Қорақалпоғистон Республикаси Конституцияси қабул қилинганлигининг 33 йиллиги кенг нишонланди

Ҳар бир юртнинг тарихида муҳим саналар ва воқеалар бўлади. Қорақалпоғистон Республикаси учун ана шундай тарихий кунлардан бири, шубҳасиз, Конституция қабул қилинган санадир. Бундан роппа-роса 33 йил муқаддам, яъни 1993 йилнинг 9 апрель куни Қорақалпоғистон Республикаси Олий Кенгашининг сессиясида Қорақалпоғистон Республикаси Конституцияси қабул қилинган эди. Ўтган давр мобайнида Конституция кўп миллатли халқимизнинг ҳамжиҳатлиги ва дўстлигини мустаҳкамловчи, уларни улуғ бунёдкорлик ишларига бошловчи асосий ҳужжат бўлиб хизмат қилмоқда.

Ушбу сана республиканинг барча шаҳар ва туманларида кенг нишонланмоқда. Хусусан, Амударё туманида ҳам Қорақалпоғистон Республикаси Конституцияси қабул қилинганлигининг 33 йиллиги муносабати билан байрам тадбири ташкил этилди.

Туман Маданият бўлими биносида бўлиб ўтган ушбу тантанали маросимда депутатлар, туман ҳокимлигининг масъуллари, ҳудуддаги корхона ва ташкилотлар вакиллари, таълим муассасалари ходимлари ҳамда кенг жамоатчилик иштирок этди.

Байрамнинг расмий қисми Ўзбекистон ва Қорақалпоғистон Республикаларининг давлат мадҳиялари билан бошланди.

Тантанали тадбирни Халқ депутатлари туман Кенгашининг котибияти мудири Мансур Ўрозбоев кириш сўзи билан очиб берди. У ўз нутқида Конституциямизнинг давлат ва жамият тараққиётини, халқ жипслигини таъминлашдаги беқиёс ўрни ва аҳамиятига алоҳида тўхталиб ўтди.

Таъкидланганидек, Қорақалпоғистон Республикаси Конституияси — кўп миллатли халқимизнинг ўзаро ҳамжиҳатлиги, дўстлиги ва тотувлигини мустаҳкамловчи, уларни бирдамликка даъват этувчи муҳим ҳуқуқий ҳужжатдир. Конституция нафақат давлат тузилишини, балки ҳар бир фуқаронинг қадр-қиммати, шаъни ва келажагини ҳимоя қиладиган қалқондир. Ўтган 33 йил ичида эришилаётган барча ютуқлар, ижтимоий-иқтисодий соҳалардаги ўзгариш ва янгиланишлар, халқимизнинг турмуш даражаси юксалиши бевосита мана шу Конституциямизда белгиланган нормаларнинг ҳаётий ифодасидир.

Юртимизнинг бугунги тараққиёт босқичларига назар ташлар эканмиз, иқтисодиётимизнинг йилдан-йилга мустаҳкамланиб бораётгани, шаҳар ва қишлоқларимиз қиёфаси тубдан ўзгараётгани барчамизни қувонтиради. Бу ютуқлар замирида инсон манфаатларини ҳамма нарсадан устун қўювчи чуқур ва пухта ўйланган стратегик мақсадлар мужассам.

Айниқса, кейинги йилларда Муҳтарам Президентимиз раҳбарлигида Қорақалпоғистон Республикасини ривожлантириш бўйича қабул қилинган алоҳида фармон ва қарорлар, давлат дастурлари ҳаётимизда муҳим бурилиш ясади. Ушбу ҳужжатлар асосида республиканинг энг чекка ҳудудларигача етиб бораётган ислоҳотлар, янгидан барпо этилаётган замонавий турар жойлар, ижтимоий соҳа объектлари, мактаб ва боғчалар, тиббиёт масканлари халқимизнинг эртанги кунга бўлган ишончини янада мустаҳкамламоқда. Амударё тумани мисолида ҳам ана шундай улкан қурилиш-таъмирлаш ва ободонлаштириш ишларининг гувоҳи бўлиш мумкин. Буларнинг барчаси Конституциямизда муҳрланган тамойилларнинг амалдаги ижросидир.

Конституция байрамига бағишланган тадбирнинг бадиий қисми ҳам ниҳоятда мазмунли ва ранг-баранг бўлди. Туман маданият бўлими ходимлари томонидан тайёрланган концерт дастури йиғилганларга кўтаринки кайфият улашди. Тинчлик ва дўстликни тараннум этувчи куй-қўшиқлар, миллий рақслар ва бадиий чиқишлар орқали халқимизнинг бой маданий мероси, миллий қадриятларимиз яна бир бор намойиш этилди.

Шу ўринда айтиш жоизки, Конституция ва қонунларга ҳурмат билан муносабатда бўлиш, уларни эъзозлаш ва ҳаётимизга татбиқ этиш юрт тинчлиги ва тараққиётининг энг тўғри йўлидир. Бугунгидек шодиёналар эса халқимизнинг якдиллигини ошириб, эзгу мақсадлар сари янги куч-ғайрат бағишлайди.