Маҳаллаларда кўчат ўтқазиш ишлари бошланди

Юртимизда қиш охирлаб, кунлар исиши билан баҳорги мавсумга тайёргарлик, кўкаламзорлаштириш ишлари бошлаб юборилади. Бу каби ободонлаштириш ва кўчат экиш, дарахтларга шакл бериш ишлари туманимизда ҳам уюшқоқлик билан амалга оширилади.

Аллақачон бошлаб юборилган бундай хайрли тадбирларда туман ҳокимлиги, тегишли ташкилот ва идоралар вакиллари, фаол ёшлар, қисқача айтганда, туманимизнинг ёш-у қариси – барча бирдек баҳорги мавсумга тайёргарлик ишларида фаол иштирок этмоқда.

Гулзор ва Ойбек номли маҳаллалар ҳудудидаги катта кўча бўйида арча кўчатларини ўтқазиш ишлари ҳамжиҳатлик билан бажарилди. Меҳнатсевар юртдошларимиз арча кўчатлари келгусида шаҳримиз кўркига кўрк қўшади, деган ният билан ушбу хайрли ишда қатнашишди. Шу мақсадда Манғит шаҳрининг 5,5 км узунликдаги ер майдонига жами 2 минг туп манзарали дарахтлар, арча кўчатлари ўтқазишди.

Азалдан халқимизда баҳор кириб келишига катта тайёргарлик кўрилиб, кўча-кўйлар, маҳаллаларни обод қилишга, ён-атрофни озода, покиза, тартибли, саранжом ҳолда сақлашга жиддий эътибор қаратилиб келинади. Кўклам арафасида ўтказиладиган ҳашарлар юртимизни янада обод, файзли, тоза ва озода бўлишини таъминлаш билан бирга ёш авлодда миллий анъана ва қадриятларимизга ҳурмат, ўзаро меҳр-оқибат, меҳнатсеварлик, фидойилик, эзгуликка хайрихоҳлик сингари фазилатларининг мустаҳкам қарор топишида муҳим ўрин тутади.

Шу кунларда туманимизда ҳам барча маҳаллалардаги турар жойлар, хиёбонлар, боғлар, йўл ва йўлаклар, муқаддас қадамжоларни тартибга келтирилишига алоҳида эътибор қаратилмоқда. Марказий кўчаларга кўплаб мевали дарахт, гул кўчатлари ўтқазилмоқда. Мазкур тадбирларда аҳоли, айниқса, ёшлар фаол иштирок этмоқдалар.

Қолаверса, мазкур тадбирларда ўз тадбиркорлик маҳсулотлари - турли хилдаги кўчатларни аҳолига етказиб бераётган ҳамюртларимиз ҳам талайгина. Шундай меҳнатсевар тадбиркорлардан бири Фарҳод Яхшимов 2018 йилда 25 млн. кредит маблағи ҳисобидан Урганч шаҳридаги гул ва субтропик ўсимликлар етиштирадиган “”Буюк Турон” фермер хўжалигидан шартнома асосида кўчатлар сотиб олиб, гулчилик ва кўчат етиштиришга ихтисослашган оилавий тадбиркорлик корхонаси фаолиятини йўлга қўйди.

 Шунингдек, Фарҳод аканинг иш тажрибасини қунт билан ўрганаётган қизи Марҳабонинг ҳам гулчилик соҳасига қизиқиши юқори бўлиб, отасининг ёнида аҳолига кўчатларни етказиб беришга камарбаста бўляпти.

Маълумот тариқасида айтиш жоизки, мазкур оилавий корхона ташкил қилиниши билан 8 та бўш иш ўрни яратилиб, аҳоли бандлигини таъминлашга ҳисса қўшди. Оилавий корхонада 2019 йилда 20 турдаги 7000 дона хонаки гуллар етиштирилди.

Шунингдек, бугунги кунда оилавий корхонада 4000 дона гул тувакчаларда тайёр ҳолатда ҳамда 15000 дона гул кўчатлари, қолаверса, она табиатимиз кўркига кўрк қўшиш мақсадида 30000 дона бир йиллик манзарали гуллар ҳам етиштириш кенг йўлга қўйилган. Ушбу хайрли иш ҳам, шубҳасиз, табиат ҳамда экологик муҳитнинг янада яхшиланишига хизмат қилади.

Aлоҳида таъкидлаш керакки, инсон ҳаётини табиий муҳитсиз тасаввур этиш қийин. Шунинг учун ҳам табиатни муҳофаза қилиш, унинг мусаффолигини сақлаш инсониятнинг муқаддас бурчидир. Бизни қуршаб турган сув, ҳаво, тупроқ, ўсимликлар оламининг ҳозирги аҳволи, атроф-муҳит ифлосланиб қолишининг олдини олиш асосий вазифаларимиздан биридир.

Хулоса қилиб айтганда, табиат инсонларнинг барча моддий ва маънавий, руҳий эҳтиёжларини қондирувчи асосий манбадир. Шундай экан, табиат бизга эмас, биз табиатга муҳтожмиз! Табиатни асраш ва ундан оқилона фойдаланиш барчамизнинг асосий конституциявий бурчимиздир. Зеро, она табиат аждодлардан қолган мерос эмас, балки авлодлардан олинган ва келажак учун қолдиришимиз зарур бўлган бойликдир!

Чарос Арслонова, туман ҳокимлигининг Ахборот хизмати.