Sportning voleybol turi boʻyicha ayollar oʻrtasida musobaqa oʻtkazildi

Bahor nafasi bilan kirib keladigan 8-mart – Xalqaro xotin-qizlar kuni yurtimizda katta shodiyonalar bilan nishonlanadi. Bu kun ayollarga boʻlgan hurmat va eʼtibor yana bir bor namoyon boʻlib, ularning jamiyatdagi beqiyos oʻrni eʼtirof etiladi. Oʻzbekistonda xotin-qizlar turli sohalarda faoliyat yuritib, nafaqat ilm-fan, balki sportda ham oʻz salohiyatini namoyon etmoqda. Ayniqsa, taʼlim sohasida ishlayotgan ayol pedagoglar jismoniy faollik va salomatlikka eʼtibor qaratish barobarida, sportda ham faol ishtirok etmoqdalar.

Bayram arafasida Amudaryo tuman ixtisoslashtirilgan maktabida taʼlim sohasi vakillari oʻrtasida sportning voleybol turi boʻyicha musobaqa oʻtkazildi. Mazkur musobaqa pedagoglar oʻrtasida jamoaviy hamjihatlikni kuchaytirish, sogʻlom turmush tarzini targʻib qilish va ularning sportga boʻlgan qiziqishini oshirish maqsadida tashkil qilindi.

Musobaqada tumanning yetakchi umumtaʼlim maktablarida faoliyat olib borayotgan ayol pedagoglardan iborat jamoalar ishtirok etdi. Bellashuvlar ancha keskin va murosasiz ruhda oʻtdi. Har bir jamoa gʻalabaga boʻlgan ishtiyoqini namoyon etib, oʻzining kuchli texnikasi, aniq zarba va chiroyli kombinatsiyalari bilan sport ixlosmandlarini xushnud etdi.

Musobaqaning dastlabki bosqichida jamoalar oʻzaro bahs olib borib, kuchlilar saralab olindi. Final bosqichiga yetib kelgan jamoalarning oʻyini esa yanada murosasiz kechdi. Ishtirokchilar maydonda kuchli hujumlar tashkil etish va himoyada ishonchli oʻynash orqali raqiblariga qarshi kurash olib bordilar.

Ayniqsa, 28-sonli va 7-sonli umumtaʼlim maktablari jamoalari oʻrtasidagi final bahsi tomoshabopligi va shiddati bilan ajralib turdi. Ikkala jamoa ham gʻalaba uchun oxirigacha kurash olib bordi, ammo 28-sonli umumtaʼlim maktabi jamoasi oʻzining kuchli taktik oʻyini va jamoaviy hamjihatligi bilan gʻoliblikni qoʻlga kiritdi.

Qizgʻin kechgan bahslar natijasida 28-sonli umumtaʼlim maktabi jamoasi 1-oʻrinni egalladi. 2-oʻrin 7-sonli umumtaʼlim maktabi jamoasiga nasib etdi. 3-oʻringa esa 12-sonli va 11-sonli umumtaʼlim maktablari jamoalari munosib koʻrildi.

Bellashuvlar yakunida gʻolib va sovrindor jamoalar Taʼlim va fan xodimlari kasaba uyushmasi Amudaryo tuman boʻlinmasi tomonidan faxriy yorliq hamda esdalik sovgʻalari bilan taqdirlandi.

Taqdirlash marosimida taʼlim sohasidagi ayollarning sportga boʻlgan qiziqishi va faolligi yuqori baholandi. Tashkilotchilar bu kabi musobaqalarning ahamiyatini qayd etib, kelgusida bunday tadbirlar doimiy ravishda oʻtkazilishini maʼlum qildi.

Voleybol sport turi jamoaviylik va oʻzaro tushunishni talab qiladigan oʻyindir. Bu sport insonda jismoniy chiniqishni taʼminlab, tezkorlik, iroda va strategiya yuritish qobiliyatini rivojlantiradi. Mazkur musobaqa ham pedagoglar oʻrtasidagi doʻstona muhitni yanada mustahkamlash, ularni sogʻlom turmush tarziga kengroq jalb etishga xizmat qildi.

Shohzod Qurbonboyev.