Юқумли касалликларнинг олдини олишга қаратилган тарғибот ишлари кучайтирилмоқда

Амударё туманида аҳоли саломатлигини муҳофаза қилиш, жамоат хавфсизлигини таъминлаш ҳамда турли юқумли касалликларнинг олдини олишга қаратилган тарғибот ва тушунтириш ишлари изчил давом эттирилмоқда. Айниқса, бугунги кунда санитария-гигиена қоидаларига қатъий риоя этиш, соғлом турмуш тарзини шакллантириш ва касалликларнинг тарқалиш хавфини бартараф этиш масалалари долзарб аҳамият касб этмоқда. Шу боис, туман санитария-эпидемиологик осойишталик ва жамоат саломатлиги бўлими ходимлари томонидан маҳаллаларда кенг қамровли профилактик тадбирлар амалга оширилмоқда.

Мутахассисларнинг таъкидлашича, юқумли касалликлар бактериялар, вируслар, замбуруғлар ва паразитлар сингари турли микроорганизмлар таъсирида келиб чиқади. Уларнинг энг хавфли жиҳати шундаки, бундай касалликлар бир инсондан бошқасига осон юқиши мумкин. Касалликлар ҳаво-томчи, маиший мулоқот, ифлос қўл, сифатсиз озиқ-овқат ёки ичимлик суви, шунингдек, санитария талабларига риоя этилмаган муҳит орқали тарқалиши мумкин. Айрим ҳолатларда эса мавсумий омиллар, аҳолининг гавжум жойларда кўп бўлиши ва шахсий гигиена қоидаларига бепарволик ҳам юқумли хасталикларнинг тарқалишига сабаб бўлади.

Шу нуқтаи назардан, туман санитария-эпидемиологик осойишталик ва жамоат саломатлиги бўлими томонидан маҳаллаларда олиб борилаётган тарғибот ишлари аҳолининг бу борадаги билимини оширишга хизмат қилмоқда. Профилактик тадбирлар давомида фуқароларга юқумли касалликларнинг келиб чиқиш сабаблари, уларнинг дастлабки белгилари, юқиш йўллари ҳамда энг муҳими, олдини олиш чоралари ҳақида кенг тушунтиришлар берилмоқда. Айниқса, қўлларни тез-тез совунлаб ювиш, тоза ичимлик сувидан фойдаланиш, озиқ-овқат маҳсулотларини тўғри сақлаш, хонадон ва атроф-муҳит тозалигига эътибор қаратиш, беморлар билан мулоқотда эҳтиёткор бўлиш каби оддий, аммо муҳим қоидаларнинг аҳамиятига алоҳида урғу берилмоқда.

Таъкидлаш жоизки, бу каби тарғибот ишлари фақатгина оғзаки тушунтиришлар билан чекланиб қолмаяпти. Бўлим ходимлари аҳоли билан профилактик суҳбатлар ва учрашувлар ўтказиб, турли ёш тоифалари ва ижтимоий қатлам вакиллари билан манзилли иш олиб бормоқда. Шунингдек, тиббиёт ходимлари иштирокида семинар ва маърузалар ташкил қилиниб, улар орқали юқумли касалликларни эрта аниқлаш ва ўз вақтида шифокорга мурожаат қилиш маданиятини шакллантиришга эътибор қаратилмоқда.

Бундан ташқари, санитария-гигиена қоидаларига бағишланган буклет ва плакатлар тарқатилиши ҳам аҳолига қулай ва тушунарли шаклда маълумот етказишда муҳим восита бўлмоқда. Айниқса, мактаб ва мактабгача таълим муассасаларида олиб борилаётган тарғибот ишлари ёш авлод онгида соғлом турмуш тарзи кўникмаларини мустаҳкамлашга хизмат қилмоқда. Болаларга шахсий гигиена, озодалик, тўғри овқатланиш ва жамоат жойларида ўзини тутиш қоидалари ҳақида тушунчалар берилиши келгусида жамият саломатлигини янада мустаҳкамлашда муҳим аҳамият касб этади.

Шу билан бирга, оммавий ахборот воситалари ва ижтимоий тармоқлар орқали ҳам аҳолига тезкор ва ишончли маълумотлар етказиш чоралари кўрилмоқда. Бу эса нафақат профилактика ишларининг қамровини кенгайтирмоқда, балки одамларнинг саломатликка дахлдор масалаларда масъулиятини оширишга ҳам хизмат қилмоқда. Зеро, ҳар бир инсон ўз саломатлигига бефарқ бўлмаса, оила ва жамият саломатлигини асрашга муносиб ҳисса қўшган бўлади.

Амударё туманида юқумли касалликларнинг олдини олишга қаратилган профилактика ва тарғибот ишлари изил давом эттирилмоқда. Бу йўналишдаги саъй-ҳаракатлар фуқароларнинг тиббий маданиятини ошириш, касалликларнинг тарқалиш хавфини камайтириш ва соғлом турмуш тарзини қарор топтиришга хизмат қилаётгани билан аҳамиятлидир. Энг муҳими, бундай тадбирлар ҳар бир инсонни ўз саломатлиги учун масъул бўлишга, тозалик ва эҳтиёткорликни кундалик ҳаёт тарзига айлантиришга ундайди.

И.Юсупов, Амударё туман СЭО ва ЖСБ санитария врачи