Бутунжаҳон силга қарши курашиш куни муносабати билан "Соғлом овқатланиш" ярмаркаси ташкил қилинди

Инсоният цивилизацияси тарихида саломатлик энг олий қадрият бўлиб келган ва бугунги шиддатли даврда ҳам бу ҳақиқат ўз долзарблигини йўқотгани йўқ. Айниқса, юқумли касалликларга қарши курашиш, аҳоли орасида тиббий маданиятни юксалтириш ҳар бир давлатнинг стратегик мақсадига айланган. Шу маънода, ҳар йили дунё миқёсида кенг нишонланадиган 24 март – Бутунжаҳон силга қарши курашиш куни нафақат соҳа мутахассислари, балки кенг жамоатчилик учун ҳам муҳим огоҳлик қўнғироғи бўлиб хизмат қилмоқда.

Ушбу сана муносабати билан юртимизнинг барча ҳудудларида бўлгани каби, Амударё туманида ҳам аҳоли саломатлигини муҳофаза қилиш, касалликнинг олдини олиш ва соғлом турмуш тарзини тарғиб қилишга қаратилган кенг кўламли тадбирлар ўтказилди. Ана шундай тадбирлардан бири Манғит деҳқон бозорида Қорақалпоғистон Республикаси Саломатлик ва стратегик ривожланиш институтининг Амударё тумани бўлими ва кўп тармоқли марказий поликлиника шифокорлари томонидан ташкил қилинди.

Аҳоли гавжум бўлган Манғит деҳқон бозори ҳудудида "Соғлом овқатланиш" ярмаркасининг ташкил этилиши бежиз эмас, зеро бозор — аҳоли билан бевосита мулоқот қилиш, уларга тиббий маслаҳатлар бериш ва касалликнинг олдини олиш чораларини тушунтириш учун энг қулай майдондир.

Тадбирда иштирок этган малакали мутахассислар — валеолог Тамара Саидова, фтизиатрлар Гулора Абдуллаева ҳамда Муборак Алламуродовалар ўзларининг кўп йиллик тажрибалари ва тиббий билимлари билан фуқароларга яқиндан кўмак бердилар.

Фтизиатр Гулора Абдуллаева йиғилганларга сил касаллигининг келиб чиқиш сабаблари, унинг белгилари ва патологик жараёнлари ҳақида батафсил маълумот бериб ўтди. Шифокорнинг таъкидлашича, сил касаллиги — бу фақатгина тиббий эмас, балки ижтимоий муаммо ҳамдир. Унинг белгиларини эрта аниқлаш, даволаш жараёнини ўз вақтида бошлаш нафақат беморнинг соғайишини таъминлайди, балки атрофдагиларнинг ҳам хавфсизлигини кафолатлайди. Шу боис, йўталнинг узоқ давом этиши, ҳолсизлик, вазн йўқотиш каби аломатларга бефарқ бўлмаслик зарурлиги алоҳида қайд этилди.

Шу билан бирга, касалликка қарши курашишда фақатгина тиббий муолажалар эмас, балки инсон организмининг ички ҳимоя кучлари — иммунитет тизими ҳам муҳим роль ўйнайди. Бу борада валеолог Тамара Саидова ўз тавсиялари билан ўртоқлашди. Унинг сўзларига кўра, сил касаллигидан сақланишнинг энг самарали йўли — бу соғлом турмуш тарзига қатъий риоя қилишдир. Соғлом овқатланиш тамойиллари, жисмоний фаолликни ошириш, шахсий гигиена қоидаларига амал қилиш ва руҳий хотиржамликни сақлаш инсон организмини турли инфекцияларга қарши чидамли қилади.

Шунингдек, мутахассис зарарли одатлар, хусусан, кашандалик ва бошқа иллатлар ўпка тизимига қанчалик салбий таъсир кўрсатиши, бу эса сил бактериялари учун қулай муҳит яратишини алоҳида таъкидлаб ўтди. "Соғлом овқатланиш" ярмаркаси доирасида намойиш этилган маҳсулотлар ва тақдим этилган маълумотлар аҳолининг кундалик рационини тўғри шакллантириш бўйича амалий қўлланма вазифасини ўтади.

Тиббиётнинг асосий тамойилларидан бири — касалликни даволашдан кўра, унинг олдини олишга ҳаракат қилишдир. Фтизиатр Муборак Алламуродова айнан шу жиҳатга тўхталар экан, профилактика чораларининг аҳамиятини юқори баҳолади. Айниқса, эҳтиётдан эмлаш тадбирлари, режали тиббий кўриклардан ўтиш ва аҳолининг флюорография текширувларига фаол жалб этилиши халқимиз саломатлигини асрашнинг калити эканлигини таъкидлади. Шифокорнинг фикрича, ҳар бир инсон ўз соғлиғига масъулият билан ёндашса, давлатимиз томонидан яратилган тиббий имкониятлардан унумли фойдаланса, нафақат сил касаллигини жиловлаш, балки халқимизнинг ўртача умр кўриш даражасини сезиларли даражада оширишга эришиш мумкин.

Бу каби тадбирлар аҳолининг тиббий саводхонлигини ошириш билан бир қаторда, уларда ўз саломатлигига бўлган эътиборни кучайтиришга ҳам хизмат қилади.