Ёш ижодкорлар билан учрашув бўлиб ўтди

“Тараққиёт кўзгуси” ҳамда “Менинг оилам” газеталари таҳририяти қошида ташкил этилган “Жайхун илҳомлари” нотижорат нодавлат ташкилоти томонидан таълим муассасалари, жамоат жойлари, корхона-ташкилотларда мунтазам равишда тадбирлар, учрашувлар ўтказиб келинмоқда.
Ана шундай учрашувлардан бири туманимиздаги 17-сонли мактабда бўлиб ўтди. Бу тадбирда мактаб ўқувчилари, ўқитувчилар, ёш ижодкорларнинг ота-оналари қатнашишди. Тадбирни мактабнинг ўқув ишлари бўйича  директор ўринбосари Тозабой Юсупов кириш сўзи билан очиб, мактабда ўқувчилар таълим-тарбия олишлари учун яратилган шароитлар, ўтказилаётган маънавий-маърифий тадбирлар, ташкил қилинган тўгараклар ҳамда педагогларнинг маҳорати ва малакасини ошириш борасида амалга оширилаётган чора-тадбирлар ҳақида сўз юритди.

“Жайхун илҳомлари” нотижорат нодавлат ташкилотининг раиси Ўрозали Рейимов сўзга чиқиб, ташкилотнинг ўз олдига қўйган мақсади, айни кунлардаги олиб борилаётган ишлар ҳақида батафсил маълумот берди. Жумладан, ташкилот томонидан йил мобайнида ижодкорлар билан учрашувлар ўтказиш, сайёр кутубхона ташкил этиш, жойлардаги кутубхоналарга ўқувчи ва ёшларнинг, кенг жамоатчилик вакилларининг ташрифини уюштириш режалаштирилганини маълум қилди. Шу билан бир қаторда тажрибали ижодкорлар иштирокида “Наср ва назм”, “Журналистика – бадиий ижод”, амалий санъат ва мусиқага доир мавзуларда маҳорат мактабларини ташкил этиш, Президентимиз томонидан эълон қилинган беш ташаббуснинг мазмун-моҳиятини ёшларга тушунтириш ҳамда эришилаётган ижобий натижаларни кенг омма орасида тарғиб қилиб бориш ҳам шу ташкилот томонидан амалга оширилиши хусусида гапирди. Шунингдек, туманимиз ижодкорлари томонидан нашрдан чиқарилган янги китоблар тақдимотига бағишланган адабий кечалар ўтказилиб турилишини, барча тадбирлар иш режага кўра ҳар ойда мазкур ташкилот томонидан амалга оширилиб борилишини ҳам айтиб ўтди.

Бўлиб ўтган учрашувда мактабнинг ёш ижодкорларидан 6-синф ўқувчиси Ҳумоюн Жуматов, 10-синф ўқувчиси Муножот Каримбоева, 8-синф ўқувчиси Шаҳзода Пўлатбоевалар ўзлари ёзган янги шеърларидан ўқиб бердилар ва келажакдаги орзулари ҳақида ҳам гапириб бердилар.
Мазкур учрашув барча иштирокчилар қалбида жуда яхши таассуротлар қолдирди.

Муяссар Халиллаева.