Соғлом бола йили янгиликлари

Спортга ҳамдам болалар

55-сонли умумтаълим мактабида 580 нафар ўқувчи таълим-тарбия олишади. Шуниси эътиборга моликки, мактаб ўқувчиларининг 400 нафари турли хил спорт тўгараклари машғулотларида қатнашадилар. Мактабда "Умид ниҳоллари”, "Алпомиш” спорт мусобақалари мунтазам ўтказилиб турилади. Жаҳонгир Соатбоев. Аббос Мадаминов. Диёрбек Соатбоев, Шаҳзод Умрзоқов, Жаҳонгир Собировлар 2-сонли БЎСМда спортнинг кураш, каратэ, дзю-до турлари бўйича шуғулланиб келишади. Улар айни кунларда Қорақалпоғистон Республикаси чемпионатида иштирок этиш учун тайёргарлик кўришмоқда.

Манғит буюм бозори ривожланмоқда

Манғит савдо комплекси МЧЖнинг 2013 йилда режалаштирилган қурилиш ишларидан энг асосийси 50 миллион сўмлик банк кредити ҳисобидан йўлакларга бурсчатка ётқизиш ва безатиш, шунингдек канализация тизимларини ўрнатиш ишлари айни кунларда ниҳоясига етказилмоқда.

Шунингдек, 2012 йилда қурилиши тугалланмаган турғун савдо шохобчалари янги йил арафасида қуриб битказилди. Туман  ҳокимининг 2011 йил, 29 ноябрдаги №947-сонли қарорига асосан 98 нафар фуқарога турғун савдо шохобчаси қуриш учун ажратилган 0,32 гектар майдонда 60 тадан зиёд кичик дўконлар барпо этилди.

Хуштаъм балиқ таомлари

"Қипчоқ” овулида ишбилармон ва тадбиркорлар кўп. Умаржон Сайитов ташкил этган кичик корхонага қарашли "Кумуш-Эльмира” ошхонасида балиқ таомлари маҳорат билан тайёрланади. Айниқса, ошхонанинг  балиқ қовурдоқ, қовурилган увилдиқ, буюртма асосида тайёрланадиган балиқли димлама тасмалари жуда хуштаъмлиги билан мижозларга манзур. Бу ерда 4 нафар овул ёшлари иш билан таъминлагани боис, У.Сайитовдан ҳамқишлоқлари миннатдор.