Mahallalarda koʻchat oʻtqazish ishlari boshlandi

Yurtimizda qish oxirlab, kunlar isishi bilan bahorgi mavsumga tayyorgarlik, koʻkalamzorlashtirish ishlari boshlab yuboriladi. Bu kabi obodonlashtirish va koʻchat ekish, daraxtlarga shakl berish ishlari tumanimizda ham uyushqoqlik bilan amalga oshiriladi.

Allaqachon boshlab yuborilgan bunday xayrli tadbirlarda tuman hokimligi, tegishli tashkilot va idoralar vakillari, faol yoshlar, qisqacha aytganda, tumanimizning yosh-u qarisi – barcha birdek bahorgi mavsumga tayyorgarlik ishlarida faol ishtirok etmoqda.

Gulzor va Oybek nomli mahallalar hududidagi katta koʻcha boʻyida archa koʻchatlarini oʻtqazish ishlari hamjihatlik bilan bajarildi. Mehnatsevar yurtdoshlarimiz archa koʻchatlari kelgusida shahrimiz koʻrkiga koʻrk qoʻshadi, degan niyat bilan ushbu xayrli ishda qatnashishdi. Shu maqsadda Mangʻit shahrining 5,5 km uzunlikdagi yer maydoniga jami 2 ming tup manzarali daraxtlar, archa koʻchatlari oʻtqazishdi.

Azaldan xalqimizda bahor kirib kelishiga katta tayyorgarlik koʻrilib, koʻcha-koʻylar, mahallalarni obod qilishga, yon-atrofni ozoda, pokiza, tartibli, saranjom holda saqlashga jiddiy eʼtibor qaratilib kelinadi. Koʻklam arafasida oʻtkaziladigan hasharlar yurtimizni yanada obod, fayzli, toza va ozoda boʻlishini taʼminlash bilan birga yosh avlodda milliy anʼana va qadriyatlarimizga hurmat, oʻzaro mehr-oqibat, mehnatsevarlik, fidoyilik, ezgulikka xayrixohlik singari fazilatlarining mustahkam qaror topishida muhim oʻrin tutadi.

Shu kunlarda tumanimizda ham barcha mahallalardagi turar joylar, xiyobonlar, bogʻlar, yoʻl va yoʻlaklar, muqaddas qadamjolarni tartibga keltirilishiga alohida eʼtibor qaratilmoqda. Markaziy koʻchalarga koʻplab mevali daraxt, gul koʻchatlari oʻtqazilmoqda. Mazkur tadbirlarda aholi, ayniqsa, yoshlar faol ishtirok etmoqdalar.

Qolaversa, mazkur tadbirlarda oʻz tadbirkorlik mahsulotlari - turli xildagi koʻchatlarni aholiga yetkazib berayotgan hamyurtlarimiz ham talaygina. Shunday mehnatsevar tadbirkorlardan biri Farhod Yaxshimov 2018-yilda 25 mln. kredit mablagʻi hisobidan Urganch shahridagi gul va subtropik oʻsimliklar yetishtiradigan “”Buyuk Turon” fermer xoʻjaligidan shartnoma asosida koʻchatlar sotib olib, gulchilik va koʻchat yetishtirishga ixtisoslashgan oilaviy tadbirkorlik korxonasi faoliyatini yoʻlga qoʻydi.

 Shuningdek, Farhod akaning ish tajribasini qunt bilan oʻrganayotgan qizi Marhaboning ham gulchilik sohasiga qiziqishi yuqori boʻlib, otasining yonida aholiga koʻchatlarni yetkazib berishga kamarbasta boʻlyapti.

Maʼlumot tariqasida aytish joizki, mazkur oilaviy korxona tashkil qilinishi bilan 8 ta boʻsh ish oʻrni yaratilib, aholi bandligini taʼminlashga hissa qoʻshdi. Oilaviy korxonada 2019-yilda 20 turdagi 7000 dona xonaki gullar yetishtirildi.

Shuningdek, bugungi kunda oilaviy korxonada 4000 dona gul tuvakchalarda tayyor holatda hamda 15000 dona gul koʻchatlari, qolaversa, ona tabiatimiz koʻrkiga koʻrk qoʻshish maqsadida 30000 dona bir yillik manzarali gullar ham yetishtirish keng yoʻlga qoʻyilgan. Ushbu xayrli ish ham, shubhasiz, tabiat hamda ekologik muhitning yanada yaxshilanishiga xizmat qiladi.

Alohida taʼkidlash kerakki, inson hayotini tabiiy muhitsiz tasavvur etish qiyin. Shuning uchun ham tabiatni muhofaza qilish, uning musaffoligini saqlash insoniyatning muqaddas burchidir. Bizni qurshab turgan suv, havo, tuproq, oʻsimliklar olamining hozirgi ahvoli, atrof-muhit ifloslanib qolishining oldini olish asosiy vazifalarimizdan biridir.

Xulosa qilib aytganda, tabiat insonlarning barcha moddiy va maʼnaviy, ruhiy ehtiyojlarini qondiruvchi asosiy manbadir. Shunday ekan, tabiat bizga emas, biz tabiatga muhtojmiz! Tabiatni asrash va undan oqilona foydalanish barchamizning asosiy konstitutsiyaviy burchimizdir. Zero, ona tabiat ajdodlardan qolgan meros emas, balki avlodlardan olingan va kelajak uchun qoldirishimiz zarur boʻlgan boylikdir!

Charos Arslonova, tuman hokimligining Axborot xizmati.