Амударё туманида ҳуқуқни муҳофаза қилувчи идоралар Кенгашининг кенгайтирилган йиғилиши бўлиб ўтди

Амударё тумани Маданият маркази биносида ҳуқуқни муҳофаза қилувчи идоралар мувофиқлаштирувчи Кенгашининг кенгайтирилган йиғилиши бўлиб ўтди. Йиғилишда туман ҳокими Собир Хўжаметов, туман прокурори Баҳром Машарипов, туман Ички ишлар бўлими бошлиғи Мухамметали Хўжамуратов ҳамда тумандаги ташкилот ва муассасалар раҳбарлари иштирок этишди.

Таъкидлаш жоизки, йиғилишда жорий йилнинг биринчи ярмида жиноятчиликка қарши кураш, ҳуқуқбузарликларнинг олдини олиш, жамоат хавфсизлигини таъминлаш ҳамда ижтимоий-иқтисодий соҳаларда кузатилаётган муаммолар ва йўл қўйилаётган камчиликлар танқидий муҳокама қилинди.

Туман Прокурори – Мувофиқлаштирувчи Кенгаши раиси Баҳром Машарипов ўз маърузасида  ҳисобот даврида 100 га яқин назорат тадбирлари ўтказилиб, 789 та қонунбузилиш ҳолати аниқлангани, улар бўйича 133 та прокурор назорати ҳужжатлари қўлланилганини маълум қилди.

Шунингдек, 400 га яқин мурожаатнинг 78 фоизи прокуратура органларида кўриб чиқилгани, 200 дан зиёд сайёр қабуллар ташкил этилгани ва аҳолини хабардор қилиш мақсадида 200 дан ортиқ ҳуқуқий-тарғибот тадбирлари ўтказилгани қайд этилди.

Прокуратура органлари томонидан аниқланган қонунбузилиш ҳолатларининг келиб чиқишига, асосан идора ва ташкилотлар раҳбарлари, масъул шахсларининг ўз хизмат вазифаларини лозим даражада билмаслиги, касбига садоқат руҳи шаклланмагани, ишлар тўғри ташкил этилмагани, соҳадаги тизимли хато ва камчиликларни, мавжуд муаммоларни ўз вақтида бартараф этиш борасида шахсий ташаббус йўқлиги сабаб қилиб кўрсатилди.

Бундан ташқари, хизмат вазифасига юзаки ва масъулиятсизлик билан қараб, қонунбузилиш ҳолатларига йўл қўйган ходимларга нисбатан қатъий чоралар кўрилиши лозимлиги таъкидланди.

Шундан сўнг, йўл қўйилган камчиликлар бўйича масъулларнинг тушунтиришлари ва ҳисоботлари тингланди.

Йиғилиш сўнгида Кенгаш Қарори билан, ҳудудда криминоген вазият барқарорлигини таъминлашда ҳуқуқни муҳофаза қилувчи органлар ҳамда ҳокимлик, идора ва ташкилотларнинг ҳамкорлигини янада кучайтириш бўйича чора-тадбирлар белгиланиб, ижроси назоратга олинди.

Шунингдек, йиғилишда Ўзбекистон Республикаси Президентининг 2025 йил 3 январдаги “2025 йилда Республика маҳаллаларида хавфсиз муҳитни яратиш ва ҳуқуқбузарликларнинг барвақт олдини олиш тизими самарадорлигини янада ошириш бўйича чора-тадбирлар тўғрисида”ги Қарори ижроси  ва  бу борада йўл қўйилган хато ва камчиликлар атрофлича муҳокама этилди.

“Маҳалла еттиликлари”га мазкур Қарор талабларидан келиб чиққан ҳолда амалга оширилиши лозим бўлган вазифалар юзасидан аниқ кўрсатма ва топшириқлар берилди.

Амударё туман Прокуратураси.