СИЛ – МАККОР КАСАЛЛИК

Сил юқумли касаллик бўлиб, уни кўзга кўринмайдиган майда бактериялар – сил таёқчалари юзага келтиради. Кўп ҳолларда сил таёқчалари ўпкани зарарлайди. Баъзи ҳолларда мия ва мия қобиғи, суяклар, бўғинлар, буйраклар, жинсий аъзолар, кўз ва ичак сили учраши мумкин. Сил таёқчалари организмга нафас йўли орқали ўтади, ўпка тўқималарида ривожланади ва кўпаяди.Сил бактериялари бемор йўталганда, аксирганда, қаттиқ гаплашганда, тупурганда балғам зарралари билан тарқалади. Бу кўзга кўринмас балғам зарраларида минглаб сил таёқчалари бўлади, улар ҳавода, айниқса, хона ҳавосида узоқ вақт сақланиб қолади.

Касалликнинг ривожланиши организмнинг касалликка қарши курашувчанлигига боғлиқ. Соғлом турмуш тарзига риоя қилмаслик, вақтида дам олмаслик, гиёҳвандлик, кашандалик, спиртли ичимликларга ружу қўйиш, касаллика қарши курашувчанлик хусусиятларини сусайтиради ҳамда сил касаллигининг ривожланишига замин яратади.

Сил – маккор касаллик. Маккорлиги шундаки, у кўп ҳолларда грипп ёки нафас йўлларининг шамоллаши ниқоби остида кечади. Нафас йўлларининг шамоллашида ишлатиладиган дорилар эса сил таёқчаларини ўлдира олмайди. Оқибатда одам касалликни ўтказиб юборади. Агар бемор вақтида даволанмаса, йўтал кучайиб, балғам ажралиб чиқади, баъзан қон тупуради. Бунда йўтал 2 ҳафта ортиқ давом этади, иситма кўтарилади, дармони қуриб, тез чарчайди, озиб кетади, иштаҳа бўлмайди, кўкрак қафасида оғриқ пайдо бўлади.

Шуни унутмангки, шифокорга қанчалик эрта мурожаат қилинса, даволаниш шунчалик самарали бўлади. Чунки сил касаллиги бедаво эмас, ўз вақтида тўғри даволанса, бу касалликдан бутунлай соғайиш мумкин.

Сил ирсий касаллик эмас, у наслдан-наслга ўтмайди. Фақат яқин мулоқотда бўлганлиги сабабли, беморнинг оила аъзоларига касалликнинг юқиш эҳтимоли юқори бўлади.

Сил касаллигини аниқлаш ва даволаш хизматлари бепул.

Ҳозирги вақтда силга қарши эмлаш (БЦЖ) туғруқхонада, чақалоқ ҳаётининг биринчи кунларида ўтказилади. Эмлашнинг таъсири  5-7 йилдан кейин камаяди. Шу муносабат билан қайта эмланиш ўтказилади.

Саломатлик деб аталмиш буюк неъматнинг қадрига уни йўқотмасдан туриб етинг!

(Фото - pressnews.uz)