Amudaryo tumanida gʻalla oʻrim-yigʻimi boshlandi

Amudaryo tumanida 2025-yilgi gʻalla oʻrim-yigʻimi mavsumi boshlangani munosabati bilan “Taxiatosh don” aktsiyadorlik jamiyatiga qarashli gʻalla qabul qilish maskanida qishloq xoʻjaligi sohasi vakillari ishtirokida maxsus seminar tashkil etildi. Tadbirda tuman hokimi Sobir Xoʻjametov, gʻalla yetishtiruvchi fermer xoʻjaliklari rahbarlari, agronomlar hamda ommaviy axborot vositalari vakillari qatnashdi.

Seminarda tuman hokimi Sobir Xoʻjametov soʻzga chiqib, bu yilgi gʻalla mavsumi uchun yaratilgan shart-sharoitlar, hosildorlik darajasi va rejalashtirilgan natijalar xususida batafsil toʻxtalib oʻtdi. U oʻz nutqida qishloq xoʻjaligi tarmogʻida samaradorlikni oshirish, gʻalla yetishtiruvchilarga amaliy yordam koʻrsatish va hosilni qisqa muddatlarda, sifatli yigʻib olish muhimligini taʼkidladi.

Aytish joizki, gʻalla xalqimiz dasturxonining toʻkinligi, yurtimiz oziq-ovqat xavfsizligining asosi hisoblanadi. Shu bois, har bir dehqon bugʻdoy maydoniga urugʻ qadagan lahzadan boshlab, u hosil boʻlib, omborga topshirilguncha barcha agrotexnik tadbirlarni oʻz vaqtida va sifatli bajarishga intiladi.

Hosildorlik, eng avvalo, yer tanlash va uni toʻgʻri tayyorlashdan boshlanadi. Tuproqning fizik-kimyoviy tarkibi, namlik darajasi va unumdorligi aniqlanib, unga mos gʻalla navlarini ekish muhim ahamiyatga ega. Shuningdek, yerga organik va mineral oʻgʻitlar meʼyorida berilishi, yerni shudgorlash va lazer usulida tekislash agrotexnik jihatdan asosiy bosqichlardandir.

Joriy yilgi mavsumda tumanimizda 270 ta fermer xoʻjaliklari tomonidan 4800 gektar ekin maydoniga gʻalla ekilgan. Fermer xoʻjaliklari tomonidan yetishtiriladigan gʻalla hosilining 11 ming 130 tonnasi kontraktatsiya shartnomasiga asosan qabul maskanlariga topshirilishi koʻzda tutilgan. “Taxiatosh don” AJ gʻalla qabul qilish maskanida birinchi kunda jami 27 tonna don qabul qilingan boʻlib, “Temurbek-Bilolbek” fermer xoʻjaligi dastlabki gʻalla topshirgan xoʻjalik sifatida qayd etildi. Mazkur fermer xoʻjaligi 6 tonna gʻalla hosili topshirib, peshqadamlar qatoridan joy oldi.

Seminarda soʻz olgan soha mutaxassislari gʻalla yetishtirishda agrotexnik tadbirlarni oʻz vaqtida amalga oshirish eng muhim omillardan ekanligini alohida taʼkidladilar. Amudaryolik gʻallakorlar sifatli va sertifikatlangan urugʻ tanlash, urugʻni ekishdan oldin zararkunandalarga qarshi ishlov berish, optimal muddatda ekish, oʻgʻitlash tizimini toʻgʻri rejalashtirish, begona oʻtlar, kasalliklar va zararkunandalarga qarshi kurashish, sugʻorish va namlikni tejovchi texnologiyalarni qoʻllash borasida mavsum davomida samarali faoliyat olib borganliklari bois bugun dalalarda moʻl hosil toʻplangani eʼtirof etildi.

Bugungi kunda tumanimizdagi koʻplab ilgʻor fermer xoʻjaliklari har gektardan 60-70 tsentner, baʼzilari esa undan ham yuqori koʻrsatkichlarda hosildorlikka erishmoqdalar. Bunga fermerlarning mehnatsevarligi, zamonaviy texnikalardan foydalanish, tajribali agronomlar tavsiyalariga amal qilish va yaratilayotgan keng koʻlamli imkoniyatlardan samarali foydalanish asos boʻlmoqda.

Seminar davomida gʻalla qabul qilishning texnologik jarayonlari, laboratoriya sinovlari va saqlash shartlari boʻyicha amaliy koʻrgazmalar tashkil etildi. Mutaxassislar hosilni yetkazib berish va qabul qilishda fermerlarga qulaylik yaratish maqsadida amalga oshirilayotgan ishlar bilan ishtirokchilarni tanishtirdi.

Tadbir yakunida ishtirokchilar mavsum davomida yuzaga kelishi mumkin boʻlgan muammolar va ularning yechimlari yuzasidan oʻzaro fikr almashdilar.

Charos Arslonova, tuman hokimligining Axborot xizmati rahbari.