Аҳоли билан учрашувлар ўтказилмоқда

Туманда ижтимоий-иқтисодий соҳада амалга оширилаётган ислоҳотлар, қиш мавсумига тайёргарлик ишлари, жамиятдаги ижтимоий-маънавий муҳитни соғломлаштириш, диний экстремизм ва унинг зарарли оқибатларини олдини олиш, огоҳликни ошириш, тинчлик неъматининг қадр-қимматини тарғиб этиш, фуқароларнинг турмушидаги муаммоларни муҳокама этиш ва учраётган муаммо ва камчиликларни бартараф этиш бўйича чора-тадбирларни белгилаш мақсадида ўтказилган мазкур учрашувга "Бойовул”, "Дурунки”, "Чордара” ва А.Навоий номли маҳаллаларда истиқомат қилаётган аҳоли вакиллари қатнашдилар.

Йиғилишда Қорақалпоғистон Республикаси Вазирлар Кенгаши Раисининг жамоат ва диний ташкилотлар билан алоқалор бўйича ўринбосари М.Алеуов, Қорақалпоғистон Республикаси Вазирлар Кенгаши Раисининг ўринбосари, Республика хотин-қизлар қўмитаси раиси З.Ибрагимова, Амударё тумани ҳокими Р.Йўлдашев, Қорақалпоғистон Республикаси вазирликлари, идоралар, ҳуқуқни муҳофаза қилиш органлари, корхоналар, ташкилотлар ва тижорат банклари  раҳбарлари иштирок этдилар.

 Кун тартибидаги масала юзасидан Қорақалпоғистон Республикаси Жўқорғи Кенгеси Раисининг ўринбосари А.Хамраев сўзга чиқиб, Қорақалпоғистон Республикасида ижтимоий-иқтисодий соҳада амалга оширилаётган ислоҳотлар, қиш мавсумига тайёргарлик ишлари, жамиятдаги ижтимоий-маънавий муҳитни соғломлаштириш, диний экстремизм ва унинг зарарли оқибатларини олдини олиш, огоҳликни ошириш, тинчлик неъматининг қадр-қимматини тарғиб этиш, яъни осайишта ва тинчликка ўз-ўзидан эришилмаётганлиги, бунга нафақат ҳуқуқни муҳофаза қилувчи органлари, балки барчамиз ҳам бу масалага эътиборли бўлишимиз кераклиги, бунда давлат ҳокимиятининг шаффофлиги принципларига амал қилиш лозимлиги, фуқароларнинг турмушидаги учраётган муаммоларни бартараф этиш чораларини кўриш бўйича вазифаларга кенг тўхталди.

 Туман ҳокими Р.Йўлдашев сўзга чиқиб, туманда ижтимоий-иқтисодий соҳада амалга оширилаётган ислоҳотлар тўғрисида тўхталиб ўтди. Мустақилликнинг илк йиллари билан бугунги кунларимизни солиштирар эканмиз, юртимиз, шаҳар ва қишлоқларимиз қиёфаси йилдан-йилга очилиб, тобора обод ва гўзал бўлиб бораётганига, барча ютуқларимизнинг ижодкори ва бунёдкори бўлган халқимизнинг онгу тафаккури, дунёқараши, ишга, ҳаётга муносабати бутунлай ўзгариб, ўз юрти тақдирига дахлдорлик туйғуси, ўз куч ва имкониятларига ишончи мустаҳкамланиб бораётганига гувоҳ бўламиз. "Обод турмуш йили” дея номланган жорий йилда туманимизда ҳам қатор ижобий натижаларга эришилди. Жумладан, жорий йилда туманимиз бўйича турли манбалар ҳисобидан 130-140 млрд. сўм миқдорида маблағлар ишлатилиб кенг кўламли қурилиш ва бунёдкорлик ишлари амалга оширилди. Ижтимоий инфратузилмани ривожлантириш мақсадида жами узунлиги 3,5 км бўлган давлат аҳамиятидаги ва ички хўжалик йўлларида 4,7 км капитал таъмирлаш ва янги қурилиш ишлари амалга оширилди, 70 та намунавий лойиҳалар асосидаги уй-жойлар, 1 та касб-ҳунар коллежи, 2 та қишлоқ врачлик пункти, 1 та мусиқа мактаби янгидан қурилди. Кўплаб таълим ва тиббиёт муассасаларида реконструкция ва капитал таъмирлаш ишлари амалга оширилди.

 Иқтисодиётнинг барқарор ўсиш суръатлари таъминланмоқда. Йил давомида 20 дан ортиқ лойиҳалар амалга оширилиб, 4500 дан ортиқ янги иш ўринлари яратилди.

 Амалга оширилган ижобий ишлар билан бир қаторда олдимизда турган ечимини кутаётган масалалар ҳам кўп. Жумладан, қиш мавсумига тайёргарлик борасида ҳали амалга ошириладиган ишлар талайгина. Бу борада коммунал хизмат кўрсатиш ташкилотлари олдида қатор вазифалар турибди.

 Шу билан бирга, жамиятдаги ижтимоий-маънавий муҳитни соғломлаштириш, диний экстремизм ва унинг зарарли оқибатларини олдини олиш, огоҳликни ошириш борасида ҳам зиммамизда катта масъулиятлар бор.

 Шу ва бошқа масалаларни тизимли равишда ҳал қилиш мақсадида Ўзбекистон Республикаси Вазирлар Маҳкамасининг топшириғига асосан Қорақалпоғистон Республикаси Жўқорғи Кенгеси ва Вазирлар Кенгаши томонидан жойларда давлат органлари мансабдор шахсларнинг аҳоли билан учрашувлари ташкил қилинмоқда. Ўйлайманки бугунги учрашувда билдириладиган таклиф, фикр ва мулоҳазалар, муаммо ва камчиликлар келгусида ўзининг ижобий ечимини топиб халқимиз турмуш тарзининг янада яхшиланишига хизмат қилади, деди туманимиз ҳокими ўз сўзида.

 Сўзга туман халқ таълими муассасалари фаолиятини методик таъминлаш ва ташкил этиш бўлими мудирининг биринчи ўринбосари А.Қўшаев, халқ депутатлари туман Кенгаши депутати Х.Аллакова ва бошқалар чиқиб, кун тартибидаги масалалар бўйича таклиф, фикр ва мулоҳазалар билдирдилар.

 Йиғилиш иштирокчилари кўтарилган масалалар бўйича билдирилган таклифларни қўллаб-қувватладилар. Кун тартибидаги масалалар юзасидан билдирилган фикр ва таклифларни ҳисобга олиган ҳолда тегишли қарор қабул қилинди.