Давлат хизматчиларига коррупцияга қарши курашиш бўйича миллий қонунчиликдан кўчирмалар тарқатилди
Коррупцияга қарши курашишда давлат органлари, жамоатчилик ва фуқаролик жамияти институтларининг ҳамкорлиги муҳим ўрин тутади. Хусусан, жамоатчиликнинг хабардорлигини ошириш, соҳага оид ҳуқуқий билимларни кенг оммага етказиш, аҳоли, айниқса, давлат хизматчилари ўртасида ҳалоллик, масъулият ва жавобгарлик ҳиссини шакллантириш бугунги куннинг долзарб вазифаларидан биридир.
“Тараққиёт кўзгуси” газетаси таҳририятининг Ўзбекистон Республикаси Олий Мажлиси ҳузуридаги Фуқаролик жамияти институтларини қўллаб-қувватлаш жамоат фонди томонидан молиялаштирилган “Биз коррупцияга қаршимиз!” номли грант лойиҳаси доирасида амалга оширилаётган тадбирлар айнан шу мақсадга хизмат қилмоқда. Лойиҳа доирасида давлат хизматчилари иштирокида маънавий-маърифий тадбирлар, давра суҳбатлари ўтказилмоқда.
Хусусан, Давлат кадастрлари палатаси Амударё туман филиали, туман Адлия бўлими ва Дўстлик маҳалла фуқаролар йиғини маъмурий биносида ўтказилган давра суҳбатларида коррупциянинг жамият ва давлат ривожига салбий таъсири, унинг ижтимоий ва иқтисодий оқибатлари, фуқароларнинг ҳуқуқий онги ва ҳуқуқий маданиятини ошириш масалалари атрофлича муҳокама этилди. Шунингдек, иштирокчиларга коррупцияга қарши курашиш бўйича миллий қонунчиликдан кўчирмалар тарқатилди. Унда коррупцион ҳолатларнинг олдини олиш, манфаатлар тўқнашуви, шаффофлик ва жавобгарликни таъминлашга оид муҳим нормалар ўз ифодасини топган.
Жамиятда коррупцияга нисбатан муросасиз муносабатни қарор топтириш, давлат хизматчиларининг ҳалоллик ва масъулиятни ўз вазифаларининг устувор тамойилига айлантириши — юртимизда ҳуқуқий демократик давлат ва кучли фуқаролик жамиятини барпо этишда муҳим аҳамият касб этади. Шу боис, бундай маънавий-маърифий тадбирларнинг аҳамияти беқиёсдир.
Шоҳзод Қурбонбоев, лойиҳа координатори.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
