Спортнинг волейбол тури бўйича аёллар ўртасида мусобақа ўтказилди

Баҳор нафаси билан кириб келадиган 8-март – Халқаро хотин-қизлар куни юртимизда катта шодиёналар билан нишонланади. Бу кун аёлларга бўлган ҳурмат ва эътибор яна бир бор намоён бўлиб, уларнинг жамиятдаги беқиёс ўрни эътироф этилади. Ўзбекистонда хотин-қизлар турли соҳаларда фаолият юритиб, нафақат илм-фан, балки спортда ҳам ўз салоҳиятини намоён этмоқда. Айниқса, таълим соҳасида ишлаётган аёл педагоглар жисмоний фаоллик ва саломатликка эътибор қаратиш баробарида, спортда ҳам фаол иштирок этмоқдалар.

Байрам арафасида Амударё туман ихтисослаштирилган мактабида таълим соҳаси вакиллари ўртасида спортнинг волейбол тури бўйича мусобақа ўтказилди. Мазкур мусобақа педагоглар ўртасида жамоавий ҳамжиҳатликни кучайтириш, соғлом турмуш тарзини тарғиб қилиш ва уларнинг спортга бўлган қизиқишини ошириш мақсадида ташкил қилинди.

Мусобақада туманнинг етакчи умумтаълим мактабларида фаолият олиб бораётган аёл педагоглардан иборат жамоалар иштирок этди. Беллашувлар анча кескин ва муросасиз руҳда ўтди. Ҳар бир жамоа ғалабага бўлган иштиёқини намоён этиб, ўзининг кучли техникаси, аниқ зарба ва чиройли комбинациялари билан спорт ихлосмандларини хушнуд этди.

Мусобақанинг дастлабки босқичида жамоалар ўзаро баҳс олиб бориб, кучлилар саралаб олинди. Финал босқичига етиб келган жамоаларнинг ўйини эса янада муросасиз кечди. Иштирокчилар майдонда кучли ҳужумлар ташкил этиш ва ҳимояда ишончли ўйнаш орқали рақибларига қарши кураш олиб бордилар.

Айниқса, 28-сонли ва 7-сонли умумтаълим мактаблари жамоалари ўртасидаги финал баҳси томошабоплиги ва шиддати билан ажралиб турди. Иккала жамоа ҳам ғалаба учун охиригача кураш олиб борди, аммо 28-сонли умумтаълим мактаби жамоаси ўзининг кучли тактик ўйини ва жамоавий ҳамжиҳатлиги билан ғолибликни қўлга киритди.

Қизғин кечган баҳслар натижасида 28-сонли умумтаълим мактаби жамоаси 1-ўринни эгаллади. 2-ўрин 7-сонли умумтаълим мактаби жамоасига насиб этди. 3-ўринга эса 12-сонли ва 11-сонли умумтаълим мактаблари жамоалари муносиб кўрилди.

Беллашувлар якунида ғолиб ва совриндор жамоалар Таълим ва фан ходимлари касаба уюшмаси Амударё туман бўлинмаси томонидан фахрий ёрлиқ ҳамда эсдалик совғалари билан тақдирланди.

Тақдирлаш маросимида таълим соҳасидаги аёлларнинг спортга бўлган қизиқиши ва фаоллиги юқори баҳоланди. Ташкилотчилар бу каби мусобақаларнинг аҳамиятини қайд этиб, келгусида бундай тадбирлар доимий равишда ўтказилишини маълум қилди.

Волейбол спорт тури жамоавийлик ва ўзаро тушунишни талаб қиладиган ўйиндир. Бу спорт инсонда жисмоний чиниқишни таъминлаб, тезкорлик, ирода ва стратегия юритиш қобилиятини ривожлантиради. Мазкур мусобақа ҳам педагоглар ўртасидаги дўстона муҳитни янада мустаҳкамлаш, уларни соғлом турмуш тарзига кенгроқ жалб этишга хизмат қилди.

Шоҳзод Қурбонбоев.