ҚИШЛОҚ ХЎЖАЛИГИНИ РИВОЖЛАНТИРИШГА БАҒИШЛАНГАН КЎРГАЗМАЛИ СЕМИНАР ЎТКАЗИЛДИ
Мамлакатимизда қишлоқ хўжалигини ривожлантиришга қаратилаётган эътибор соҳада амалга оширилаётган ислоҳотларда ўз ифодасини топмоқда. Айниқса, тармоқлар бўйича жаҳон андозаларига мос инновацион лойиҳаларни татбиқ этиш, қишлоқ хўжалик кластерларини ривожлантириш, чорвачилик ва мева-сабзавотчилик йўналишларида кооперативлар ташкил этиш, пировардида аграр соҳани қишлоқ хўжалик маҳсулотларини етиштирувчи – ишлаб чиқарувчи – қайта ишловчи тизимга айлантириш борасида кенг қамровли ишлар амалга оширилмоқда. Бунда тўртта сектор кесимида соҳа тараққиётини жадаллаштириш бўйича белгиланган режавий тадбирлар асосидаги ўқув-семинарлари ҳамда кўргазмали семинарлар муҳим аҳамиятга эга.
Жорий йилнинг 17 ноябрь санасида туманимизда қишлоқ хўжалиги ва чорвачилик соҳасида амалга оширилаётган ислоҳотлар ҳамда соҳани ривожлантиришга қаратилган асосий вазифаларга бағишланган кўргазмали семинар ўтказилди. Кўргазмали семинар ишида туманимиздаги тўртта сектор раҳбарлари, қишлоқ ва сув хўжалиги масалалари бўйича туман ҳокимининг ўринбосарлари, туман қишлоқ хўжалиги бўлими, сув хўжалиги бўлими ва тижорат банклари раҳбарлари, барча фермер хўжаликлари, кластер корхоналари раҳбарлари ҳамда кўргазмали семинар кун тартибидаги масалага алоқадор тегишли ташкилотлар раҳбарлари иштирок этдилар.
Кун тартибидаги асосий масалани иштирокчиларга тўлиқ етказиш мақсадида ушбу кўргазмали семинар кўчма равишда ўтказилди. Аввало иштирокчиларга туман қишлоқ хўжалиги корхоналари томонидан кузги-қишги дала ишларини самарали ташкил этиш бўйича амалга оширилиши лозим бўлган муҳим ва долзарб вазифалар юзасидан соҳа масъуллари зарур тавсиялар бердилар. Шундан сўнг, Манғит ММТП ҳудудидаги “Расулов Эркин асалчи” фермер хўжалигида экинларни томчилатиб суғориш тизимини жорий этиш мақсадида мазкур фермер хўжалиги далалари бошида ҳовуз-тиндиргичлар қуриш ишларининг ҳолати кўздан кечирилди. Шу баробарида экинларни томчилатиб суғориш технологиясининг афзалликлари, самарадорлиги ҳамда ишчи ва техника кучидан фойдаланишдаги тежамкорлик жиҳатлари кўргазмали воситалар орқали батафсил кўрсатиб берилди. Шу билан бирга томчилатиб суғориш орқали ҳосилдорликнинг ошиши, тежаладиган маблағ ва ишлаб чиқариш кучлари хусусида мутахассислар аниқ ҳисоб-китоблар бўйича маълумотлар беришди.
Кўргазмали семинар тумандаги Дўстлик ММТПда қизғин ва ишчанлик руҳида давом этди. ММТП ҳудудидаги Наврўзбек Болтабоев раҳбарлигидаги фермер хўжалигида семинар иштирокчиларига лазерли ер текислаш амалиёти, шунингдек, ушбу усулда текисланган ернинг сувни тежашдаги самараси махсус техника воситалари орқали кўрсатилди. Агар лазерли ер текислаш агрегатлари ёрдамида экин ерлари экишга тайёрланса, айниқса, баҳорги экиш мавсумида ерда намлик етарли даражада сақланиши ҳамда уруғнинг бехато униб чиқиши таъминланади. Айниқса, ғўза парваришида сувдан режали фойдаланиш имкони яратилади.
Кўргазмали семинарда қишлоқ хўжалиги техникаларини қиш мавсумида устахоналарга йиғиш ва таъмирлаш ишларини олиб бориш бўйича амалий тадбирлар ҳам намойиш этилди. Дўстлик ММТП устахонасида давом этган кўргазмали семинар қишлоқ хўжалик техникаларини ММТП устахонасига олиб келиб, тури ва русумига монанд сафга тизиш, камчиликларини аниқлаш, шу билан бирга таъмирлаш ишларини олиб бориш ишлари амалда кўрсатиб берилди.
Бўлиб ўтган кўргазмали семинар жараёнида фермер хўжаликлари раҳбарлари томонидан тушган соҳага оид саволларга масъул мутасаддилар томонидан жавоблар берилди. Мазкур кўргазмали семинар орқали иштирокчилар соҳада юз бераётган янгиликлар ва ўзгаришлардан хабардор бўлдилар, шу билан бирга ўзаро фикрлашиб, тажриба алмашдилар.
Робия ЙЎЛДОШЕВА.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
