Xalq deputatlari Amudaryo tumani Kengashining uchinchi sessiyasi toʻgʻrisida axborot

Joriy yilning 12-dekabr kuni Amudaryo tuman hokimligining majlislar zalida Xalq deputatlari tuman Kengashining navbatdagi 3-sessiyasi boʻlib oʻtdi.

Sessiya majlisida deputatlar, tuman hokimi oʻrinbosarlari, mahalla fuqarolar yigʻinlari raislari va OAV vakillari ishtirok etdilar. Sessiyani Xalq deputatlari tuman Kengashi Raisi, tuman hokimi Sobir Xoʻjametov ochdi hamda olib bordi. Sessiya kotibligiga “2-Boyovul” saylov okrugidan deputat Xonimjon Rajabovani saylash toʻgʻrisidagi taklif deputatlar tomonidan maʼqullandi.

Kun tartibidagi “Suv resurslarini samarali boshqarish, suvni yoʻqotish miqdorini kamaytirish va suv tejovchi texnologiyalarni joriy etish toʻgʻrisida”gi masala yuzasidan Amudaryo tumani “Suv yetkazib berish xizmati” davlat muassasasi boshligʻi Shukurullo Yusupov hisobot berdi.

Hisobotda Oʻzbekiston Respublikasi Prezidenti rahbarligida joriy yil 7-noyabr kuni qishloq xoʻjaligida suv va energiya resurslaridan oqilona foydalanish va yoʻqotishlarni kamaytirish chora-tadbirlari boʻyicha oʻtkazilgan videoselektor yigʻilishida sugʻorish tarmoqlarini betonlashtirish boʻyicha belgilab berilgan topshiriqlarni ijro qilish borasida tumanda amalga oshirilayotgan ishlar xususida soʻz yuritildi.

Xususan, tumanda jami 296,65 km uzunlikda xoʻjaliklararo kanallar, 1342 km ichki xoʻjalik kanallari mavjud boʻlib, suv resurslaridan oqilona foydalanish, kanallarda suv yoʻqolishini kamaytirish maqsadida 2024-2025-yil kuz-qish davrida jami 190 km, shundan 40 km xoʻjaliklararo kanallarni betonlash hamda fermer va klasterlarning 150 km ichki kanallarini betonlash rejalashtirilgan.

Shuningdek, 2025-yilda tumanda 48,1 km xoʻjaliklararo kanallarni tozalash hamda 335,5 km ichki kanallarni tozalash koʻzda tutilgan. 2025-yil hosili uchun jami 2010 gektar maydonda suvni tejaydigan texnologiyalarni joriy qilish boʻyicha samarali ishlar rejalashtirilgan boʻlib, shundan 550 gektar maydonda tomchilatib sugʻorish, 200 gektar maydonda yomgʻirlatib sugʻorish, 60 gektar maydonda diskretli sugʻorish texnologiyalarini joriy qilish, 960 ga maydonga egiluvchan quvurlar orqali, 240 ga maydonga egatga plyonka toʻshab sugʻorish orqali suvni resurslarini tejash koʻzda tutilmoqda.

Sessiya kun tartibidagi navbatdagi – “Fermer xoʻjaliklari ekin maydonlaridan samarali foydalanishni tashkil etish, ularning ekin yer maydonlarini maqbullashtirishda huquqlari va qonuniy manfaatlariga rioya etilishini taʼminlash toʻgʻrisida”gi masala yuzasidan tuman Qishloq xoʻjaligi boʻlimi boshligʻi Qudrat Abduxalikov hisobot berdi.

Hisobotda Oʻzbekiston Respublikasi Vazirlar Mahkamasining 2024-yil 9-apreldagi “Qoraqalpogʻiston Respublikasida suv tanqisligi sharoitida qishloq xoʻjaligi sohasini samarali rivojlantirish chora-tadbirlari toʻgʻrisida”gi qarori ijrosini taʼminlash borasida tumanda amalga oshirilayotgan ishlar xususida soʻz yuritildi.

Sessiya kun tartibiga kiritilgan masalalar atroflicha muhokama qilindi, deputatlarning fikr-mulohazalari tinglandi hamda tegishli qarorlar qabul qilindi. Shuning bilan xalq deputatlari Amudaryo tuman Kengashining uchinchi sessiyasi oʻz ishini yakunladi.

Tuman hokimligining Axborot xizmati.