SAYLOVDA 6 MING 382 NAFAR AMUDARYoLIK YoShLAR ILK MARTA OVOZ BERADI

Mustaqillik yillarida jamiyatning barcha jabhalari, xususan, siyosiy sohada tizimli ravishda olib borilayotgan islohotlar natijasida umumeʼtirof etilgan xalqaro standartlar va yuksak demokratik talablarga har tomonlama javob beradigan saylov tizimi shakllandi. Oʻzbekiston Respublikasi Konstitutsiyasiga asoslangan mustahkam huquqiy-meʼyoriy negiz yaratildi. 22-dekabr kuni Oliy Majlis Qonunchilik palatasi, Qoraqalpogʻiston Respublikasi Joʻqorgʻi Kengesi va xalq deputatlari viloyat, tuman va shahar Kengashlari deputatligiga boʻlib oʻtayotgan saylovlarda bu huquqiy-meʼyoriy negiz oʻz ifodasini topmoqda.

Shuni alohida eʼtirof etish kerakki, mazkur saylovda fuqarolarning, ayniqsa yoshlarning oʻz saylov huquqlarini hech qanday toʻsqinliklarsiz amalga oshirishi ularning davlat boshqaruvidagi ishtirokining eng muhim kafolatlaridan biri boʻldi. Bu yilgi saylovlarda teng huquqlilik asosida tumanimiz yoshlaridan 6 ming 382 nafari birinchi marta ovoz beradilar.

Biz saylov kuni saylov uchastkalarida ushbu demokratik jarayonda ilk marta ishtirok etayotgan yoshlar bilan uchrashib, ularning siyosiy-ijtimoiy qarashlari bilan qiziqdik.

Gulruh Shomurodova, 18 yosh:

– Bugun mening hayotimda unutilmas kun boʻldi. Men ota-onam, aka-onalarim har gal saylovda ishtirok etishganlarida chin dildan havas qilardim. Ular kabi oʻz xohish-irodamni namoyon etgim kelardi. Yaqinda 18 yoshga toʻldim, fuqarolik pasportiga ega boʻldim. Bundan ham muhimi, uyimizga uchastka saylov komissiyasi aʼzolari tomonidan saylovga chaqiruv qogʻozi olib borishganida oʻzimning el-yurt farovonligi, mamlakatimizning yanada obod boʻlishi uchun masʼul inson sifatida saylovda ovoz berish huquqiga egaligimdan juda quvondim.

Men saylovda ishtirok etarkanman, bundan buyon oʻz taqdirim ona yurt, xalq taqdiri bilan bogʻliq ekanligini, mustaqil mamlakatimizdagi siyosiy jarayonlarda faol ishtirok etib, davlat boshqaruvida munosib nomzodni saylash orqali qatnashishim muhim ahamiyatga ega ekanligini anglab yetdim. Men bugun saylovoldi dasturi, ilgʻor gʻoyalari bilan oʻzimga maʼqul boʻlgan partiya nomzodlari uchun ovoz berdim. Ishonamanki, men tanlagan partiya nomzodlari saylovda albatta gʻolib chiqishadi.

Shohzod Qurbonboyev, 20 yosh, Qoraqalpoq Davlat universiteti talabasi:

– Men QDU jurnalistika taʼlim yoʻnalishi boʻyicha tahsil olaman. Tanlagan soham befosita mamlakatimiz siyosati bilan bogʻliq. Darslar davomida bu boradagi yangiliklarni, jarayonlarni oʻrganamiz, tahlil qilamiz. Bugun Oʻzbekistonimizda muhim siyosiy jarayon – saylovlar boʻlib oʻtmoqda. Men bu yil ilk bor saylovda ishtirok etyapman. Saylovda ishtirok etish – fuqarolik burchim deb bilaman va Oʻzbekistonimiz kelajagi uchun oʻzini ayamaydigan munosib nomzodga ovozimni berdim.

Sarvar Ibodullayev, 19 yosh Mangʻit shahri Durunki mahallasidan:

– Oʻz yurti va unda yuz berayotgan ijtimoiy-siyosiy voqealarga befarq boʻlmagan, oʻz taqdirini ona Vatan, xalq taqdiri bilan chambarchas bogʻlagan har bir masʼuliyatli yosh bugun saylovda oʻz faolligini namoyon etganiga ishonchim komil. Men saylovga chaqiruv qogʻozini olganimda oʻzimda ana shunday masʼuliyat hissini tuydim. Hatto saylov kunigacha oʻzim uchun manzur boʻlgan siyosiy partiyalardan birini allaqachon tanlagan edim. Chunki men oʻzim istiqomat qiladigan hududdagi uchastka saylov komissiyasi tomonidan tashkil etilgan siyosiy partiyalardan koʻrsatilgan nomzodlar bilan saylovchilarning uchrashuvlarida ishtirok etib, ularning saylovoldi dasturlari bilan yaqindan tanishgan va qatʼiy xulosaga kelgan edim.

Ayniqsa, saylov uchastkasida tashkil etilgan targʻibot burchagi orqali deputatlikka nomzodlar haqida toʻliq maʼlumotlar olganim saylovda oʻz xohish-irodamni namoyon etishda hech qiyinchilik tugʻdirmadi. Bundan tashqari, yangi tahrirdagi Saylov Kodeksi bilan tanishganimdan soʻng saylov boʻyicha barcha haq-huquqlarimdan foydalandim, emin-erkin oʻzim tanlagan partiya nomzodlariga ishonch bilan ovoz berdim.

Robiya YOʻLDOShEVA suhbatlashdi.