Амударёда 90 ўринли янги МТТ биноси қурилмоқда
Мамлакатимизда давом этаётган коронавирус пандемияси туфайли кўпгина фаолият турларига чекловлар ўрнатилди. Жумладан, Мактабгача таълим ташкилотларининг ҳам фаолияти вақтинча тўхтатилди. Барча ҳудудлардаги болалар дунёсига хос безатилган, кичкинтойлар яйраб-қувнаб ўсиб-улғаяётган Мактабгача таълим ташкилотлари бинолари ҳозир кимсасиз. Бироқ касаллик тарқалиб кетишининг олдини олиш, жиловлашга эришиш борасида мамлакатимизда кўрилаётган чоралар туфайли юртимизда санитария эпидемилогик аҳвол бирмунча яхшиланмоқда.
Олиб борилаётган чора-тадбирлар туфайли касаллик бартараф этиладиган, халқимиз тинч-осойишта ҳаётга қайтадиган кунлар умидида пандемия шароитида ҳам юртдошларимиз эзгу ниятлар билан меҳнат қилишмоқда.
Тошёп овулида Президентимизнинг қарорига мувофиқ Инвестиция дастури асосида мактабгача таълим ташкилотининг 90 ўринли янги биноси қурилиши жараёни билан танишган киши буни сидқидилдан ҳис қилиши мумкин.
Давлатимизнинг икки миллиард олти юз саксон беш миллион сўмдан зиёд маблағи ҳисобига қурилиши мўлжалланган бинони “Манғит Сервис” масъулияти чекланган жамияти ишчилари бунёд этмоқда.
Ушбу объектда айни кунларда овулнинг ўттиз нафардан зиёд қўли гул уста йигитлари ёз жаризамасини ҳам писанд қилмай, меҳнат қилишмоқда.
Объект қурилиш муддати 225 кунга мўлжалланганлиги боис, иш унуми юқори бўлиши учун қурувчиларга муносиб шароитлар яратилган бўлиб, тушликда иссиқ овқат, чой ташкил этилган.
Ҳозирги кунгача бино деворлари кўтарилган бўлиб, томи бетон плиталар билан ёпилаяпти, дераза ва эшикларига замонавий ромлар ўрнатилаётир. Сувоқ ишларига ҳам киришилган бўлиб, жами 5 та бригада қурувчилари иншоотни ўз муддатида, сифатли қуриб битказишга ҳаракат қилишмоқда.
Шуниси эътиборлики, Тошёп овули аҳолиси ҳудудда шу вақтгача давлат Мактабгача таълим ташкилоти йўқлигидан, ёш болали оналар ишлаши учун фарзандларини олис ҳудудлардаги Мактабгача таълим ташкилотларига олиб боришидан азият чекишар эди. Эндиликда овулнинг марказида қад ростлаётган 90 нафар кичкинтойларга таълим-тарбия беришга мўлжалланган болалар маскани биноси уларга чексиз қувонч бағишламоқда.
Кўзга кўринмас ёв - тождор вирусга қарши олиб борилаётган умумхалқ кураши самара бериб, юртимизда тинчлик-осойишталик ҳукм сурадиган дамлар ҳам оз қолганига умид қиламиз. Шундай дамларда Тошёпда қурилиши давом этаётган мана бу давлат Мактабгача таълим ташкилоти биноси ҳам муҳташам кўринишда, овулнинг кичкинтой ўғил-қизларини ўз бағрига чорлайди, болажонларнинг яйраб-қувнаб ўсиб-улғайишлари учун муносиб шароитлар яратилади.
Бу каби ишлар мамлакатимизда болажонларни мактабгача таълим ташкилотларига тўлиқ қамраб олиш мақсадида амалга оширилаётган ислоҳотларнинг амалий намунасидир. Болажонларимизни боғчага тўлиқ қамраб олиш эса уларнинг мактабга тайёр ҳолда боришига, ўз навбатида мактабда аъло баҳоларга ўқиб, юртимиз тараққиётига муносиб ҳисса қўшадиган баркамол авлод бўлиб вояга етишига хизмат қилади.
Ойгул PАЖАБОВА
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
