Aholi bilan uchrashuvlar oʻtkazilmoqda

Tumanda ijtimoiy-iqtisodiy sohada amalga oshirilayotgan islohotlar, qish mavsumiga tayyorgarlik ishlari, jamiyatdagi ijtimoiy-maʼnaviy muhitni sogʻlomlashtirish, diniy ekstremizm va uning zararli oqibatlarini oldini olish, ogohlikni oshirish, tinchlik neʼmatining qadr-qimmatini targʻib etish, fuqarolarning turmushidagi muammolarni muhokama etish va uchrayotgan muammo va kamchiliklarni bartaraf etish boʻyicha chora-tadbirlarni belgilash maqsadida oʻtkazilgan mazkur uchrashuvga "Boyovul”, "Durunki”, "Chordara” va A.Navoiy nomli mahallalarda istiqomat qilayotgan aholi vakillari qatnashdilar.

Yigʻilishda Qoraqalpogʻiston Respublikasi Vazirlar Kengashi Raisining jamoat va diniy tashkilotlar bilan aloqalor boʻyicha oʻrinbosari M.Aleuov, Qoraqalpogʻiston Respublikasi Vazirlar Kengashi Raisining oʻrinbosari, Respublika xotin-qizlar qoʻmitasi raisi Z.Ibragimova, Amudaryo tumani hokimi R.Yoʻldashev, Qoraqalpogʻiston Respublikasi vazirliklari, idoralar, huquqni muhofaza qilish organlari, korxonalar, tashkilotlar va tijorat banklari  rahbarlari ishtirok etdilar.

 Kun tartibidagi masala yuzasidan Qoraqalpogʻiston Respublikasi Joʻqorgʻi Kengesi Raisining oʻrinbosari A.Xamrayev soʻzga chiqib, Qoraqalpogʻiston Respublikasida ijtimoiy-iqtisodiy sohada amalga oshirilayotgan islohotlar, qish mavsumiga tayyorgarlik ishlari, jamiyatdagi ijtimoiy-maʼnaviy muhitni sogʻlomlashtirish, diniy ekstremizm va uning zararli oqibatlarini oldini olish, ogohlikni oshirish, tinchlik neʼmatining qadr-qimmatini targʻib etish, yaʼni osayishta va tinchlikka oʻz-oʻzidan erishilmayotganligi, bunga nafaqat huquqni muhofaza qiluvchi organlari, balki barchamiz ham bu masalaga eʼtiborli boʻlishimiz kerakligi, bunda davlat hokimiyatining shaffofligi printsiplariga amal qilish lozimligi, fuqarolarning turmushidagi uchrayotgan muammolarni bartaraf etish choralarini koʻrish boʻyicha vazifalarga keng toʻxtaldi.

 Tuman hokimi R.Yoʻldashev soʻzga chiqib, tumanda ijtimoiy-iqtisodiy sohada amalga oshirilayotgan islohotlar toʻgʻrisida toʻxtalib oʻtdi. Mustaqillikning ilk yillari bilan bugungi kunlarimizni solishtirar ekanmiz, yurtimiz, shahar va qishloqlarimiz qiyofasi yildan-yilga ochilib, tobora obod va goʻzal boʻlib borayotganiga, barcha yutuqlarimizning ijodkori va bunyodkori boʻlgan xalqimizning ongu tafakkuri, dunyoqarashi, ishga, hayotga munosabati butunlay oʻzgarib, oʻz yurti taqdiriga daxldorlik tuygʻusi, oʻz kuch va imkoniyatlariga ishonchi mustahkamlanib borayotganiga guvoh boʻlamiz. "Obod turmush yili” deya nomlangan joriy yilda tumanimizda ham qator ijobiy natijalarga erishildi. Jumladan, joriy yilda tumanimiz boʻyicha turli manbalar hisobidan 130-140 mlrd. soʻm miqdorida mablagʻlar ishlatilib keng koʻlamli qurilish va bunyodkorlik ishlari amalga oshirildi. Ijtimoiy infratuzilmani rivojlantirish maqsadida jami uzunligi 3,5 km boʻlgan davlat ahamiyatidagi va ichki xoʻjalik yoʻllarida 4,7 km kapital taʼmirlash va yangi qurilish ishlari amalga oshirildi, 70 ta namunaviy loyihalar asosidagi uy-joylar, 1 ta kasb-hunar kolleji, 2 ta qishloq vrachlik punkti, 1 ta musiqa maktabi yangidan qurildi. Koʻplab taʼlim va tibbiyot muassasalarida rekonstruktsiya va kapital taʼmirlash ishlari amalga oshirildi.

 Iqtisodiyotning barqaror oʻsish surʼatlari taʼminlanmoqda. Yil davomida 20 dan ortiq loyihalar amalga oshirilib, 4500 dan ortiq yangi ish oʻrinlari yaratildi.

 Amalga oshirilgan ijobiy ishlar bilan bir qatorda oldimizda turgan yechimini kutayotgan masalalar ham koʻp. Jumladan, qish mavsumiga tayyorgarlik borasida hali amalga oshiriladigan ishlar talaygina. Bu borada kommunal xizmat koʻrsatish tashkilotlari oldida qator vazifalar turibdi.

 Shu bilan birga, jamiyatdagi ijtimoiy-maʼnaviy muhitni sogʻlomlashtirish, diniy ekstremizm va uning zararli oqibatlarini oldini olish, ogohlikni oshirish borasida ham zimmamizda katta masʼuliyatlar bor.

 Shu va boshqa masalalarni tizimli ravishda hal qilish maqsadida Oʻzbekiston Respublikasi Vazirlar Mahkamasining topshirigʻiga asosan Qoraqalpogʻiston Respublikasi Joʻqorgʻi Kengesi va Vazirlar Kengashi tomonidan joylarda davlat organlari mansabdor shaxslarning aholi bilan uchrashuvlari tashkil qilinmoqda. Oʻylaymanki bugungi uchrashuvda bildiriladigan taklif, fikr va mulohazalar, muammo va kamchiliklar kelgusida oʻzining ijobiy yechimini topib xalqimiz turmush tarzining yanada yaxshilanishiga xizmat qiladi, dedi tumanimiz hokimi oʻz soʻzida.

 Soʻzga tuman xalq taʼlimi muassasalari faoliyatini metodik taʼminlash va tashkil etish boʻlimi mudirining birinchi oʻrinbosari A.Qoʻshayev, xalq deputatlari tuman Kengashi deputati X.Allakova va boshqalar chiqib, kun tartibidagi masalalar boʻyicha taklif, fikr va mulohazalar bildirdilar.

 Yigʻilish ishtirokchilari koʻtarilgan masalalar boʻyicha bildirilgan takliflarni qoʻllab-quvvatladilar. Kun tartibidagi masalalar yuzasidan bildirilgan fikr va takliflarni hisobga oligan holda tegishli qaror qabul qilindi.