Ўзбекистон Фермер, деҳқон хўжаликлари ва томорқа ер эгалари Кенгаши раиси А.Ҳайитов Амударё туманида бўлди

19 сентябрь куни Ўзбекистон Фермер, деҳқон хўжаликлари ва томорқа ер эгалари Кенгаши раиси Актам Ҳайитов туманимизда бўлиб аҳоли томорқаларидан самарали фойдаланишни ташкил этиш бўйича амалга оширилаётган ишлар билан танишиш мақсадида Амударё туманига ташриф буюрди.

Амударё туманида ҳар йили аҳоли томорқасидан унумли фойдаланиш мақсадида эрта баҳорданоқ серҳосил уруғлик навларини танлаш, боғ-роғлар барпо этишда мевали дарахт кўчатларини саралаш ва экиш ишларига алоҳида аҳамият қаратилади. Жорий йилда ҳам томорқа экинларидан юқори ҳосил олишни кўзлаган томорқа ер эгалари астойдил меҳнат қилиб, туман фермер, деҳқон хўжаликлари ва томорқа ер эгалари Кенгаши томонидан берилган тавсиялар асосида экин экиб, “Ҳар бир қарич ер бўш қолмасин!” шиори остида томорқани даромад манбаига айлантирдилар.

Туманимизда ердан унумли фойдаланиб, бу борада катта натижаларни қўлга киритаётган, юқори ҳосил ва мўл даромад олаётган омилкор деҳқонлар тажрибасини ўрганиш, томорқа майдонларига бозорбоп экинлар экилишини ташкил қилиш, бу йилги мураккаб вазиятни ҳисобга олган ҳолда томорқада 2-3 марта ҳосил етиштириш, хонадонларда ихчам иссиқхоналар қуриш, бир вақтнинг ўзида томорқа хўжалигида нафақат деҳқончилик, асаларичилик ва хонадон чорвачилиги каби ёндош соҳаларни ҳам ривожлантириш бўйича олиб борилаётган ишлар эътиборга молик. Бугунги кунда амударёлик томорқачилар нафақат туманимиз, балки қўшни туманлар аҳолиси учун ҳам мўл-кўл деҳқончилик маҳсулотлари етказиб беришмоқда.

Жорий йилнинг 19 сентябрь санасида Ўзбекистон Фермер, деҳқон хўжаликлари ва томорқа ер эгалари Кенгаши раиси Актам Ҳайитов туманимизда бўлди. Меҳмон аҳоли томорқаларидан самарали фойдаланишни ташкил этиш масаласида “Амударё томорқа хизмат” масъулияти чекланган жамияти фаолиятини кўздан кечирди.

Хусусан, аҳоли томорқаларида ихчам иссиқхоналар қуриш, оила чорваси, айниқса, асаларичилик ва паррандачиликни ривожлантириш мақсадида банк кредитларини ажратиш, ажратилган кредитлардан мақсадли фойдаланиш ҳолатлари ўрганилди.

Ўзбекистон фермер, деҳқон хўжаликлари ва томорқа ер эгаларини қўллаб-қувватлаш жамғармаси директори Тўлқин Сатторов, Қорақалпоғистон Республикаси Фермер, деҳқон ва томорқа ер эгалари Кенгаши раиси Қуаниш Нуримбетов, туман ҳокими Султонбой Йўлдашев ҳамда туман Фермер, деҳқон хўжаликлари ва томорқа ер эгалари Кенгаши раиси Илҳом Полвоновлар ҳамроҳлигида меҳмонлар “Ўрта қалъа чорвадори” агрофирмаси фаолияти билан яқиндан танишди.

Агрофирма раҳбари Эркин Расулов ўтган 2019 йилда 1 млрд 200 млн сўмлик банк кредити, Фермер, деҳқон хўжаликлари ва томорқа ер эгаларини қўллаб-қувватлаш жамғармаси маблағлари ҳисобидан асаларичилик тармоғини йўлга қўйди. Актам Ҳайитов агрофирмада амалга оширилаётган ишлар билан танишар экан, агрофирма раҳбарияти ва ишчилари эришаётган ютуқлар, аҳоли дастурхонига етиштириб берилаётган асал маҳсулотларининг сифатига юқори баҳо берди. Эркин Расулов кредит маблағларидан самарали фойдаланиш эвазига фақат 2020 йил мавсумида 2 тоннадан ортиқ юқори сифатли асал етиштириб, 90 млн сўм соф фойда кўрди. Шунингдек тадбиркор асаларичилик тармоғини ташкил этишни режалаштирган томорқа ер эгаларига шартнома асосида 655 қути асалари уяларини етказиб берди.

Актам Ҳайитов агрофирма ишчилари учун ажратилган шарт-шароитлар, уларнинг ойлик иш ҳақлари даражаси ҳам яхши эканлигини қайд этар экан амударёлик қишлоқ хўжалиги тадбиркорларининг ишларини оммалаштириш, айниқса асаларичиликни янада истиқболли соҳага айлантиришда ёшларнинг фаол иштирокини таъминлаш юзасидан масъулларга зарур тавсиялар берди.

Робия Йўлдошева.