ХИЗМАТИМИЗДАН АҲОЛИ МАМНУН

Туман Тиббиёт бирлашмасининг хўжалик ҳисобидаги реабилитация бўлими 2014 йилда ташкил қилинган. Бирйўла 36 нафар беморга тиббий хизмат кўрсатишга мўлжалланган бўлим хоналари барча шароитларга эга. Беморларга даволаниш жараёнида уч маҳал иссиқ парҳез овқат берилади.

Даволаш жараёнида бинонинг биринчи қаватида жойлашган физиотерапия бўлимида ҳар бир беморга мос равишда турли хил физиотерапевтик муолажалар ўтказилади.

Бўлимда 19 нафар тиббиёт ходими аҳолига хизмат кўрсатиб келмоқда. Катта ҳамшира Н.Абдримова, ҳамширалар Г.Камолова, Ш.Эшчанова, Б.Мадраҳимова, Ш.Шомуродова, М.Туркманбоева, Ф.Ўрозимбетовалар беморлар даволаниши жараёнида муолажаларнинг ўз вақтида бажарилиши, хоналар озода ва иссиқ бўлиши, бўлим санитария нормаларига мос келишини таъминлаб, аҳилликда иш олиб боришмоқда.

Бўлимда йил бошидан бери 1033 нафар бемор даволаниб, соғлигини тиклади. Улар орасида қўшни Қозоғистон Республикаси, Туркманистон Республикаси, Хоразм вилояти, Беруний тумани, Элликқалъа тумани, Нукус шаҳридан ҳам даволанишга келиб, дардларига шифо топиб, бизнинг тиббий хизматимиздан мамнун бўлиб кетган беморлар ҳам бор.

Келгусида ҳам беморларга сифатли тиббий ёрдам кўрсатиш мақсадида янги- янги даво усулларини жорий қилиб, даволашнинг самарадорлигини ошириш мақсадида бўлим шифокорлари ва ўрта тиббиёт ходимлари доимо ўз малакаларини ошириб борадилар.

Бугунги байрам муносабати билан жамоамиз номидан юртимизнинг барча тиббиёт ходимларини қизғин табриклаймиз. Меҳнаткаш ва меҳмондўст халқимизнинг саломатлигини муҳофаза қилиш йўлида олиб бораётган заҳматли ишларида катта зафарлар тилаймиз.

Фахриддин ИБОДУЛЛАЕВ,

Тиббиёт бирлашмаси хўжалик ҳисобидаги

реабилитация бўлими мудири.