам ўтказиб, мурожаатларини тингладилар.

Шуниси эътиборлики, учрашув йиғилишида  билдирилган мурожаатларнинг айримлари жойида ҳал этилди, айримлари тегишли корхона-ташкилотларга кўриб чиқиш ва ҳал этиш юборилиб, ижроси назоратга олинди.

Шу куни Олий Мажлис Қонунчилик палатасига 4-Амударё сайлов округидан сайланган депутат Зумрад Бекатова Қиличбой овулидаги сайловчилари билан ҳам учрашди. Учрашув Қиличбой Маданият марказида бўлиб ўтди ва уни туман Маҳалла ва оилани қўллаб-қувватлаш бўлими бошлиғи Алишер Йўлдошев очди ва олиб борди.

Депутат Зумрад Бекатова Олий Мажлис Қонунчилик палатасининг фаолияти ҳақида қисқача тўхталиб ўтди. Хусусан, Қонунчилик палатаси пандемия шароитида ҳам фуқароларнинг ҳуқуқ ва эркинликларини таъминлаш ва ҳимоя қилишни яхшилашга қаратилган қонунларни қабул қилишни давом эттирди. Шундай қонунларнинг ичида “прописка” масаласига тааллуқли қонун алоҳида аҳамият касб этади. Бу қонун қабул қилиниши муносабати билан фуқароларининг пойтахт минтақасида доимий рўйхатга олиш тартиб-таомиллари либераллаштирилди ҳамда уларнинг эркин кўчиб юриш ҳуқуқлари кафолатлари оширилди. Эр-хотинга улар никоҳдан ўтган куннинг ўзида яшаш жойи бўйича доимий рўйхатга қўйиш ҳуқуқи берилди, “прописка” сўзининг ўрнига “рўйхатга олиш” сўзи амалиётга киритилди.

Суд-ҳуқуқ тизимини янада ислоҳ этиш ишлари давом эттирилиб, процессуал кодексларга ўзгартириш ва қўшимчалар киритилди. Бу ўзгаришлар жамиятнинг одил судловга бўлган ишончини мустаҳкамлаш, шунингдек, халқаро стандартлар нормаларини миллий қонунчиликка жорий қилишга қаратилганлиги таъкидланди. Сайловчилар депутатларга Амударё туманига ҳам экологик коэффицент қўшиш лозимлиги, аёлларнинг пенсияга чиқиш ёшини қисқартириш, мактабларда рус тилини ўқитишга эътиборни кучайтириш бўйича таклифлар билдирдилар.

Учрашув йиғилишида депутатга йўлларни таъмирлаш, интернет алоқасини яхшилаш, электр энергияси таъминотини яхшилаш юзасидан мурожаатлар қилинди.

Учрашув жонли мулоқот ва самимий руҳда  ўтди.

О.РАЖАБОВА.