Yosh ijodkorlar bilan uchrashuv boʻlib oʻtdi

“Taraqqiyot koʻzgusi” hamda “Mening oilam” gazetalari tahririyati qoshida tashkil etilgan “Jayxun ilhomlari” notijorat nodavlat tashkiloti tomonidan taʼlim muassasalari, jamoat joylari, korxona-tashkilotlarda muntazam ravishda tadbirlar, uchrashuvlar oʻtkazib kelinmoqda.
Ana shunday uchrashuvlardan biri tumanimizdagi 17-sonli maktabda boʻlib oʻtdi. Bu tadbirda maktab oʻquvchilari, oʻqituvchilar, yosh ijodkorlarning ota-onalari qatnashishdi. Tadbirni maktabning oʻquv ishlari boʻyicha  direktor oʻrinbosari Tozaboy Yusupov kirish soʻzi bilan ochib, maktabda oʻquvchilar taʼlim-tarbiya olishlari uchun yaratilgan sharoitlar, oʻtkazilayotgan maʼnaviy-maʼrifiy tadbirlar, tashkil qilingan toʻgaraklar hamda pedagoglarning mahorati va malakasini oshirish borasida amalga oshirilayotgan chora-tadbirlar haqida soʻz yuritdi.

“Jayxun ilhomlari” notijorat nodavlat tashkilotining raisi Oʻrozali Reyimov soʻzga chiqib, tashkilotning oʻz oldiga qoʻygan maqsadi, ayni kunlardagi olib borilayotgan ishlar haqida batafsil maʼlumot berdi. Jumladan, tashkilot tomonidan yil mobaynida ijodkorlar bilan uchrashuvlar oʻtkazish, sayyor kutubxona tashkil etish, joylardagi kutubxonalarga oʻquvchi va yoshlarning, keng jamoatchilik vakillarining tashrifini uyushtirish rejalashtirilganini maʼlum qildi. Shu bilan bir qatorda tajribali ijodkorlar ishtirokida “Nasr va nazm”, “Jurnalistika – badiiy ijod”, amaliy sanʼat va musiqaga doir mavzularda mahorat maktablarini tashkil etish, Prezidentimiz tomonidan eʼlon qilingan besh tashabbusning mazmun-mohiyatini yoshlarga tushuntirish hamda erishilayotgan ijobiy natijalarni keng omma orasida targʻib qilib borish ham shu tashkilot tomonidan amalga oshirilishi xususida gapirdi. Shuningdek, tumanimiz ijodkorlari tomonidan nashrdan chiqarilgan yangi kitoblar taqdimotiga bagʻishlangan adabiy kechalar oʻtkazilib turilishini, barcha tadbirlar ish rejaga koʻra har oyda mazkur tashkilot tomonidan amalga oshirilib borilishini ham aytib oʻtdi.

Boʻlib oʻtgan uchrashuvda maktabning yosh ijodkorlaridan 6-sinf oʻquvchisi Humoyun Jumatov, 10-sinf oʻquvchisi Munojot Karimboyeva, 8-sinf oʻquvchisi Shahzoda Poʻlatboyevalar oʻzlari yozgan yangi sheʼrlaridan oʻqib berdilar va kelajakdagi orzulari haqida ham gapirib berdilar.
Mazkur uchrashuv barcha ishtirokchilar qalbida juda yaxshi taassurotlar qoldirdi.

Muyassar Xalillayeva.