АМУДАРЁЛИК ФЕРМЕРЛАР ЭККАН КУЗГИ БУҒДОЙ ТЕКИС УНИБ ЧИҚМОҚДА

2021 йил ҳосили учун Амударё туманида 330 та фермер хўжаликларининг жами 3800 гектар майдонида (шундан 1832,5 гектари ғўза қатор ораларига, 1517,5 гектари ғалладан бўшаган майдонларга) кузги буғдой экиш режалаштирилган. Бунинг учун аввалдан 11 та фермер хўжаликларида 233,1 гектар майдонга серҳосил уруғлик ғалла экилиб, 2021 йил ҳосили учун 700 тонна сифатли уруғлик дон тайёрлангани айни кунлардаги кузги буғдой экиш мавсумининг маромида олиб борилишини таъминламоқда.

Экиш мавсумини қисқа муддатларда ўтказиш мақсадида ғаллани экиш бўйича жадвал ишлаб чиқилиб, 18 та отряд ташкил этилди. Унга кўра, экиш ишларида қатнашадиган 18 та юқори унумли сурим техникалари ва 34 та занжирли сурим техникалари, 2 та ғалла экиш сеялкаси, 60 та чизель, 42 та культиватор агрегатлари, 50 та ер тайёрлаш механизмлари, 50 та ер текисловчи, 16 та ўғит сепувчи агрегатлар, 21 та эгат олгич мосламалар экиш отрядларига бириктирилиб, таъмирлаш-созлаш ишлари ўз вақтида якунланди.

Жорий йил ғалла экиш мавсуми учун зарур бўлган 950 тонна уруғлик заҳираси яратилиб, фосфорли ва калийли минерал ўғитлар ғамлангани экиш ишларининг сифатли ўтказилишида муҳим омил бўлмоқда. Жорий йилнинг 17 сентябрь ҳолатига тумандаги ғаллачилик фермер хўжаликлари томонидан 2550 гектар ер экишга тайёрланиб, 2277 гектар майдонга кузги буғдой экилди.

Чойкўл овули ҳудудидаги “Эгамбергенова Одина” фермер хўжалигида ҳар йили ғалладан юқори ҳосил етиштирилади. Фермер хўжалиги раҳбари Бегзод Сапаровнинг тадбиркорлиги, ишнинг  кўзини билиши хўжаликнинг ушбу тармоғини мўл-кўл даромад манбаига айлантириш имконини бермоқда.

2021 йил ҳосили учун жорий йилда 11,5 гектар майдонга ғалла экилиб, ғалла майдонлари 10 нафар пудратчига бўлиб берилди. Айни кунларда бир текис униб чиқаётган буғдой майсаларини зараркунанда ҳашаротлардан ҳимоя қилиш мақсадида гирбицидлар билан ишлов бериш, кузги агротехник тадбирларни сифатли ўтказишга алоҳида аҳамият қаратилмоқда. Ғалладан 35 тонна ҳосил олишни режалаштирган пудратчи ва  ишчилар ғалла экилган майдонлар бошига маҳаллий ўғит жамғариш, сув йўлларини тартибга келтириш ишларини уюшқоқлик билан олиб боришмоқда.

Азимбек Холимбетов раҳбарлик қилаётган “Манғит боғбони” фермер хўжалиги кузги буғдой экиш режасини туманда биринчилардан бўлиб якунлади. Хўжалик ғаллакорлари 17 гектар ердан 51 тонна ҳосил олишни ният қилишган.

“Адил Яримбетов” фермер хўжалигида ҳам 30 гектар майдонга кузги дон экилди. Сифатли уруғлик танлангани, экишлик ерлар маромида текисланиб, уруғ вақтида ерга тушгани ўз самарасини берди.

2021 йилги ғалла хирмонини 90 тоннага етказишни режалаштирган Нураддин Каримов раҳбарлигидаги хўжалик ғалла майдонларида 30 нафар пудратчи ва 15 нафар ишчилар аҳиллик билан меҳнат қилишади.

Мазкур хўжаликда ҳам бир текис униб чиқаётган буғдойзорларда айни кунларда кузги агротехник тадбирлар амалга оширилмоқда.

Робия ЙЎЛДОШЕВА.