ТЎЛҚИНДА ШУНДАЙ ОИЛА БОР...

Аллоҳ Сиз-у бизга ато этган улуғ неъматларидан бири тинчликдир. У туфайли жаннатмакон юртимизда ҳар жабҳада янгиланиш ва юксалишлар бўлаяпти. Эрталабдан шоша-пиша ишга ошиқиб кетаётган одамларга қараганимизда, албатта, кўнглимизда ҳавас туйғуси уйғонади.

Эрталабдан иссиқ нон ёпиб,эл-дастурхонига туҳфа этиб, маҳалладошлари олқишига эришиб одамларнинг оғирини енгил қилаётган Шукурулло ака ва Робиға Эшжановлар оиласи ҳақида ҳам шундай дейиш мумкин. Сабаби ҳар ким ўзига яраша ҳурматга ва эътиборга қанчадан-қанча меҳнатлари орқали эришади.

Устоз деганимизда кўз олдимизда ўқувчиларга билим бериш билан бирга одоб-ахлоқ ўргатиб, қалбларга меҳр, қувонч улашаётган, маънавий етуклиги билан бошқалардан ажралиб турувчи улуғ инсон тушунилади. Умри давомида ўқитувчилик касби билан шуғулланиб, болаларга таълим-тарбия бериб, ўқувчиларнинг севимли устозлари бўлган Шукурулло ака ва Робиға опа Эшжановлар оиласи маҳаллада “Энг намунали оила” деб топилди ва 2018 йилда ўтказилган “Ибратли оила” кўрик-танловининг туман босқичида фахрли 3-ўринни эгаллашди.

Шукурулло ака ва Робиға опа иккови ҳам ўқитувчи бўлиб ишлашди ва 4 нафар фарзандини ўқитиб, олий маълумотли қилиб эл қаторига қўшишди. Шукурулло ака 32-мактабда директор ўринбосари лавозимида фаолият юритди, рафиқаси Робиға опа 33-мактабда 1984 йилдан 2016 йилгача ўқитувчилик касбини шараф билан адо этди. Ҳозирда нафақада бўлса ҳам тиниб-тинчимаган бу меҳнаткаш инсонлар “Шукурулло ота” оилавий корхонасини очиб, новвойхона ишга туширишди. Меҳмондўст, ширинсуҳан бу оилага кирсангиз, уларнинг бири-бирига иззат ва ҳурматини кўриб ҳавасингиз келади, аҳил ва иноқлик билан қилинаётган ишнинг баракаси бўлади, деган иборанинг исботини кўргандай бўласиз.

Энг катта фарзанд Нурбек оиладаги тадбиркорликни бошқаради. Ойбек Тошкент Ирригация ва мелиорация институтининг бакалавр ҳамда магистратура босқичларини тамомлаб, меҳнат фаолиятини бошлади. Қизи Сайёра эса ушбу институтнинг экология мутахассислиги бўйича бакалавр, магистратура босқичларини тугатиб, докторантурада илмий иш олиб бормоқда.

Оила фариштаси – Шукурулло аканинг онаси 90 ёшга кираётган Жонгил момо ҳар лаҳзада фарзандларини, невараларини дуо қилишдан чарчамайди. Нафақага чиқиб, оёғини узатиб, дам олиб ўтириш ўрнига ўғли Нурбек билан бирга тадбиркорликка ғайрат-шижоат билан киришиб кетган Шукурулло ака ва Робиға опаларнинг нияти ўзларининг шу мўъжаз қишлоғи одамларига хизмат қилиш, дуоларини олишдир.

Биз ҳам уларга ишларингизнинг баракасини берсин, деб тилаб қоламиз.

Юлдуз САФАРБОЕВА.