Ишсиз, ижтимоий ҳимояга муҳтож фуқаролар ишга жойлаштирилмоқда

Мамлакатимизда қарийб олти ойдан бери давом этаётган коронавирус пандемияси туфайли даромадидан айрилган, иқтисодий ночор аҳволга тушиб қолган ёшларнинг, аёл-қизларнинг бандлигини таъминлашга, ижтимоий ҳимоя қилишга алоҳида эътибор қаратилмоқда.

Туман Аҳоли бандлигига  кўмаклашиш маркази томонидан ишсиз, четга ишлашга кета олмаган ёки қайтиб келган фуқароларнинг бандлигини таъминлаш учун овул ва маҳаллалар фуқаролар йиғинлари ҳамкорлигида бўш иш ўринлари ҳақидаги хабарлар мунтазам равишда эълон қилиб борилмоқда. Шунингдек, маҳалла ва хонадонларга чиқиб ишлаш механизми жорий этилган. Жорий йилнинг январидан июль ойларигача бўлган давр оралиғида 1395 нафар аҳоли жамоат ишларига жалб қилинди ва уларнинг иш ҳақи тўлови жамғарма ҳисобидан тўлаб берилди.

Ободонлаштириш, кўкаламзорлаштириш, дарахтларни оқлаш, уларга ишлов бериш, ариқлар ҳамда ички йўлларни тозалаш, Ободонлаштириш бошқармаси ва “Тоза ҳудуд” корхонаси буюртмалари бўйича марказий кўчалар ва хиёбонларни тозалаш, кўкаламзорлаштириш, гул кўчатларини экиш ва парваришлаш, маиший чиқиндиларни тўплаш ҳамда олиб чиқиш каби ишларга пандемия сабабли ишсиз қолган фуқаролар жалб этилди.

Хусусан, янги ташкил этилган Хотира майдони ҳудудини ободонлаштириш ва кўкаламзорлаштиришга 50 нафар, Истироҳат боғига 70 нафар, Манғит шаҳри ичидаги пиёдалар йўлакчаларини тартибга келтириш ишларига 50 нафар, ногиронлиги бор, эҳтиёжманд оилалар ҳовли-жойини таъмирлашга 30 нафар фуқаро жалб қилинди.

Шунингдек, фермер хўжаликлари ва кластер корхоналарнинг буюртмасига кўра, дала ишларига 272 нафар фуқаролар ишга жойлаштирилди ва барчасининг ойлик маошлари ўз вақтида тўлаб берилди.

Карантин даврида ўрнатилган тартиб-қоидалар инобатга олинган ҳолда ноанъанавий ва ностандарт жамоат ишлари ҳам жорий этилди. Жумладан, Давлат  санитария-эпидемиология назорати маркази ходимларига қўшимча куч сифатида дизенфекциялаш ишларига кўмаклашиш учун 49 нафар вақтинча ишсиз фуқаролар, ички ишлар ва Миллий гвардия ходимларига амалий ёрдам кўрсатишга 20 нафар, блокпостларда хизмат кўрсатишга 10 нафар фуқаролар ишга олинди. Якка-ёлғиз, ўзгалар парваришига муҳтож инсонларни парваришлаш учун 40 нафар ўрта  тиббиёт ходимлари жалб қилинди.

Секторларда ўтказилган ўрганишлар давомида январ-июль ойларида “Темир дафтар”га киритилган 361 та кам таъминланган, эҳтиёжманд оилаларнинг ишсиз аъзоларнинг бандлигини таъминлаш, даромад топишига шароит яратиш мақсадида томорқасига енгил типдаги иссиқхоналар қуриш, экин экиш учун уруғ, кўчат харид қилиши, суғориш воситалари харид қилиши учун 776,9 млн. субсидия маблағлари берилди.

Шунингдек, жорий йилнинг биринчи чорагида 84 нафар ишсиз фуқаро касб-ҳунарга ўқитилиб, уларнинг ишга жойлашишига кўмак берилди. Йил бошидан бери 200 нафар ишсиз фуқароларга ишсизлик нафақаси тайинланди ва тўлаб берилди.

Туман Аҳоли бандлигига кўмаклашиш маркази бундан кейин ҳам ишсиз, ижтимоий ҳимояга муҳтож фуқаролар учун янги иш ўринлари яратиш, уларнинг оиласида даромад манбалари кўпайишига ва пировардида мамлакатимиз иқтисоди юксалишига ўз ҳиссасини қўшишда давом этади.

Алишер СОБИРОВ, туман Аҳоли бандлигига кўмаклашиш маркази директори.