ЎЗБЕКИСТОННИНГ ДАВЛАТ БАЙРОҒИ ҚАБУЛ ҚИЛИНГАН КУН МУНОСАБАТИ БИЛАН ТАДБИРЛАР ЎТКАЗИЛДИ

Ўзбекистоннинг давлат рамзи бўлган байроғимиз қабул қилинган 18 ноябрь санаси ҳар йили байрам сифатида кенг нишонлаб келинади. Таълим-тарбия масканларида ўқувчи ёшларимизни истиқлолнинг қадрига етиш, давлат размларига нисбатан ҳурмат туйғусини шакллантириш, ёшларни миллий ва умуминсоний қадриятларга ҳурмат руҳида тарбиялашга йўналтирилган турли тадбирлар ташкил қилинади.

Туман ХТБга қарашли 82-сонли умумтаълим мактабида 18 ноябрь куни ўтказилган маънавий-марифий тадбир ҳам шу мақсадларни амалга оширишга хизмат қилди. Тадбирда давлат рамзлари ҳар бир юртнинг дунёда борлигини намоён этувчи белги эканлиги, рамзларнинг мамлакатнинг дунё сиёсий ҳаётидаги ўрнини белгилашдаги аҳамияти хусусида сўз юритилди.

Шунингдек, Ўзбекистон байроғи фақатгина Ўзбекистон Республикаси давлат рамзи эмас, у шу юртда туғилиб, шу заминда яшаётган барча эл-элатларнинг тинчлик ва аҳиллик тимсоли эканлиги, қалбларни қалбларга яқинлаштирадиган, дилларни дилларга улайдиган воситага айланганлиги, дунёнинг қайси бурчагида бўлманг, бу байроқ қадрдон она Ватанни ёдга солиши алоҳида таъкидланди.

“Байроғим – ифтихорим” дея номланган мазкур тадбирда мактабнинг 6-7-8-синфлар ўқувчилари фаол иштирок этдилар. Ўқувчилар томонидан давлат рамзларқри, мустақиллик, ватан ҳақида ажойиб шеърлар айтилди. Истиқлолни, Ватанни, тинчликни мадҳ этувчи куй-қўшиқлар янгради.

Ушбу сана муносабати билан ташкил қилинган тадбир доирасида мактаб ўқувчилари ўртасида “Иншолар танлови”, “Расмлар танлови”, “Баҳр-у байт” каби беллашувлар ўтказилди. Мазкур беллашувларда ўқувчилар ўзларининг иқтидор ва қобилиятларини намойиш этдилар ҳамда билимларини синовдан ўтказдилар.  Танловларда ўқувчиларнинг иштироклари муносиб баҳоланиб, ғолиб ва совриндорлар тақдирландилар. Хусусан, “Иншолар танлови” бўйича фахрли биринчи ўринни 7-”А” синф ўқувчиси Ирода Эрдошева, иккинчи ўринни 6-“А” синф ўқувчиси Суҳроб Рустамов, учинчи ўринни 8-“А” синф ўқувчиси Гулнура Жанузаковалар эгалладилар.

Шунингдек, “Расмлар танлови” бўйича биринчи ўрин 7-“А” синф ўқувчиси Камрон Мамбатсолиевга, “Баҳр-у байт” беллашувида ғолиблик 8-“А” синф ўқувчиси Руҳшона Адамбоевага насиб қилди. Ғолиблар мактаб маъмурияти томонидан фахрий ёрлиқ ҳамда эсдалик совғалари билан тақдирландилар.

Шу ўринда айтиш керакки, туманимизда билимга чанқоқ, интилувчан, иқтидорли, китоб ўқишга меҳри баланд бўлган ўқувчи ёшларимиз жуда кўпчиликни ташкил қилади. Айниқса, ёшларимизнинг китоб ўқишга бўлган қизиқишлари кундан кунга ортиб бормоқда. Китобсевар ёшларимиз дарсдан бўш вақтларини китоб мутолаа қилишга сарфламоқдалар.

Ёшлар орасида китобхонликни кенг тарғиб қилиш мақсадида ташкил қилинаётган барча танловларда туманимиз ёшлари ҳам фаол иштирок этиб келмоқдалар. Хусусан, “Доно” нашриёти томонидан ўтказилган китобхонлик танловида туман ХТБга қарашли 76-сонли умумтаълим мактабининг китобсевар ўқувчиларидан иборат “Аму ёшлари” гуруҳи фаол қатнашдилар. Узоқ ва муросасиз бахсларда “Аму ёшлари” жамоаси ўзларининг бадиий адабиётга бўлган қизиқишларини, адабий асарлардан олган билимларини тўла намоён этдилар ҳамда танловнинг Қорақалпоғистон Республикаси босқичида фахрли 2-ўринни эгалладилар. Туманимиз китобсевар ёшларининг қўлга киритган ютуқлари бир қанча қизиқарли китоблар жамланмаси билан рағбатлантирилди.

18 ноябрь – Ўзбекистон байроғи қабул қилинган кун муносабати билан мактабда ташкил қилинган “Байроғимиз – фахримиз” номли тадбирда ғолибликни қўлга киритган “Аму ёшлари” жамоаси туман ХТБ томонидан ажойиб китоблар ва эсдалик совғалари билан тақдирландилар. Туман ХТБнинг Маънавий-ахлоқий тарбия ва болаларнинг ижтимоий ҳимояси шўъба раҳбари Зафар Абдуллаев ўқувчиларни байроғимиз қабул қилинган сана ҳам совриндорлик билан самимий табриклади. Шунингдек, ўқувчиларни китобхонлик танловига муносиб тайёргарлик кўришда ўз ҳиссасини қўшган Нусрат Камоловга миннатдорчилик билдирди.

Фурсатдан фойдаланиб, барча ҳамюртларимизни байроғимиз қабул қилинган кун билан табриклаймиз. Она юртимиздаги тинчлик ва осудалик ҳеч қачон бизни тарк этмасин, байроғимиз баланд-баландларда Ўзбекистон деб аталмиш жаннатмакон юрт шаъни, шон-у шавкатидан дарак бериб ҳилпирайверсин!

Чарос Арслонова, туман ҳокимлигининг Ахборот хизмати раҳбари.