AMUDARYoLIK FERMERLAR EKKAN KUZGI BUGʻDOY TEKIS UNIB ChIQMOQDA

2021-yil hosili uchun Amudaryo tumanida 330 ta fermer xoʻjaliklarining jami 3800 gektar maydonida (shundan 1832,5 gektari gʻoʻza qator oralariga, 1517,5 gektari gʻalladan boʻshagan maydonlarga) kuzgi bugʻdoy ekish rejalashtirilgan. Buning uchun avvaldan 11 ta fermer xoʻjaliklarida 233,1 gektar maydonga serhosil urugʻlik gʻalla ekilib, 2021-yil hosili uchun 700 tonna sifatli urugʻlik don tayyorlangani ayni kunlardagi kuzgi bugʻdoy ekish mavsumining maromida olib borilishini taʼminlamoqda.

Ekish mavsumini qisqa muddatlarda oʻtkazish maqsadida gʻallani ekish boʻyicha jadval ishlab chiqilib, 18 ta otryad tashkil etildi. Unga koʻra, ekish ishlarida qatnashadigan 18 ta yuqori unumli surim texnikalari va 34 ta zanjirli surim texnikalari, 2 ta gʻalla ekish seyalkasi, 60 ta chizel, 42 ta kultivator agregatlari, 50 ta yer tayyorlash mexanizmlari, 50 ta yer tekislovchi, 16 ta oʻgʻit sepuvchi agregatlar, 21 ta egat olgich moslamalar ekish otryadlariga biriktirilib, taʼmirlash-sozlash ishlari oʻz vaqtida yakunlandi.

Joriy yil gʻalla ekish mavsumi uchun zarur boʻlgan 950 tonna urugʻlik zahirasi yaratilib, fosforli va kaliyli mineral oʻgʻitlar gʻamlangani ekish ishlarining sifatli oʻtkazilishida muhim omil boʻlmoqda. Joriy yilning 17-sentyabr holatiga tumandagi gʻallachilik fermer xoʻjaliklari tomonidan 2550 gektar yer ekishga tayyorlanib, 2277 gektar maydonga kuzgi bugʻdoy ekildi.

Choykoʻl ovuli hududidagi “Egambergenova Odina” fermer xoʻjaligida har yili gʻalladan yuqori hosil yetishtiriladi. Fermer xoʻjaligi rahbari Begzod Saparovning tadbirkorligi, ishning  koʻzini bilishi xoʻjalikning ushbu tarmogʻini moʻl-koʻl daromad manbaiga aylantirish imkonini bermoqda.

2021-yil hosili uchun joriy yilda 11,5 gektar maydonga gʻalla ekilib, gʻalla maydonlari 10 nafar pudratchiga boʻlib berildi. Ayni kunlarda bir tekis unib chiqayotgan bugʻdoy maysalarini zararkunanda hasharotlardan himoya qilish maqsadida girbitsidlar bilan ishlov berish, kuzgi agrotexnik tadbirlarni sifatli oʻtkazishga alohida ahamiyat qaratilmoqda. Gʻalladan 35 tonna hosil olishni rejalashtirgan pudratchi va  ishchilar gʻalla ekilgan maydonlar boshiga mahalliy oʻgʻit jamgʻarish, suv yoʻllarini tartibga keltirish ishlarini uyushqoqlik bilan olib borishmoqda.

Azimbek Xolimbetov rahbarlik qilayotgan “Mangʻit bogʻboni” fermer xoʻjaligi kuzgi bugʻdoy ekish rejasini tumanda birinchilardan boʻlib yakunladi. Xoʻjalik gʻallakorlari 17 gektar yerdan 51 tonna hosil olishni niyat qilishgan.

“Adil Yarimbetov” fermer xoʻjaligida ham 30 gektar maydonga kuzgi don ekildi. Sifatli urugʻlik tanlangani, ekishlik yerlar maromida tekislanib, urugʻ vaqtida yerga tushgani oʻz samarasini berdi.

2021-yilgi gʻalla xirmonini 90 tonnaga yetkazishni rejalashtirgan Nuraddin Karimov rahbarligidagi xoʻjalik gʻalla maydonlarida 30 nafar pudratchi va 15 nafar ishchilar ahillik bilan mehnat qilishadi.

Mazkur xoʻjalikda ham bir tekis unib chiqayotgan bugʻdoyzorlarda ayni kunlarda kuzgi agrotexnik tadbirlar amalga oshirilmoqda.

Robiya YOʻLDOShEVA.