Мактаб имижи таълим сифатини белгилайди
Ҳозирги кунда умумтаълим муассасаларининг ўзига хос имижини яратиш вазифа қилиб қўйилмоқда. Хўш, таълим муассасаси имижи нима? Имиж – яъни ўзига хос қиёфа – мактабнинг жойлашиши, мевали, манзарали дарахтлар, гуллар билан безатилиши, ўқувчиларга таълим бериш даражаси, ўқитувчиларнинг салоҳияти, таълим олаётган ёшларнинг ютуқлари, ўқитувчи ва ўқувчиларнинг кийиниши, муомала одобини ҳам ўз ичига қамраб олади.
75 нафар тажрибали ва малакали устозлар 736 нафар ўқувчиларга таълим-тарбия бераётган бизнинг 11-сонли умумтаълим мактабимизда ҳам бугунги кун талаблари ўз аксини топмоқда.
Мактабимиз ўқувчиларимизнинг ҳар хил кўрик-танловларда, билимлар беллашувларида, фанлар олимпиадасида эришган кўрсаткичлари бўйича туманда биринчи ўнликдан жой олганлиги устоз ўқитувчиларнинг қай даражада меҳнат қилаётганликларини кўрсатади.
Бола қалби – очилмаган қўриқ. Уни тарбиялаш, илмли қилиш ўқитувчи маҳоратига боғлиқ. Шуларни ҳисобга олиб, жамоамиз аъзоларининг малакасини ошириб боришига эришаяпмиз.
Мактабимизда ўтган ўқув йили охирида ўқувчиларнинг синф раҳбари, ота-оналари иштирокида мажлис ўтказиб, ўқувчи мактаб формасининг янгича имижини қабул қилдик.
Янги ўқув йилида эса болалар ана шу формада келишларини таъминладик. Бу таклифимизни ота-оналар ҳам маъқуллашди. Чунки янги ўқув йилига ўғлини, қизини кийинтириш учун бозорга олиб борган ота-она аввало энг мақбулини танлашда қийналади. Қолаверса, фарзанди у қандай матодан тикилган, ёшига, гавдасига мос келганини эмас, кўримли ва қиммат кийимларни талаб қилиши ҳаммага аён. Бизнинг танлаган формамиз эса 30-35 минг сўмлар атрофида бўлди. Бу ота-оналарни янги ўқув йилига кийим олиб бериш ташвишидан қутқарди. Энг муҳими эса синфда барча ўқувчиларнинг тинч-хотиржамлигини таъминлади. Диққатини чалғитувчи қимматбаҳо кийимлар кийилишига барҳам берилди. Ўқитувчиларнинг ҳам махсус мактаб формада бўлиши нур устига аъло нур бўлди.
Мактаб таълим-тарбиясида иккинчи даражали ишнинг ўзи йўқ. Синфхоналарни, коридорларни таълимга алоқадор суратлар, ибратли мақоллар, гуллар билан безатиш, кўргазмали қуроллар асосида интерфаол усуллардан фойдаланиб дарсни ўтиш каби муҳимдир. Чунки чор-атрофидаги гўзаллик боланинг дидини ўстиришга хизмат қилади. Шу боисдан ҳам мактабимизнинг ташқи ва ички кўринишини имкониятларимиз даражасида яхшилашга ҳаракат қилаяпмиз. Ободонлаштириш, кўкаламзорлаштиришга эътиборни кучайтириб, кичик-кичик гулзорлар ташкил этдик. Келгуси кўкламда мевали, манзарали дарахтлар ўтқазиш учун ариқлар қазиб, тайёрлаб қўйдик ва қайси ҳудудга қайси синф масъул эканлигини ҳам белгиладик.
Ўз касбининг фидойиси, тинмай ўз малакасини ошириб, бу билимларини ўз жойида қўллаб семинар-тренинглар ташкил қилаётган ўқитувчиларимиз мақсади муассасамиз ички қиёфаси яъни таълим-тарбия сифатини юқори поғоналарга кўтаришдир.
Устоз нияти доимо эзгу бўлади. Биз ҳозир синфхона парталарида ўтирган болажонларимизнинг қиёфасида эртаги куннинг етук инсонлари, малакали мутахассисларни, ўз юртининг фидойиларини кўргимиз келади. Бутун фаолиятимиз орзуларимизнинг ижобат бўлишига қаратилган.
Барча ўқитувчиларни, устозларни касб байрами билан қутлаб, шогирдлар камолини кўриб, узоқ умр кўришини тилайман.
Зулфия ЮСУПОВА,
11-сонли умумтаълим мактаби директори.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
