ХОТИPА ТУPНИPИ ЎТКАЗИЛДИ

Яхши инсонлар ёди хотираларда мангу яшайди. Айниқса, эзгуликлар асло унутилмайди. Ёш авлодга таълим бериш борасидаги эзгу ишлари билан умрни безаб ўтган Норимбат Хўрозов ҳам торёпликлар хотирасида яхши инсон сифатида барҳаёт яшайди.

Тумандаги 51-мактабда 1979 йилдан 2011 йилга қадар жисмоний тарбия ўқитувчиси бўлиб ишлаган Норимбат Хўрозов 32 йиллик иш фаолияти давомида ёш авлоднинг спорт билан шуғулланишларига имконият яратиб, жисмоний тарбияга қизиқишларини орттирди. Шогирдлар етиштириб, спортчилар сафини кенгайтирди ҳамда туманда спорт ва жисмоний тарбия ривожланишига муносиб ҳисса қўшди.

25 февраль куни 51-мактабда эҳтиромга сазавор бўлган устоз Норимбат Хўрозов хотираси ёдга олиниб, спортнинг футбол, стол теннис ва волейбол турлари бўйича очиқ турнир ўтказилди. Норимбат Хўрозовнинг шогирдлари Шавкат Қурбонбоев ва жисмоний тарбия ўқитувчиси Сарсенбой Нуржоновлар томонидан ташкиллаштирилган Хотира турнирида 44-, 51-мактаб ўқитувчилари ва ўқувчилари, “Муллашоли” маҳалласи спортчилари иштирок этдилар.

Хотира турнирида волейбол бўйича ўтказилган мусобақа ўқитувчилардан ташкил топган жамоалар ўртасида бўлиб ўтди. Футбол ва стол тенниси бўйича ўтказилган мусобақаларда эса ўқувчилардан ташкил топган жамоалар қатнашдилар.

Қизғин ўтган мусобақалар якунида волейбол бўйича 1-ўрин 44-мактаб жамоасига, 2-ўрин 51-мактаб жамоасига ва 3-ўрин “Муллашоли” маҳалласи жамоасига берилди. Футбол бўйича ўғил ва қиз болалар ўртасида алоҳида ўтказилган мусобақаларда 51-мактабнинг 10-синф, ўғил болалардан ташкил топган ҳамда 10-синф қиз болалардан ташкил топган жамоалар 1-ўрин, 9-синфнинг ўғил болалар жамоаси ҳамда 6-синфнинг қиз болалар жамоалари 2-ўрин ғолиби деб топилдилар. Стол тенниси мусобақаларида иштирок этган спортчилардан 10-синф ўқувчиси Наргиза Шомуродова ва 9-синф ўқувчиси Замонбек Ортиқбоевлар 1-ўринни эгалладилар.

Устоз Норимбат Хўрозов хотирасига бағишлаб 51-мактабда ўтказилган Хотира турнири спорт мусобақалари барчада катта таассурот қолдирди.

Озода ХУДОЙБЕPГАНОВА