САЙЛОВДА 6 МИНГ 382 НАФАР АМУДАРЁЛИК ЁШЛАР ИЛК МАРТА ОВОЗ БЕРАДИ

Мустақиллик йилларида жамиятнинг барча жабҳалари, хусусан, сиёсий соҳада тизимли равишда олиб борилаётган ислоҳотлар натижасида умумэътироф этилган халқаро стандартлар ва юксак демократик талабларга ҳар томонлама жавоб берадиган сайлов тизими шаклланди. Ўзбекистон Республикаси Конституциясига асосланган мустаҳкам ҳуқуқий-меъёрий негиз яратилди. 22 декабрь куни Олий Мажлис Қонунчилик палатаси, Қорақалпоғистон Республикаси Жўқорғи Кенгеси ва халқ депутатлари вилоят, туман ва шаҳар Кенгашлари депутатлигига бўлиб ўтаётган сайловларда бу ҳуқуқий-меъёрий негиз ўз ифодасини топмоқда.

Шуни алоҳида эътироф этиш керакки, мазкур сайловда фуқароларнинг, айниқса ёшларнинг ўз сайлов ҳуқуқларини ҳеч қандай тўсқинликларсиз амалга ошириши уларнинг давлат бошқарувидаги иштирокининг энг муҳим кафолатларидан бири бўлди. Бу йилги сайловларда тенг ҳуқуқлилик асосида туманимиз ёшларидан 6 минг 382 нафари биринчи марта овоз берадилар.

Биз сайлов куни сайлов участкаларида ушбу демократик жараёнда илк марта иштирок этаётган ёшлар билан учрашиб, уларнинг сиёсий-ижтимоий қарашлари билан қизиқдик.

Гулруҳ Шомуродова, 18 ёш:

– Бугун менинг ҳаётимда унутилмас кун бўлди. Мен ота-онам, ака-оналарим ҳар гал сайловда иштирок этишганларида чин дилдан ҳавас қилардим. Улар каби ўз хоҳиш-иродамни намоён этгим келарди. Яқинда 18 ёшга тўлдим, фуқаролик паспортига эга бўлдим. Бундан ҳам муҳими, уйимизга участка сайлов комиссияси аъзолари томонидан сайловга чақирув қоғози олиб боришганида ўзимнинг эл-юрт фаровонлиги, мамлакатимизнинг янада обод бўлиши учун масъул инсон сифатида сайловда овоз бериш ҳуқуқига эгалигимдан жуда қувондим.

Мен сайловда иштирок этарканман, бундан буён ўз тақдирим она юрт, халқ тақдири билан боғлиқ эканлигини, мустақил мамлакатимиздаги сиёсий жараёнларда фаол иштирок этиб, давлат бошқарувида муносиб номзодни сайлаш орқали қатнашишим муҳим аҳамиятга эга эканлигини англаб етдим. Мен бугун сайловолди дастури, илғор ғоялари билан ўзимга маъқул бўлган партия номзодлари учун овоз бердим. Ишонаманки, мен танлаган партия номзодлари сайловда албатта ғолиб чиқишади.

Шоҳзод Қурбонбоев, 20 ёш, Қорақалпоқ Давлат университети талабаси:

– Мен ҚДУ журналистика таълим йўналиши бўйича таҳсил оламан. Танлаган соҳам бефосита мамлакатимиз сиёсати билан боғлиқ. Дарслар давомида бу борадаги янгиликларни, жараёнларни ўрганамиз, таҳлил қиламиз. Бугун Ўзбекистонимизда муҳим сиёсий жараён – сайловлар бўлиб ўтмоқда. Мен бу йил илк бор сайловда иштирок этяпман. Сайловда иштирок этиш – фуқаролик бурчим деб биламан ва Ўзбекистонимиз келажаги учун ўзини аямайдиган муносиб номзодга овозимни бердим.

Сарвар Ибодуллаев, 19 ёш Манғит шаҳри Дурунки маҳалласидан:

– Ўз юрти ва унда юз бераётган ижтимоий-сиёсий воқеаларга бефарқ бўлмаган, ўз тақдирини она Ватан, халқ тақдири билан чамбарчас боғлаган ҳар бир масъулиятли ёш бугун сайловда ўз фаоллигини намоён этганига ишончим комил. Мен сайловга чақирув қоғозини олганимда ўзимда ана шундай масъулият ҳиссини туйдим. Ҳатто сайлов кунигача ўзим учун манзур бўлган сиёсий партиялардан бирини аллақачон танлаган эдим. Чунки мен ўзим истиқомат қиладиган ҳудуддаги участка сайлов комиссияси томонидан ташкил этилган сиёсий партиялардан кўрсатилган номзодлар билан сайловчиларнинг учрашувларида иштирок этиб, уларнинг сайловолди дастурлари билан яқиндан танишган ва қатъий хулосага келган эдим.

Айниқса, сайлов участкасида ташкил этилган тарғибот бурчаги орқали депутатликка номзодлар ҳақида тўлиқ маълумотлар олганим сайловда ўз хоҳиш-иродамни намоён этишда ҳеч қийинчилик туғдирмади. Бундан ташқари, янги таҳрирдаги Сайлов Кодекси билан танишганимдан сўнг сайлов бўйича барча ҳақ-ҳуқуқларимдан фойдаландим, эмин-эркин ўзим танлаган партия номзодларига ишонч билан овоз бердим.

Робия ЙЎЛДОШЕВА суҳбатлашди.