ЁШ СПОРТЧИ МУСТАФО ИМТИЁЗЛИ РАВИШДА НУФУЗЛИ ОЛИЙ ЎҚУВ ЮРТИГА ҚАБУЛ ҚИЛИНДИ
Мустақиллик йилларида халқимиз босиб ўтган ғоят мураккаб ва шарафли йўл ҳақида, шу даврда қўлга киритилган улкан ютуқ-марраларимиз тўғрисида сўз юритилганда, қалбларни ғурур-ифтихор туйғулари эгаллайди. Ўтган йиллар давомида барча соҳа ва тармоқлар қатори мамлакатимизнинг спорт ҳаётида, юртдошларимизнинг спорт ҳақидаги тасаввур ва қарашларида ҳам оламшумул ўзгаришлар юз берди.
Мустақиллик мамлакатимиз спорти ҳаётида янги ва ёрқин саҳифалар очди. Бунинг тасдиғини спортчи йигит-қизларимизнинг дунё миқёсидаги турли нуфузли спорт анжуманларида қўлга киритаётган улкан ютуқ ва натижалари мисолида бугун яққол кўрмоқдамиз. Мамлакатимизда ташкил этилаётган нафақат Ўзбекистон, балки халқаро миқёсдаги йирик турнирлар, Осиё ва Жаҳон чемпионатлари ҳам айнан шундан далолат беради.
Жорий йилнинг 12-14 март кунлари ана шундай мусобақалардан бири Сирдарё вилояти маркази Гулистон шаҳрида спортнинг дзюдо тури бўйича 16-17 ёшдаги ўсмирлар ўртасида Ўзбекистон чемпионати ўтказилган эди. Уч кун давом этган мамлакат биринчилигида Қорақалпоғистон Республикаси, барча вилоятлар ҳамда Тошкент шаҳридан 690 нафар ўсмирлар иштирок этдилар. Мусобақанинг сўнгги, учинчи кунида оғир вазн тоифасидаги беллашувлар ўтказилиб, ғолиб ва совриндорлар номи маълум қилинди. Мазкур мусобақада туманимизнинг ёш, иқтидорли спортчиларидан бири бўлган Мустафо Ўрозбоев ҳам фаол иштирок этиб, фахрли 3-ўринни қўлга киритишга муваффақ бўлди.
Мустафо 6 ёшидан бошлаб, спортнинг дзюдо, самбо, кураш турлари билан шуғулланиб келади. У шу даврга қадар кўплаб туман, Қорақалпоғистон Республикаси ҳамда Ўзбекистон Республикаси миқёсидаги мусобақаларда иштирок этиб, фахрли ўринларни эгаллаб келмоқда. Хусусан, 2017 йилдан шу даврга қадар ҳар йили спортнинг кураш, самбо, дзюдо турлари бўйича турли вазн тоифаларида ўтказилган фахрли ўринлар ғолиби бўлди.
Шу йил март ойида Сирдарё вилоятида ўтказилган Ўзбекистон чемпионатида 3-ўрин совриндори бўлган Мустафо Ўрозбоев Қорақалпоқ Давлат университетининг ҳуқуқшунослик йўналишига ҳеч қандай тест синовларисиз имтиёзли равишда ўқишга қабул қилинди. Юртимизда спортни ривожлантиришга қаратилаётган эътибор ҳамда яратилган имкониятлардан оқилона фойдаланиб, катта ютуқларга эга бўлаётган ёш спортчининг келгусида яна янги марраларни эгаллашига, жамият равнақига муносиб ҳисса қўшишига ишонамиз.
Чарос Арслонова.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
