“Амударё-Агросервис” МТП МЧЖ техникалари меҳнат унумдорлигини оширишда муҳим ўрин тутмоқда

Мамлакатимизда қишлоқ хўжалигининг тезкор ривожланиши ва мамлакат озиқ-овқат хавфсизлигини таъминлаш имконини берувчи қишлоқ хўжалиги маҳсулотлари ишлаб чиқарувчиларга механизация ва сервис хизматларини кўрсатиш тизимини такомиллаштириш бўйича комплекс чора-тадбирлар амалга оширилмоқда.

Pеспубликада қишлоқ хўжалик техникасини ишлаб чиқариш, етказиб бериш ва сервис хизмати кўрсатиш ҳамда қишлоқ хўжалиги маҳсулотларини ишлаб чиқарувчиларга механизация хизматлари кўрсатишнинг ягона ўзаро боғланган тизимининг яратилиши қишлоқ хўжалиги корхоналари, “Ўзагросервис” AЖ ташкилотларининг сервис корхоналари ва машина-трактор паркларини қайта жиҳозлашни таъминлаш имконини бермоқда.

Бугунги кунда туманимизда фаолият юритаётган қишлоқ хўжалиги маҳсулотларини ишлаб чиқарувчиларга механизация ва сервис хизматларини кўрсатаётган “Aмударё-Aгросервис” МТП МЧЖ самарали фаолият олиб бормоқда.

Мазкур хизмат кўрсатиш ташкилотига 2018 йилда туман “Aгробанк” туман филиали томонидан янги қишлоқ хўжалиги техникаларини сотиб олиш учун 5 фоизли имтиёзли кредит маблағи ажратилиб, корхона қайта шакллантирилди. Туман фермер хўжаликларига механизация ва сервис хизматини кўрсатиш – корхонанинг асосий иш фаолияти бўлиб ҳисобланади.

Шунингдек, ташкилот тумандаги қишлоқ хўжалиги маҳсулотларини ишлаб чиқарувчилар ерларини ҳайдаш, чизеллаш, чел олиш, ерларни текислаш, ғалла ўриш, пахта экиш, культивация қилиш, қолаверса, МТП устахонасида чилангарлик ҳамда ишдан чиққан қишлоқ хўжалик техникаларига техник хизмат кўрсатиш каби фаолиятлар билан шуғулланади.

Ҳозирда “Aмударё-Aгросервис” МТП МЧЖда Жумабой Хўжамуродовнинг раҳбарлигидаги бош ҳисобчи, кадрлар бўлими мутахассиси, токарлар, пайвандчилар, чилангарлар, трактор ва комбайн операторлари, қоровуллар жами 25 нафар ишчи ходимлар хизмат қилишмоқда.

Шу ўринда таъкидлаш керакки, сўнгги йилларда мамлакатимизда мазкур хизмат кўрсатиш фаолиятини янада ривожлантиришга катта эътибор қаратилди. Ўзбекистон Pеспубликаси Президентининг “Қишлоқ хўжалиги маҳсулотлари ишлаб чиқарувчиларга механизация ва сервис хизматларини кўрсатиш самарадорлигини ошириш бўйича қўшимча чора-тадбирлар тўғрисида” ҳамда Вазирлар Маҳкамасининг "Қишлоқ хўжалиги техникасини етказиб бериш ва республика минтақаларида уларга сервис хизмати кўрсатиш самарадорлигини оширишга доир қўшимча чора-тадбирлар тўғрисида”ги қарорлари ушбу хизмат кўрсатиш тизимининг янада такомиллашишида муҳим дастуриламал бўлмоқда.

Ушбу қонун ҳужжатлари қишлоқ хўжалиги техникасини бир маромда ишлаб чиқариш ва ишлаб чиқарилаётган қишлоқ хўжалиги техникасини замонавий усулларини қўллаган ҳолда сотишни ташкил этишни яхшилаш, сифатли сервис хизмати кўрсатиш учун қўшимча шарт-шароитлар яратиш, шунингдек, шу асосда маҳаллий қишлоқ хўжалиги машинасозлиги корхоналарининг молиявий аҳволини барқарорлаштириш мақсадига хизмат қилмоқда.

Яратилаётган шарт-шароит ҳамда имкониятлардан самарали фойдаланган ҳолда фаолият олиб бораётган Aмударё Aгросервис МТП МЧЖга 2019 йилда “Узагролизинг” ташкилотидан юқори унумли Кейс-4088 русумли ғалла ўриш комбайни лизингга олиб келинди. Ҳозирда операторлар Шуҳрат Йўлдошев ва Ўктам Хўжамуродовлар бошқарувидаги мазкур комбайн туман фермер хўжаликлари далаларида ғалла йиғим-теримида фаол қатнашмоқда.

Чарос Арслонова.