Халқ депутатлари Aмударё туман кенгашининг 13-сессияси тўғрисида ахборот

Жорий йилнинг 27 август санасида Халқ депутатлари Aмударё туман кенгашининг 13-сессияси бўлиб ўтди. Сессия мажлиси Ўзбекистон Республикаси Президенти Шавкат Мирзиёевнинг жорий йил 20 август куни ўтказилган видеоселектор йиғилишида белгилаб берган вазифалар ижросини таъминлаш юзасидан ташкил қилинди.

Сессияда Ўзбекистон Республикаси Олий Мажлиси Сенатининг Суд-ҳуқуқ масалалари ва коррупцияга қарши курашиш қўмитаси раиси Батир Матмуратов, Қорақалпоғистон Республикаси Жўқорғи Кенгеси қўмитаси раиси Шукурулла Атаниязов ва тумандан сайланган Қорақалпоғистон Республикаси Жўқорғи Кенгеси депутатлари, шунингдек, Халқ депутатлари туман Кенгашининг депутатлари, туман ҳокими ўринбосарлари, ҳокимлик масъул ходимлари, ҳуқуқ-тартибот органлари, бўлимлар раҳбарлари ҳамда оммавий ахборот воситалари вакиллари иштирок қилдилар. Сессия ишини туман ҳокими Султонбой Йўлдашев очди ҳамда олиб борди.

Сессияда Ўзбекистон Республикаси Олий Мажлиси Сенатининг Суд-ҳуқуқ масалалари ва коррупцияга қарши курашиш қўмитаси раиси Батир Матмуратов сўзга чиқиб, карантин талаблари юмшатилгани туфайли мамлакатимизда иқтисодий фаоллик оша бошлагани, савдо, ишлаб чиқариш, хизмат кўрсатиш ва бошқа соҳалардаги тадбиркорлик фаолияти тикланиб, даромадларни кўпайтиришга имконият пайдо бўлганлиги, мамлакатда “Яширин иқтисодиёт”ни қисқартириш ва шу орқали қўшимча захираларни шакллантириш зарурлиги, бундай қўшимча захиралар аҳолининг эҳтиёжманд қатламини қўллаб-қувватлаш учун муҳим манба бўлишини алоҳида таъкидлади. 

Шундан сўнг сессия мажлиси кун тартибидаги масалалар муҳокамасига ўтилди. Сессия кун тартибидан аҳолининг эҳтиёжманд қатламини қўллаб-қувватлаш, тадбиркорликни ривожлантириш, бюджет даромадларини ошириш ва хорижда меҳнат қилган ишсиз фуқароларни ишга жойлаштириш борасида амалга оширилаётган ишлар тўғрисидаги масалалар ўрин олди.

Дастлаб кун тартибидаги масала юзасидан туман ҳокимининг молия-иқтисодиёт ва камбағалликни қисқартириш масалалари бўйича биринчи ўринбосари Маъмуржон Темирбаевнинг ҳисоботи тингланди. Ҳоким ўринбосарининг ҳисоботида туман ахолисининг ўзини ўзи банд қилиши мақсадида  тижорат банклари томонидан “Хар бир оила тадбиркор” дастури доирасида имтиёзли кредитлар ажратилаётгани ва уларнинг мақсадли фойдаланилаётганлиги хусусида мониторинг ишлари олиб борилаётгани қайд этиб ўтилди.

Таъкидланганидек, туманда пандемия шароитида 1234 та оилалар “темир дафтарга” киритилиб, тумандаги саховатпеша тадбиркорлар ва мутасадди ташкилотлар томонидан олиб борилган ишлар натижасида, 109 та оилага қорамол, 4 та оилага қўй-эчкилар, 13 та оилага парранда, 5 та оилага асалари қутилари, 135 та оилага ихчам иссиқхоналар берилган, шунингдек, 615 нафар ишсиз фуқаролар ва 445 та даромадсиз қолган оилалардаги ишсиз фуқароларнинг бандлиги таъминланиши натижасида 446 та оилалар эҳтиёжманд оилалар рўҳатидан чиқарилган бўлиб, жами 891 та оилалар “темир дафтар”дан чиқарилган. Қолган 343 та оилалар йил якунига қадар чиқариш чоралари кўрилмоқда.

Шундан сўнг мазкур масалалар бўйича туман Давлат солиқ инспекцияси бошлиғи Айдос Сеитовнинг ҳисоботи тингланди.Ҳисоботда Амударё туманида бюджет даромадларини ошириш борасида салмоқли ишлар олиб борилаётгани қайд этилиб,  жорий йилнинг 8 ойи учун бюджет тушумлари режаси 53,7 млрд. сўм бўлиб, режа 86,0 фоизга бажарилганлиги, “Коронавирус пандемиясининг салбий таъсирини камайтириш учун аҳоли, тадбиркорлик субъектлари, умумий овқатланиш, савдо ва хизматлар соҳасини қўллаб-қувватлашнинг қўшимча чора-тадбирлари тўғрисида”ги Президент Фармони ижросини таъминлаш мақсадида тумандаги микрофирма ва кичик корхоналарнинг 206 тасига ер ва мол-мулк солиқларидан 1,2 млрд сўм миқдорида имтиёзлар берилганлиги тўғрисида маълумотлар келтирилди.

Кун тартибидаги масалалар бўйича туман Аҳоли бандлигига кўмаклашиш маркази директори ўринбосари Фарход Ахмедовнинг ҳисоботида туманда жорий йилнинг шу даврига қадар вактинчалик меҳнат фаолиятини чет элда амалга ошираётган фуқаролар сони 5 698 нафарни ташкил қилиб, шулардан август ҳолатига 1 419 нафар фуқаролар қайтиб келганлиги, улардан 735 нафари иш билан таъминланганлиги хусусида маълумот берилди.

Шунингдек, пандемия даврида чартер рейс орқали туманимизга 25 нафар фуқаро қайтиб келган бўлиб, улардан 4 нафари ҳақ тўланадиган жамоат ишларида, 11 нафари мустақил равишда ишга жойлашгани, 10 нафари эса норасмий секторда банд эканлиги қайд этилди.

Сессияда кун тaртибидаги масалалар хусусида Қорақалпоғистон Республикаси Жўқорғи Кенгеси қўмитаси раиси Шукурулла Атаниязов нутқ сўзлади. У ўз сўзида “Хорижда вақтинчалик меҳнат фаолиятини амалга ошираётган фуқароларни ва уларнинг оила аъзоларини ҳимоя қилиш кафолатларини янада кучайтириш чоралари тўғрисида”ги Президент фармонининг ижросини таъминлаш борасида қилиниши лозим бўлган ишлар хусусида тўхталди.

Сессия ишидаги масалалар муҳокамасида Маҳалла ва оилани қўллаб-қувватлаш бўлими бошлиғининг ўринбосари, туман Кенгаши депутати Баҳадир Балтабаев ва "Тараққиёт кўзгуси" газетаси ҳамда "Амударё телевидениеси" бош муҳаррири, туман Кенгаши депутати Ғуломжан Ешниёзовлар ўз фикр-мулоҳазаларини билдирдилар.

Халқ депутатлари туман кенгаши раиси, туман ҳокими С.Йўлдашев сўзга чиқиб, аҳолининг эҳтиёжманд қатламини қўллаб-қувватлаш, тадбиркорликни ривожлантириш, бюджет даромадларини ошириш ва хорижда меҳнат қилган ишсиз фуқароларни ишга жойлаштириш борасида тегишли чора-тадбирлар белгиланганлигини ҳамда бу бўйича тизимли ишлар амалга оширилаётганлигини маълум қилди. Ушбу вазифаларнинг ижроси бўйича мутасаддиларга зарур топшириқ ва тавсиялар берилди.

Шунингдек, тумандаги секторлар раҳбарлари сўзга чақиб, мамлакатимиз иқтисодиётини янада ривожлантириш ҳамда аҳолининг турмуш фаровонлигини ошириш борасида секторлар кесимида ҳам зарур чора-тадбирлар амалга оширилишини таъкидлаб ўтдилар.

Сессияда кун тартибидаги масала бўйича тегишли қарор қабул қилинди. Шунинг билан сессия ўз ишини якунлади.

Туман ҳокимлигининг Ахборот хизмати.