Yosh kitobxon oilaga navbatdagi tashrif

“– Siz oʻshami?

–Men oʻsha, –dedi Otabek.

Ikkisi ham bir-birisiga beixtiyor termulishib qoldilar...”

Er-xotinning maslagi-yu, maqsadi, orzu umidlari, intilishlari, kasb-u, kori bir boʻlsa qanday yaxshi-ya, aziz teletomoshabin! Albatta bu oila mustahkam boʻlishiga, juftliklar bir birini oʻzaro tushunib yashashiga zamin yaratadi. Bir oilada yashab, bir yostiqqa bosh qoʻyib, bir birini anglamasdan va orzu intilishlari bir koʻchadan yurib oʻtmay yashashdan Haq taolo oʻzi asrasin. Zero, oila barqarorligida oʻzaro hurmat va tushunishib yashash muhim oʻrin tutadi.

Biz yoʻqlab borgan oila vakillari esa bu masalada jamiyatimizga ibrat boʻlgulik. Maʼnaviyati boy ushbu oila sohib va sohibalari bugun el-u, yurtda hurmatda, davralarda aytar soʻzi maʼnoli, oʻrni esa toʻrda. Qanday qilib deysizmi? Hozir bilib olasiz...

Oʻrinboyevlar oilasini nafaqat doʻrmanliklar, balki, butun Amudaryo eli yaxshi tanishadi. Chunki ular ham adabiyotchilar oilasi sifatida, ham kitobxon oila sifatida koʻp bora eʼtirof etilgan. Oila boshligʻi Farhod aka va Shirin opalar qurgan mustahkam oila bugungi kunda ovulning tup qoʻyib, palak yozib, serfarzand serdavlat boʻlib umrguzaronlik qilayotgan old oilalaridan. Ha, farzandi kitob oʻqib, yuksak yuksak marralarni zabt etayotgan, dasturxon boshida kimningdir gʻiybati emas, balki, qaysidir badiiy asarning muhokamasi va mazmunli suhbatlar ketadigan madaniyatli kishilarni albatta serdavlat deyishadida!.. Bugun mana shu kitobxon farzandlar sabab ota-onaning el orasida qaddi va qadri baland, tanigan bilganlar rahmat aytishadi.

Kitobxon oʻgʻil Umidbek Oʻrinboyev va kitobxon kelin Muhabbat Davlatovalar bolalikdan kitoblar olamiga, ona tili va adabiyot fanlariga ixlos qoʻygan. Oʻquvchilik paytlarida adabiyot oʻqituvchisiga havas qilib oʻqituvchilik kasbini tanlagan Muhabbat bugun bu tanlovidan mamnun. Sobiq kursdoshlar va hozirgi kunda bir oila boʻlib baxtli hayot kechirayotgan bu juftlik Ajiniyoz nomidagi Nukus Davlat pedagogika institutini tugatib, mustaqil hayotga dadil qadamlar bilan kirib bordi.

Oʻz faoliyatini tumanimizdagi 20-sonli maktabda ona-tili adabiyot fani oʻqituvchisi sifatida boshlagan Umidbek ham maktabdagi ustozlik faoliyatiga, hamda kitob mutolaasiga vaqt topar edi. Ha, ushbu yosh kelin-kuyovning suhbatlari “Oʻtkan kunlar” bilan boshlanib, Pushkin sheʼrlari bilan yakunlangandir oʻshanda ehtimol. Nima boʻlganda ham ularning tinimsiz harakati va kitobga boʻlgan sevgisi besamar ketmadi. 2022-yilda respublika miqyosida oʻtkazilgan “Yosh kitobxon oila” tanlovida bir qancha bosqichlarni bosib oʻtib, ushbu ahil oila Oʻzbekiston boʻyicha faxrli birinchi oʻrinni qoʻlga kirib, davlatimiz rahbarini shaxsan oʻzlarining qoʻlidan "Spark" avtomobili kalitini oldi. Bu gʻalaba yosh oilaning orzulariga qanot bagʻishladi. Hozirgi kunda ikki nafar shirindan shakar farzandlarning ota-onasi boʻlgan bu juftlik harakatdan, mutolaadan sirayam toʻxtagani yoʻq. Stol ustidagi taxlangan kitoblar esa ularning porloq kelajagidan soʻzlayotganday goʻyo.

Yaqindagina Oʻrinboyevlar oilasi “Taraqqiyot koʻzgusi” gazetasi tahririyatining “Bilimli va maʼnaviyatli yoshlar bilan Uchinchi Renessans sari!” nomli grant loyihasi doirasida oʻtkazilgan “Mahallamizning eng ziyoli oilasi” tanlovida ham qatnashib, faxrli 1-oʻrinni qoʻlga kiritdi. Va bu ham oʻz navbatida oilaning yutuqlar shodasiga ilingan bir marjon boʻlib qoʻshildi. Tanlovda Oʻrinboyevlardan tashqari Alisher Bobojonovlar va Sohiba Bozorboyevalar ham gʻolib deb topildi hamda gʻoliblarga faxriy yorliqlar va badiiy kitoblar jamlanmasi sovgʻa qilindi.

Darhaqiqat, saodatli oilaning boʻsagʻasidan hatlashing bilan fayzu barakani his qilasan kishi. Biz ham tashrifimiz davomida ana shu tuygʻuni his etdik. Nazarimizda oshxonadan kelayotgan ovqat hidiga qoʻshilib, maʼnaviyat ifori ham taralar edi. Kitobxon oila bilan bir piyola choy ustidagi suhbatimiz orqali xuddiki biz ham katta bir asar oʻqiganday boʻldik va ularning kelgusidagi ishlariga baraka tilab xayrlashdik.

Aziza Madrahimova