БОБОМНИНГ НУРАФШОН ЧИРОFИ
Биз урушни кўрмаганмиз. Минг-минг шукурки, болалигимиз, ёшлигимиз тинч-осойишта ўтмоқда. Лекин болалик хотираларим тасаввуримда жонланганда раҳматлик бобомнинг оловли йиллар ҳақидаги ҳикоялари ёдимга тушади. Иккинчи жаҳон уруши жангоҳларида оёғидан, елкасидан яралангани сабабли то умрининг охиригача азият чекиб яшаганларига гувоҳман.
"Чойкўл” овулининг "Шайх қалъа” маҳалласида яшаб, шу овул ва маҳалланинг гуллаб-яшнаши, фаровонлиги учун жуда кўп фидойиликлар қилган бобом Чоршам Сейтаков ўта ҳалол ва меҳнаткаш инсон эдилар. Беозор, камсуқум, камгап бобомни эл-юрт "Чоршам колхоз” деб эъзозларди. Иккинчи жаҳон урушининг бошидан то буюк ғалаба кунигача фашизмга қарши мардонавор жанг қилган бобом баъзиларга ўхшаб: "Мен уруш иштирокчисиман”, – деб ҳукумат идоралари эшигини очиб бормас, ҳатто Иккинчи жаҳон уруши фахрийлари учун яратилган имкониятлардан ҳам фойдаланмас эдилар.
– Қўй, болам, – дердилар доим шукроналик билан, –уруш майдони – дўзах оловидай жой эди. Мен ана шу жаҳаннам оғзидан қайтиб келиб, униб-ўсиб, шу кунга етдим. Урушдан кейинги умримнинг ҳар лаҳзаси бир йилдай қадрли. Шундан улуғ мукофот борми?!
Овулимиздаги мактабларнинг ўқувчилари байрам кунлари, айниқса, 9 май – Хотира ва қадрлаш кунида бобомнинг уруш хотиралари ҳақидаги суҳбатларини тинглагани келишарди. Шунда бобом:
– Урушнинг номи ўчсин, болаларим, – дердилар кўзлари намланиб. – Мана бу тинчлик замонидан сўзлайлик. Урушни биз кўрдик, сизлар асло кўрманглар. Олтинга тенг дориломон кунларнинг қадрига етинглар!
Бобом Чоршам Сейтаков Иккинчи жаҳон урушидаги жасорати учун бир неча жанговар медаллар, "II Даражали Ватан уруши” ордени билан тақдирланган эдилар. У киши то умрининг охиригача "Чойкўл” овулида аграр соҳани ривожлантириш, маҳалла ободлиги йўлида фидойи хизматлар қилиб, камтарона ҳаёт кечирдилар.
Ҳар гал 9 май – Хотира ва қадрлаш куни муносабати билан овулдаги бобом яшаган катта хонадонга унинг ўғил-қизлари, невара-чеваралари йиғилишиб, бобомнинг хотирасига ҳурмат-эҳтиром кўрсатишади, қабри пойига гуллар қўйиб, ҳақларига қуръон тиловат қилишади. Бобом яшаган қутлуғ макон – Чоршамовлар оиласи сифатида овул аҳлининг ҳурмат-эҳтиромига муносиб, бу хонадондан асло яхшилар қадами узилмайди. Тинчлик учун курашган бобомнинг нурафшон чироғи эл-юртга сўнмас нур таратиб турганидан ҳамиша фахрланамиз.
Гулбаҳор ЧОРШАМОВА, "Чойкўл” овули.
(Фото - http://uza.uz)
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
