Амударё туманида ғалла ўрим-йиғими бошланди
Амударё туманида 2025 йилги ғалла ўрим-йиғими мавсуми бошлангани муносабати билан “Тахиатош дон” акциядорлик жамиятига қарашли ғалла қабул қилиш масканида қишлоқ хўжалиги соҳаси вакиллари иштирокида махсус семинар ташкил этилди. Тадбирда туман ҳокими Собир Хўжаметов, ғалла етиштирувчи фермер хўжаликлари раҳбарлари, агрономлар ҳамда оммавий ахборот воситалари вакиллари қатнашди.
Семинарда туман ҳокими Собир Хўжаметов сўзга чиқиб, бу йилги ғалла мавсуми учун яратилган шарт-шароитлар, ҳосилдорлик даражаси ва режалаштирилган натижалар хусусида батафсил тўхталиб ўтди. У ўз нутқида қишлоқ хўжалиги тармоғида самарадорликни ошириш, ғалла етиштирувчиларга амалий ёрдам кўрсатиш ва ҳосилни қисқа муддатларда, сифатли йиғиб олиш муҳимлигини таъкидлади.
Айтиш жоизки, ғалла халқимиз дастурхонининг тўкинлиги, юртимиз озиқ-овқат хавфсизлигининг асоси ҳисобланади. Шу боис, ҳар бир деҳқон буғдой майдонига уруғ қадаган лаҳзадан бошлаб, у ҳосил бўлиб, омборга топширилгунча барча агротехник тадбирларни ўз вақтида ва сифатли бажаришга интилади.
Ҳосилдорлик, энг аввало, ер танлаш ва уни тўғри тайёрлашдан бошланади. Тупроқнинг физик-кимёвий таркиби, намлик даражаси ва унумдорлиги аниқланиб, унга мос ғалла навларини экиш муҳим аҳамиятга эга. Шунингдек, ерга органик ва минерал ўғитлар меъёрида берилиши, ерни шудгорлаш ва лазер усулида текислаш агротехник жиҳатдан асосий босқичлардандир.
Жорий йилги мавсумда туманимизда 270 та фермер хўжаликлари томонидан 4800 гектар экин майдонига ғалла экилган. Фермер хўжаликлари томонидан етиштириладиган ғалла ҳосилининг 11 минг 130 тоннаси контрактация шартномасига асосан қабул масканларига топширилиши кўзда тутилган. “Тахиатош дон” АЖ ғалла қабул қилиш масканида биринчи кунда жами 27 тонна дон қабул қилинган бўлиб, “Темурбек-Билолбек” фермер хўжалиги дастлабки ғалла топширган хўжалик сифатида қайд этилди. Мазкур фермер хўжалиги 6 тонна ғалла ҳосили топшириб, пешқадамлар қаторидан жой олди.
Семинарда сўз олган соҳа мутахассислари ғалла етиштиришда агротехник тадбирларни ўз вақтида амалга ошириш энг муҳим омиллардан эканлигини алоҳида таъкидладилар. Амударёлик ғаллакорлар сифатли ва сертификатланган уруғ танлаш, уруғни экишдан олдин зараркунандаларга қарши ишлов бериш, оптимал муддатда экиш, ўғитлаш тизимини тўғри режалаштириш, бегона ўтлар, касалликлар ва зараркунандаларга қарши курашиш, суғориш ва намликни тежовчи технологияларни қўллаш борасида мавсум давомида самарали фаолият олиб борганликлари боис бугун далаларда мўл ҳосил тўплангани эътироф этилди.
Бугунги кунда туманимиздаги кўплаб илғор фермер хўжаликлари ҳар гектардан 60-70 центнер, баъзилари эса ундан ҳам юқори кўрсаткичларда ҳосилдорликка эришмоқдалар. Бунга фермерларнинг меҳнатсеварлиги, замонавий техникалардан фойдаланиш, тажрибали агрономлар тавсияларига амал қилиш ва яратилаётган кенг кўламли имкониятлардан самарали фойдаланиш асос бўлмоқда.
Семинар давомида ғалла қабул қилишнинг технологик жараёнлари, лаборатория синовлари ва сақлаш шартлари бўйича амалий кўргазмалар ташкил этилди. Мутахассислар ҳосилни етказиб бериш ва қабул қилишда фермерларга қулайлик яратиш мақсадида амалга оширилаётган ишлар билан иштирокчиларни таништирди.
Тадбир якунида иштирокчилар мавсум давомида юзага келиши мумкин бўлган муаммолар ва уларнинг ечимлари юзасидан ўзаро фикр алмашдилар.
Чарос Арслонова, туман ҳокимлигининг Ахборот хизмати раҳбари.
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
▶
