Туман прокурори Дўрман ва Қорамон маҳаллаларида бўлиб, аҳолининг яшаш шароитларини хонадонма-хонадон ўрганди

Мамлакатимизда давлат ва халқ ўртасидаги мулоқотни янги босқичга олиб чиқиш, аҳолининг муаммоларини бевосита жойида ўрганиб, уларга амалий ечим топиш мақсадида жорий этилган “маҳаллабай” ва “хонадонбай” ишлаш тизими ўзининг яққол ҳамда ижобий самарасини бермоқда. Бугунги кунда барча даражадаги раҳбарлар, жумладан, ҳуқуқ-тартибот идоралари масъуллари ўз хизмат хоналаридан чиқиб, жойларга ташриф буюрган ҳолда, оддий аҳолининг дарду ташвишлари билан ҳамнафас бўлмоқдалар. Айниқса, чекка ҳудудларда яшовчи фуқароларнинг ижтимоий ҳимоясини кучайтириш, уларнинг яшаш шароитларини яхшилаш ва розилигига эришиш давлатимиз олиб бораётган ижтимоий сиёсатнинг энг устувор йўналишларидан бирига айланган.

Амударё туманининг ижтимоий-иқтисодий ривожланишига муносиб ҳисса қўшиш, аҳоли осойишталиги ва фаровонлигини таъминлаш мақсадида туман прокурори Баҳром Машарипов бевосита ўзига бириктирилган ҳудудларда бўлиб, кенг кўламли ўрганиш ва таҳлил ишларини олиб борди. Хусусан, туман прокурори Дўрман ҳамда Қорамон маҳаллалари ҳудудларида яшовчи оилалар ҳолидан хабар олди. Бу жараёнда расмиятчиликдан бутунлай йироқ бўлган, самимий, ишончли ва очиқ мулоқот муҳити яратилди.

Раҳбарнинг хонадонма-хонадон юриб, маҳалла оқсоқоллари, хотин-қизлар ва ёшлар вакиллари билан юзма-юз кўришиши нафақат уларнинг кайфиятига ижобий таъсир кўрсатди, балки ҳудуддаги реал ижтимоий манзарани тўлақонли ҳис қилиш имконини ҳам берди. Баҳром Машарипов ҳар бир оиланинг ижтимоий аҳволи ҳамда яшаш шароитлари билан яқиндан танишиб чиқди. Айниқса, эҳтиёжманд, боқувчисини йўқотган ҳамда қўллаб-қувватлашга муҳтож оилаларнинг турмуш тарзига, уларнинг соғлиғи ва бандлиги масалаларига алоҳида эътибор қаратилди. Одамларнинг кундалик турмушида дуч келаётган қийинчиликлари раҳбар томонидан диққат билан тингланди.

Ўрганишлар жараёнида муаммоларни шунчаки қайд этиш билан чекланилмади, балки уларни ижобий ҳал этиш юзасидан жойида зарур ва кечиктириб бўлмайдиган чоралар кўрилди. Вақт ва қўшимча маблағ талаб этадиган масалалар бўйича тегишли ташкилотларга кўрсатмалар берилиб, ижроси прокуратура назоратга олинди.

Қолаверса, маҳаллаларда тинчликни мустаҳкамлаш, жиноятчилик ва турли ҳуқуқбузарликларнинг барвақт олдини олиш, оилавий низоларга йўл қўймаслик мақсадида аҳоли билан кенг қамровли профилактик суҳбатлар ўтказилди.

Тадбир давомида ҳудудда янги қурилган биноларда фуқаролар учун яратилган мавжуд турли хил имкониятлар бўйича махсус тайёрланган презентация лойиҳалари ишлаб чиқилиб, аҳолига кўргазмали тарзда таништирилди. Ушбу тақдимотлар орқали маҳалла аҳли янги инфратузилма объектларидан, хизмат кўрсатиш мажмуаларидан қандай қилиб унумли фойдаланиши мумкинлиги ҳақида тўлиқ тушунчага эга бўлди.

Маълумки, юртимизда тинчлик ва хавфсизликни таъминлаш масаласи давлат сиёсатининг энг устувор мақсадларидан бири саналади. Шу боисдан, Ўзбекистон Республикаси Президентининг “Республика маҳаллаларида хавфсиз муҳитни яратиш йўналишида яхлит манзилли ишлаш тизимини жорий этишга қаратилган қўшимча чора-тадбирлар тўғрисида”ги қарори қабул қилинган бўлиб, ушбу муҳим ҳужжат жойларда хавфсизликни таъминлашнинг мутлақо янги механизмларини белгилаб берди.

Амударё тумани прокурори бошчилигида ўтказилган ўрганишлар давомида айнан мана шу қарор ижроси ҳам назоратга олинди. Ҳар бир кўчадаги вазият таҳлил қилиниб, “хавфсиз маҳалла” концепциясини тўлақонли ҳаётга татбиқ этиш вазифалари белгилаб олинди.

Амударё туманида ҳуқуқни муҳофаза қилувчи идоралар томонидан амалга оширилаётган бу каби ишлар замирида фақат битта мақсад – инсон қадрини улуғлаш, унинг ҳақ-ҳуқуқларини ҳимоя қилиш ғояси ётибди. Прокурорнинг бевосита хонадонларга кириб бориши давлат идораларининг халққа қанчалик яқинлашганининг яна бир амалий исботидир. Маҳаллаларда яратилаётган бундай соғлом ва хавфсиз муҳит, аҳоли билан ўтказилаётган очиқ мулоқотлар яқин келажакда албатта ўз мевасини беради ва одамларнинг эртанги кунга бўлган ишончини янада мустаҳкамлайди.