XOTIPA TUPNIPI OʻTKAZILDI

Yaxshi insonlar yodi xotiralarda mangu yashaydi. Ayniqsa, ezguliklar aslo unutilmaydi. Yosh avlodga taʼlim berish borasidagi ezgu ishlari bilan umrni bezab oʻtgan Norimbat Xoʻrozov ham toryopliklar xotirasida yaxshi inson sifatida barhayot yashaydi.

Tumandagi 51-maktabda 1979-yildan 2011-yilga qadar jismoniy tarbiya oʻqituvchisi boʻlib ishlagan Norimbat Xoʻrozov 32-yillik ish faoliyati davomida yosh avlodning sport bilan shugʻullanishlariga imkoniyat yaratib, jismoniy tarbiyaga qiziqishlarini orttirdi. Shogirdlar yetishtirib, sportchilar safini kengaytirdi hamda tumanda sport va jismoniy tarbiya rivojlanishiga munosib hissa qoʻshdi.

25-fevral kuni 51-maktabda ehtiromga sazavor boʻlgan ustoz Norimbat Xoʻrozov xotirasi yodga olinib, sportning futbol, stol tennis va voleybol turlari boʻyicha ochiq turnir oʻtkazildi. Norimbat Xoʻrozovning shogirdlari Shavkat Qurbonboyev va jismoniy tarbiya oʻqituvchisi Sarsenboy Nurjonovlar tomonidan tashkillashtirilgan Xotira turnirida 44-, 51-maktab oʻqituvchilari va oʻquvchilari, “Mullasholi” mahallasi sportchilari ishtirok etdilar.

Xotira turnirida voleybol boʻyicha oʻtkazilgan musobaqa oʻqituvchilardan tashkil topgan jamoalar oʻrtasida boʻlib oʻtdi. Futbol va stol tennisi boʻyicha oʻtkazilgan musobaqalarda esa oʻquvchilardan tashkil topgan jamoalar qatnashdilar.

Qizgʻin oʻtgan musobaqalar yakunida voleybol boʻyicha 1-oʻrin 44-maktab jamoasiga, 2-oʻrin 51-maktab jamoasiga va 3-oʻrin “Mullasholi” mahallasi jamoasiga berildi. Futbol boʻyicha oʻgʻil va qiz bolalar oʻrtasida alohida oʻtkazilgan musobaqalarda 51-maktabning 10-sinf, oʻgʻil bolalardan tashkil topgan hamda 10-sinf qiz bolalardan tashkil topgan jamoalar 1-oʻrin, 9-sinfning oʻgʻil bolalar jamoasi hamda 6-sinfning qiz bolalar jamoalari 2-oʻrin gʻolibi deb topildilar. Stol tennisi musobaqalarida ishtirok etgan sportchilardan 10-sinf oʻquvchisi Nargiza Shomurodova va 9-sinf oʻquvchisi Zamonbek Ortiqboyevlar 1-oʻrinni egalladilar.

Ustoz Norimbat Xoʻrozov xotirasiga bagʻishlab 51-maktabda oʻtkazilgan Xotira turniri sport musobaqalari barchada katta taassurot qoldirdi.

Ozoda XUDOYBEPGANOVA