Амударё туманида куз-қиш мавсумида истеъмолчиларни газ билан узлуксиз таъминлаш бўйича қандай ишлар амалга оширилди?

Бугунги кунда турмушимизни табиий газсиз тасаввур қилиш қийин. Яшаш хонадонларимизни иситишдан тортиб, кун давомида овқат, чой тайёрлашдаги аҳамиятини ҳеч нарсага қиёслаб бўлмайди. Шу боисдан ҳам “Ҳудудгаз Қорақалпоғистон” филиалининг “Амударётумангаз” газ таъминоти бўлими томонидан 2020-2021 йиллар куз-қиш мавсумида аҳоли хонадонларини табиий ва суюлтирилган газ билан бир маромда ва узлуксиз таъминлаш учун пухта тайёргарликлар олиб борилди. Корхона томонидан Амударё тумани туманимиз бўйича 13 минг 466 хонадон табиий газ билан таъминланиб келинмоқда.

Бугунги кунда фойдаланишда 407 километр газ тармоқлари мавжуд бўлиб, шунинг 53 километри юқори босимли, 65 километри ўрта босимли, 289 километри эса паст босимлидир. Мавжуд қувурларнинг 15,8 километр қисми ер остида, 392 километри эса ер устида жойлашган. Жами фойдаланишда 230 газ тақсимоти пунктлари бўлиб, шундан 26 та газ тақсимлаш пунктлари юқори босимли, 204 таси эса ўрта босимли ҳисобланади.

Ҳозирги кунда туманимиздаги мавжуд жами 39 минг 574 хонадоннинг 13 минг 466 таси табиий, 26 минг 108 таси эса суюлтирилган газ билан таъминланмоқда. 2020-2021 куз-қиш мавсумида истеъмолчиларни, 205 та улгуржи истеъмолчиларни табиий газ билан узлуксиз таъминлаш мақсадида филиалнинг “Авария тиклаш” хизмати тун-у кун фаолият юритмоқда.

Табиий газ таъминотида узилишлар бўлмаслиги учун режага мувофиқ жами 230 дона газ тақсимлаш қурилмаларининг барчаси тафтиш қилинди. Газ тақсимлаш қурилмаларини мукаммал таъмирлаш, газ қувурларини босим остида зичликка синаш, ер ости газ қувурларининг ҳолатини прибор усули билан текшириш режалари тўлиқ ва сифатли бажаралди. Газ қувурларини бўяш ишлари 178 фоизга бажарилди.

Шунингдек, Манғит шаҳрининг Гурлан кўчасидаги ўрта босимли 1,2 километр, Фаровон ва Олмазор маҳаллалари ҳудудларидаги юқори босимли 1,6 километр, Қипчоқ кўчасидаги ўрта босимли 1,2 километр газ тармоқлари таъмирланиб бўялди. Шу кунгача 504 хонадонга янги электрон газ ҳисоблагич ўрнатилди.

Туманимизнинг табиий газ етмаслиги туфайли суюлтирилган газдан фойдаланаётган 12 минг 786 та ва табиий газ тармоғи тортилмаган 13 минг 747 та хонадонларига суюлтирилган газ етказиб берилмоқда. Бунинг учун Холимбег сервис маркази, Куюк кўпир, Қипчоқ, Оқ олтин, Қангли, Бўзёп, Дўрман овулларидаги шохобчалар, филиал марказий омборхонаси аҳолини узлуксиз суюлтирилган газ билан таъминлаётир.

Мазкур шохобчаларга узоқ бўлган ҳудудлар – Тошқалъа, Юқори қишлоқ, Бешовул, Хизр эли, Чойкўл, Жумуртов, Қорамон, Тўлқин, Босув, Ўрта қалъа, Арна бўйи, Амир Темур номли, Назархон каби овул ва маҳаллалар аҳолисига эса махсус автомашиналарда суюлтирилган газ баллонлари етказилмоқда.

Аҳолига шу йилнинг 13 октябрь ҳолатига 2 минг 775 тонна суюлтирилган газ етказилди. Жорий йил учун белгиланган лимит эса 3 минг 748 тоннадир. Ҳозирги кунда аҳолига жами ижарага тарқатилаётган 27 минг 53 дона маиший газ баллонларининг 595 таси жорий йилда янгидан олиниб, фойдаланишга берилмоқда.

Амалга оширилган бунингдек, кенг кўламли ишлар натижасида яқинлашиб келаётган куз-қиш мавсумида истеъмолчиларга узлуксиз табиий ва суюлтирилган газ етказиб берилиши таъминланади.

Ойгул Ражабова