ОИЛАГА ҚУВОНЧ ЭМАС, ТАШВИШ ОЛИБ КЕЛГАН ЧАҚАЛОҚ

(Воқеий ҳикоя)

Фарида билан Ўктам тўйидан бир неча кунлар олдин, ота-оналари раъйига кўра учрашиб, турмуш қуришган бўлса-да, тўққиз йилдан бери сен-менга боришмади, бирини бири жониданда азиз билди. Фарзандсизлик ҳам уларнинг мустаҳкам боғланган ўзаро муҳаббат, меҳр-оқибат ришталарига рахна сололмади. Бироқ ёшлари ўттиздан ошиб, қирққа қараб кетаётгани учун бу муаммо кейинги йилларда уларни тобора қаттиқроқ азоблар эди. Ўктамнинг ота-онаси келинини туғмади деса, худди ўғли ундан кечиб юборадигандай, уларнинг фарзандли бўлишини қанчалар орзиқиб кутсада, тилига чиқаришмас, шу мавзуда гап очилса, “Яратганнинг карами кенг, умид қилайлик, атагани бордир”, – дейишарди, холос.

Ўша куни эр-хотин эрталабки нонушта пайти ўз қарорларини – яъни фарзанд асраб олишмоқчи эканлигини айтишганида шунинг учун ҳам ота-она аввал бироз рўйхушлик беришмади. Ахир ташлаб кетилган бола … қандай одам боласини ташлаб кетарди?.. Эрта-бир кун ноқобил аёлдан дунёга келган бола асли-наслига тортиб кетса, нима бўлади? Бизнинг ўзбекчилигимизда она ё ота вафот этганида ҳам ўз жигарбандини ҳеч ким қаровсиз қолдирмайди-да, қариндошлар ғамхўрлик қилади-да.

Чол-кампир узоқ мулоҳаза қилишди. Эртасига ниҳоят, нима бўлса ҳам яхшиликка бўлсин, эҳтимол бир етимга меҳрибонлик қилса, Худойим раҳм қилиб, ўзларига ҳам бериб қолар, деган умидда розилик билдиришди.

Ҳаммаси ўша кундан бошланди. Фарида болани янги туғилган вақтидан олсам, ким туғиб кетган бўлса ҳам, ўзим яхши тарбия бераман, деб ўйлаб, эрига буни жуда уқтирди. Керакли идораларга мурожаат қилишганида ҳам янги туғилган чақалоқ асраб олишмоқчи эканини айтишди. “Меҳрибонлик уйи” мудирасига телефон рақамларини бериб келганига қарамай, ўзлари ҳам кунора хабарлашиб туришди.

Бу дунёнинг бор шодлиги бола билан-да. Ота-боболаримиз ҳам болали уй – бозор, боласиз уй – мозор, деб бекорга айтишмаган.

Гарчи икки ойлик бўлса-да, кўзлари мунчоқдек- мунчоқдек, оппоқ юзлари беғубор, ширинтой қизалоқни хонадонига олиб келганидан бери Фарида фарзанд тотини яна ҳам чуқурроқ ҳис этди, назарида олам гулистон бўлиб кетгандай бўлди, ҳатто қизини “қутлуғ бўлсинлаб” келганларга кўрсатишга ҳам қизғаниб қолди. Баъзан уни бағрига босиб ўтириб, кўнглига: “Ким сени кўзи қийиб ташлаб кетган экан-а?” – деган ўй келар, ўз ўйидан ўзи қўрқиб кетиб, боласини маҳкамроқ қучоқлар, “сен ўзимникисан, фақат ўзимники” – дерди хаёлан.

Барча ташвишлар тиббиёт муассасаси ходимлари келиб, Фаридага “қизингизни касалликка қарши эмлашга олиб боринг, тиббий текширувдан ўтказинг”, – деган кунидан бошланди.

Фарида билан Ўктам худди бу ҳам бир ота-оналик мартабаси белгисидай, қизалоқни қўғирчоқдай ясатиб, болалар поликлиникасига олиб боришди. Барча тиббий текширувлардан ўтказишди, касалликка қарши эмлатишди.

– Қизингиздан олинган қон таҳлиллари натижасини кейин маълум қиламиз, ҳозирча ўсиб-улғайиши яхши, – деди уларни хотиржам қилиб ҳудуд шифокори.

Орадан ҳафта ўтиб, яна қон таҳлили топшириши лозимлигини айтишганида эр-хотин ҳанг-манг бўлиб қолишди.

– Ҳозирча бир нима дейишга эрта, шу таҳлил натижаси ҳам чиқсин, кейин гаплашармиз, – деди-да шифокор худди иши шошилинч одамдай, қоғоз титкилай бошлади.

Қон таҳлили натижаси … Орадан ҳафта ўтмай таҳлил натижасида қизалоқда ОИВ инфекцияси мавжудлиги аниқланганини айтиб келган тиббиёт ходимининг сўзларини Ўктам ҳам, Фарида ҳам гўё эшитмади, ё эшитса ҳам идрок этолмади. Чол-кампир ҳам худди кўзга кўринмас бир одам жонларини суғуриб олгандай, ўтирган жойларида мажолсиз вужудларга айланишди. Гўёки машъум хабар чароғон кундузни зулматга айлантиргандек, наинки зулмат, дунё остин-устун бўлиб кетгандек эди.

Зилдай оғир сониялар тўртала инсонни борган сари қаттиқроқ азоблар исканжасига олар, оппоқ чойшаблар тўшаб, маликалар тахтидай ясатилиб, ҳарир пардалар тутилган каравотчасига осилган ўйинчоқни митти қўлчалари билан тутишга уринаётган гўдаккина бу олам ташвишларидан, ўз туққан онасининг ҳайвоний нафсига эрк бериб, енгилтаклик йўлида ўзини қурбон қилиб юрганидан, шу йўлда орттирган бедаво касаллиги бегуноҳ норасида жонига дахл қилаётганидан бехабар эди…

Ойгул Ражабова.