Халқ депутатлари Амударё тумани Кенгашининг учинчи сессияси тўғрисида ахборот

Жорий йилнинг 12 декабрь куни Амударё туман ҳокимлигининг мажлислар залида Халқ депутатлари туман Кенгашининг навбатдаги 3-сессияси бўлиб ўтди.

Сессия мажлисида депутатлар, туман ҳокими ўринбосарлари, маҳалла фуқаролар йиғинлари раислари ва ОАВ вакиллари иштирок этдилар. Сессияни Халқ депутатлари туман Кенгаши Раиси, туман ҳокими Собир Хўжаметов очди ҳамда олиб борди. Сессия котиблигига “2-Бойовул” сайлов округидан депутат Хонимжон Ражабовани сайлаш тўғрисидаги таклиф депутатлар томонидан маъқулланди.

Кун тартибидаги “Сув ресурсларини самарали бошқариш, сувни йўқотиш миқдорини камайтириш ва сув тежовчи технологияларни жорий этиш тўғрисида”ги масала юзасидан Амударё тумани “Сув етказиб бериш хизмати” давлат муассасаси бошлиғи Шукурулло Юсупов ҳисобот берди.

Ҳисоботда Ўзбекистон Республикаси Президенти раҳбарлигида жорий йил 7 ноябрь куни қишлоқ хўжалигида сув ва энергия ресурсларидан оқилона фойдаланиш ва йўқотишларни камайтириш чора-тадбирлари бўйича ўтказилган видеоселектор йиғилишида суғориш тармоқларини бетонлаштириш бўйича белгилаб берилган топшириқларни ижро қилиш борасида туманда амалга оширилаётган ишлар хусусида сўз юритилди.

Хусусан, туманда жами 296,65 км узунликда хўжаликлараро каналлар, 1342 км ички хўжалик каналлари мавжуд бўлиб, сув ресурсларидан оқилона фойдаланиш, каналларда сув йўқолишини камайтириш мақсадида 2024-2025 йил куз-қиш даврида жами 190 км, шундан 40 км хўжаликлараро каналларни бетонлаш ҳамда фермер ва кластерларнинг 150 км ички каналларини бетонлаш режалаштирилган.

Шунингдек, 2025 йилда туманда 48,1 км хўжаликлараро каналларни тозалаш ҳамда 335,5 км ички каналларни тозалаш кўзда тутилган. 2025 йил ҳосили учун жами 2010 гектар майдонда сувни тежайдиган технологияларни жорий қилиш бўйича самарали ишлар режалаштирилган бўлиб, шундан 550 гектар майдонда томчилатиб суғориш, 200 гектар майдонда ёмғирлатиб суғориш, 60 гектар майдонда дискретли суғориш технологияларини жорий қилиш, 960 га майдонга эгилувчан қувурлар орқали, 240 га майдонга эгатга плёнка тўшаб суғориш орқали сувни ресурсларини тежаш кўзда тутилмоқда.

Сессия кун тартибидаги навбатдаги – “Фермер хўжаликлари экин майдонларидан самарали фойдаланишни ташкил этиш, уларнинг экин ер майдонларини мақбуллаштиришда ҳуқуқлари ва қонуний манфаатларига риоя этилишини таъминлаш тўғрисида”ги масала юзасидан туман Қишлоқ хўжалиги бўлими бошлиғи Қудрат Абдухаликов ҳисобот берди.

Ҳисоботда Ўзбекистон Республикаси Вазирлар Маҳкамасининг 2024 йил 9 апрелдаги “Қорақалпоғистон Республикасида сув танқислиги шароитида қишлоқ хўжалиги соҳасини самарали ривожлантириш чора-тадбирлари тўғрисида”ги қарори ижросини таъминлаш борасида туманда амалга оширилаётган ишлар хусусида сўз юритилди.

Сессия кун тартибига киритилган масалалар атрофлича муҳокама қилинди, депутатларнинг фикр-мулоҳазалари тингланди ҳамда тегишли қарорлар қабул қилинди. Шунинг билан халқ депутатлари Амударё туман Кенгашининг учинчи сессияси ўз ишини якунлади.

Туман ҳокимлигининг Ахборот хизмати.