Республика миқёсида танилган болалар маркази

Вазирлар маҳкамасининг 2011 йил 28 февралда қабул қилинган "Мактабдан ташқари таълим тизимини янада такомиллаштириш чора-тадбирлари тўғрисида”ги 50-сонли қарори асосида Республикамизда "Баркамол авлод” болалар марказлари ташкил этилди ҳамда "Баркамол авлод” болалар марказлари тўғрисида Низом ишлаб чиқилди.

Туманимизда ташкил қилинган "Баркамол авлод” болалар маркази ҳам ҳозирги кунда ўқувчи-ёшларга турли касб сирларини ўргатиш, бўш вақтларини мазмунли ўтказиш ва қизиқишларига қараб мактабда олган билимларини ривожлантириш, амалиётда мустаҳкамлаш мақсадида 3 та йўналиш - "Бадиий ижодиёт”, "Техник ижодиёт”, "Ўлкашунослик ва экология” йўналишлари бўйича ўз фаолиятини юритиб келмоқда.

Қувонарлиси шуки, илк маротаба туманимизда Мустақиллигимизнинг 22 йиллигига бағишлаб ўтказилган байрам тадбирида марказимизнинг "Фольклор” тўгараги аъзолари Санъатбек Оллоёров ва Диёрбек Ортиқовлар ўзларининг "Ўзбекистон” қўшиғи билан қатнашдилар. "Баркамол авлод” болалар марказлари рейтинги жамоа аъзоларининг кўрик-танловлардаги иштироки, ҳар хил тадбирлар ўтказиш билан белгиланади. Шу боисдан тадбирлар фаолиятимизнинг асосий мезони ҳисобланади. 2013 йилнинг ноябрь ойида Нукус шаҳрида бўлиб ўтган кўрик-танловда ҳам марказимиз ўқувчилари фаол иштирок этиб, фахрли ўринларни қўлга киритдилар. "Бадиий нафосат билимдони” деб номланган кўрик-танловнинг Республика босқичида "Қўғирчоқ театри” йўналиши бўйича марказимизнинг "Жайҳун” жамоаси 2-ўринни, "Болалар ва сув” Республика болалар фестивалида эса "Аму юлдузлари” жамоаси 2-ўринни эгалладилар. Энг қувонарлиси, "Улуғбек юлдузлари” кўрик-танловида "Ракета моделлаштириш” йўналиши бўйича 40-сонли мактабнинг 5-синф ўқувчиси Комронбек Бахтиёров ва 31-сонли мактабнинг 8-синф ўқувчиси Азизбек Нуржоновлар Қорақалпоғистон  Республикасида 1-ўринни эгалладилар ва Тошкент шаҳрида, 2013 йилнинг 28-29 ноябрь кунлари бўлиб ўтган финал босқичида эса Комронбек Бахтиёров 2-ўринни, Азизбек Нуржонов 3-ўринни эгаллаб қайтдилар.

Қилинган ишлар ўз самарасини бераётгани бизни қувонтиради. 2013 йилнинг 11 декабрь куни Тошкент шаҳрида халқ таълими Вазирлиги томонидан ўтказилган йил якунларига бағишланган йиғилишда болаларни жалб қилиш бўйича Республикамиздаги бешта тумандаги марказлар эътироф этилиб, булардан бири бизнинг марказимиз бўлганлиги бизни янада илҳомлантирди.

Президентимиз И.Каримов ташаббуси билан 2014 йилнинг "Соғлом бола йили” деб эълон қилиниши бизларнинг зиммамизга масъулиятли вазифалар юклайди, албатта. Фарзандларимизни ҳар томонлама соғлом, баркамол авлод қилиб тарбиялашда ўз олдимизга қўйган мақсадларни амалга оширишимизга яқиндан ёрдам бераётган ва фарзандларини тўгаракларга ишониб топшираётган ота-оналарга ўз миннатдорчилигимизни билдирамиз. Юртбошимиз Ўзбекистон Республикаси Конституцияси қабул қилинган куннинг 21 йиллигига  бағишланган йиғилишдаги маърузасида таъкидлаганларидек: "маънавий жиҳатдан соғлом, ҳеч кимдан кам бўлмасдан, бошини баланд кўтариб яшайдиган, Ватанимизнинг тақдири ва келажаги учун масъулиятни ўз зиммасига олишга, халқимиз интилаётган келажаги буюк давлат барпо этишга қодир бўлган баркамол авлодимиз”ни тарбиялаш борасида ўз фарзандларининг қизиқишлари ва қобилиятларига эътиборли бўлган барча ота-оналар билан ҳамкорликда иш олиб бораверамиз. Зеро, бугунги ёш авлоднинг баркамоллиги учун барчамиз бирдай масъулмиз.

Шокир ХУДОЙБЕРГАНОВ,