Амударё туманида ғўза парвариши ва инновацион технологияларга бағишланган кўргазмали семинар ўтказилди

Қишлоқ хўжалиги мамлакатимиз иқтисодиётининг энг муҳим ва таянч тармоқларидан бири ҳисобланади. Айниқса, пахтачилик соҳасида амалга оширилаётган изчил ислоҳотлар, ерга бўлган муносабатнинг тубдан ўзгариши ҳамда илғор хорижий тажрибаларнинг амалиётга кенг татбиқ этилиши натижасида мўл ва сифатли ҳосил етиштириш учун мустаҳкам замин яратилмоқда.

Баҳорги экин-тикин ишлари якунига етиб, ғўза ниҳоллари текис униб чиққан айни шу масъулиятли паллада уларни тўғри ва агротехник талаблар асосида парвариш қилиш деҳқонлардан катта эътибор, билим ҳамда маҳорат талаб этади. Бу борада, айниқса, ғўза қатор ораларига биринчи ишлов бериш, яъни культивация жараёнларини сифатли ҳамда ўз вақтида ўтказиш келажак ҳосил тақдирини ҳал қилувчи асосий омиллардан биридир. Шу мақсадда жойларда мунтазам равишда ташкил этилаётган кўргазмали ўқув-амалий семинарлари кластер корхоналари, фермер хўжаликлари раҳбарлари ва механизаторлар учун ўзига хос тажриба алмашиш мактаби бўлиб хизмат қилмоқда.

Ана шундай тадбирлардан бири Амударё туманининг Қиличбой овули ҳудудида ҳам бўлиб ўтди. Мазкур ҳудудда самарали фаолият юритаётган "Амирхон" фермер хўжалиги далаларида ғўза қатор ораларини культивация қилиш масалаларига бағишланган кенг қамровли кўргазмали семинар ташкил этилди. Ушбу семинарда нафақат жорий йилги ҳосил тақдирига дахлдор бўлган кечиктириб бўлмас агротехник тадбирларни белгилаб олиш, балки қишлоқ хўжалиги соҳасига кириб келаётган янги инновацион технологиялар ҳамда хориж тажрибаси билан яқиндан танишиш масаласи ҳам муҳокамалар марказида бўлди.

Маълумот ўрнида таъкидлаш жоизки, жорий йилда Амударё тумани бўйича жами 13 минг гектар майдонга чигит экилган. Бугунги кунда деярли барча майдонларда уруғлар бир текис униб чиққан бўлиб, ҳудудлардаги барча фермер хўжаликларида парвариш жараёнлари энг қизғин паллага кирган. Деҳқонларнинг фидокорона меҳнатлари натижасида қисқа вақт ичида туман бўйича ғўза қатор ораларига ишлов берилган, яъни культивация қилинган майдонлар ҳажми 1 500 гектарга яқинлашди.

Албатта, бундай кенг кўламдаги майдонларда агротехник тадбирларни сифатли ўтказиш мақсадида замонавий техника ва механизмлардан унумли фойдаланиш, шунингдек, соҳа вакилларининг тавсияларига қатъий амал қилиш талаб этилади. Шу мақсадда "Амирхон" фермер хўжалигида ташкил этилган кўргазмали семинарда туман ҳокими Собир Хўжаметов бошчилигидаги раҳбарлар, аграр соҳа масъуллари, кластер корхоналари вакиллари ҳамда ҳудуддаги фермерлар иштирок этишди.

Туман ҳокими ва бошқа масъуллар ўз сўзида глобал иқлим ўзгаришлари ва сув ресурсларининг тақчиллиги шароитида ҳар бир қарич ердан оқилона фойдаланиш, илм-фан ютуқларини амалиётга жорий этиш давр талаби эканлигини таъкидлашди. Шунингдек, мутасаддилар томонидан культивация жараёнида эътибор қаратиш лозим бўлган энг муҳим жиҳатлар, хусусан, тракторларнинг юриш тезлиги, ишчи органларнинг созлиги ҳамда тупроқни юмшатиш чуқурлигига доир аниқ кўрсатмалар бериб ўтилди.

Бугунги кунда юртимиз қишлоқ хўжалигида дунёнинг ривожланган давлатлари тажрибаларини ўзлаштиришга ва амалиётга татбиқ этишга катта эътибор қаратилмоқда. Жумладан, пахтачилик йўналишида Хитой технологиясининг жорий этилиши ҳосилдорликни оширишда муҳим қадамлардан бири бўлмоқда. Семинарда иштирок этган хитойлик мутахассис Хитой усулида экилган пахтани парвариш қилишнинг ўзига хос жиҳатлари, унинг парваришидаги муҳим агротехник талаблар ҳақида йиғилганларга батафсил маълумот ва тушунчалар берди. Хорижлик агроном томонидан берилган қимматли маслаҳатлар ва йўриқномалар ғўза парваришида йўл қўйилиши мумкин бўлган хатоларнинг олдини олиш ҳамда ҳосилдорликни сезиларли даражада оширишга хизмат қилиши шубҳасиздир.

Агротехник тадбирларни юқори сифатда ва қисқа муддатларда ўтказишда замонавий ҳамда кучли техникаларнинг ўрни беқиёсдир. Айни кунларда "Амирхон" фермер хўжалиги далаларида олиб борилаётган культивация жараёнларида Туркиядан келтирилган энг сўнгги русумдаги замонавий мосламалардан фойдаланилмоқда. Бу техникалар ўзининг бир қатор афзалликлари билан аввалги авлод мосламаларидан тубдан фарқ қилади. Тадбир иштирокчилари ушбу хорижий техниканинг даладаги амалий ишини ўз кўзлари билан кузатар эканлар, унинг унумдорлигига ва иш сифатига юқори баҳо бердилар. Ушбу кўп функцияли инновацион культиватор бир вақтнинг ўзида бир нечта муҳим вазифаларни бажариш хусусиятига эга. У нафақат ғўза қатор ораларидаги тупроқни белгиланган меъёрда ва бир текисда юмшатади, балки шу билан биргаликда ўсимликка зарур бўлган озиқа моддаларини, яъни минерал ўғитларни ҳам бериб кетади. Энг эътиборли жиҳатлардан бири шундаки, мазкур замонавий агрегат ғўзани тубигача юмшатиш қобилиятига эга. Бу жараён илдиз тизимининг кислород билан тўлиқ тўйинишини таъминлайди ва ер остидаги табиий намликни узоқ вақт сақлаб қолишга ёрдам беради. Бундай тежамкор ва унумдор техникаларнинг далаларимизда кенг ишлатилиши нафақат қимматли вақт ва ёқилғини тежашга, балки оғир қўл меҳнатини камайтириб, умумий иш сифатини юқори даражага кўтаришга хизмат қилмоқда.

Кўргазмали амалий семинар туманнинг барча қишлоқ хўжалиги ходимлари, агрономлари ва механизаторлари учун жорий йилги пахта ҳосилини етиштиришда ўзига хос тажриба мактаби вазифасини ўтади. Юртимизнинг улкан хирмони янада юксалишига, туман иқтисодиётининг барқарор мустаҳкамланишига ва энг асосийси, элимиз фаровонлигининг ошишига хизмат қилувчи бундай эзгу ва режали саъй-ҳаракатлар натижасида жорий йилда ҳам Амударё тумани пахтакорлари контрактация шартномалари шартларини ортиғи билан бажаришига шубҳа йўқ.